Wen mle Dios lo yezh cheen xaa nixa nanalit ngok xaa lo xaa
(Salm kwaan mkee Asaf. Maskila.)
78
Yezh cheen na,
kenzha kwaan nii na lo gu;
kenzha xtizh na kwaan nroo roo na.
2 Lee roo na nii wdizh nabix
nu yé na re kwaan nzholaan axta gorna lee Dios mdexkwaa yizhyo;
3 re kwaan mbin be nu re kwaan mla yek be
nu re kwaan mzaa xey be kwent.
4 Nanzhaalt kozhaw beya lo re xinn be,
nzhaal zaa be kwenta lo re xinn be,
xaa nzexen gwluzh;
nzhaal gool be lo Xaa Tubka Nak,
lo yalnabeyy cheen xaa nu lo re kwaan gro kwaan mle xaa.
5 Dios mzaa ley lo Kob;
mzaa xaa ley lo Israel,
ngunabeyy xaa lo re xey be,
zee seed xaa re xtii xaa.
6 Zee labeyy re xtii xaa,
xaa nze gwluzh
nu re xinn xaa,
xaa gal nara
nu noka seed xaa re xinn xaa,
7 snee zee nzho mod wii re xaa lo Dios
nu nayenlazht xaa re kwaan mle Dios,
zee kozhaw xaa ley cheen Dios.
8 Nu nagakt gu mod re xey be,
xaa ned nu xaa nanzhont diizh,
nixa nanalit ngok xaa lo Dios
nu nanet xaa reke xaa tich xaa.
9 Re dii cheen Efraín nzo kwaan wez nu kwaan nkeeya,
per lee mbizh kwaan ngu dil zee nangwat xaa lo dil.
10 Nangozhawt xaa kwaan myaan xaa kwaan Dios,
nanzheklat xaa reke xaa tich xley xaa.
11 Tira myenlazh xaa re kwaan mle xaa
re kwaan gro kwaan mlu xaa.
12 Mle xaa re kwaan gro kwaan mlu lo xey be,
naz yizhyo Egipto,
naz wen cheen Zoán.
13 Mle xaa mxal nistoo mded re xaa.
Mkano xaa nis mod bla.
14 Mle xaa zee lee xkaw mbe xaa zhe,
nu lee yaal mbe xni bal xaa.
15 Yizhyo bizh mle xaa mroo nis cho ke,
nu mzaa xaa nis ngu re xaa axta paro nguzhe lextoo xaa.
16 Mloo xaa nal nis cho ke,
mle xaa nguzhe nis barank kwenta yuu.
17 Per nixa sbaaya,
lee re xaa mbare mle jwalt lo xaa,
per lee naz yizhyo bizh ngunayii xaa ne xaa Xaa Nzob Naz Yiba.
18 Zyen doo welt mle xaa preb Dios,
nu tubka ngunaab xaa kwaan nzhekla xaa gaw xaa.
19 Nii nawent xaa Dios nu mbezh xaa:
“¿Che nel nzho mod zaa Dios kwaan gaw be yizhyo bizh?
20 Leezha mzaa golp xaa cho ke,
zee mroo nis
nu nal doo nis mxo lo yizhyo.
Per,
¿che noka nzho mod zaa xaa yat gaw be?
¿Che noka nzho mod zaa xaa baal gaw be,
xaa nak yezh cheen xaa?”
21 Lee gorna mbin Xaa Tubka Nak kwaane;
zee ngunayii doo xaa ngune xaa Kob
nu mrixyan doo xaa ngune xaa Israel,
22 Nel namwiit xaa lo Dios,
nixa namlet xaa xgab lee xaa le yud xaa.
23 Nixa sbaaya axta naz yiba mxaal xaa xkaw,
nu mxal xaa roo yiba.
24 Mle xaa zee mla maná mod yey,
ndaw re xaa
nu mzaa xaa yat kwaan nyaad naz yiba ndaw re xaa.
25 Rese xaa ndaw yat cheen mandad;
Dios mxaal kwaan ndaw re xaa axta paro nguzhe lextoo xaa.
26 Naz yiba mxaal xaa mbi kwaan nze naz pa nlen mbizh
nu kwaan yalnabeyy cheen xaa mbiidno xaa mbi kwaan nze naz ta yat.
27 Sbaa mla baal lo re xaa modxa nla yide,
nu mla myin mod nzhi yux roo nistoo.
28 Dios mle zee mla ma garli xaa roo yoo ler
nu dub welt cho li re xaa.
29 Ndaw xaa nu axta nguzhe lextoo xaa
nu mzaa xaa kwaan nzoblazh re xaa.
30 Per nanyalot nyazhe lextoo xaa,
nzhoka kwaan nzhaw xaa roo xaa,
31 gorna lee yalnayii cheen Dios mzhin lo xaa
nu mbit xaa xaa mas ngezh lo xaa,
mbit xaa re xaa nonra lo re xaa Israel.
32 Ngulo mded re kwaane seetaka mle xaa jwalt;
nangwiit xaa lo re kwaan gro kwaan mle Dios.
33 Kwaanzee Dios mle ngut xaa modxa ngob xaa tub mbi
nu mlux yalnaban cheen xaa,
mded doo xaa re kwaan nakap.
34 Chelee Dios teed xaa bid zeesi kwaan xaa Dios;
bare xaa lo xaa nu tubka kwaan xaa xaa.
35 Mselazh xaa lee Dios nak ke kwaan nsaaw xaa,
lee Dios,
Xaa Nzob Naz Yiba,
mloo xaa lo yalgut.
36 Kwaan luzh xaa nu kwaan roo xaa,
nii xaa re yalkade.
37 Nanalit nzo xaa lo Dios
nu nixa nanlet xaa kwaan nyaan xaa lo Dios.
38 Per Dios mkano yalnles lo xaa,
mche xaa re xjwalt xaa nu namluuxt xaa xaa.
Zyen doo welt nanayiit xaa ne xaa xaa
nu namlet yalnayii gan lo xaa.
39 Mselazh xaa lee xaa nak baal,
nu nak xaa mod mbi kwaan tira nzha nu nambaretra.
40 ¡Lak welt nambint xaa xtizh Dios yizhyo bizh
nu mle nales xaa lextoo xaa!
41 Zyen doo welt mle xaa preb Dios;
nu mle nales xaa lextoo xaa Nambey cheen Israel.
42 Tira nanselazht xaa yalnabeyy cheen xaa,
mbizh kwaan mloo xaa xaa lo re xaa Egipto;
43 leezha mlu xaa re nseyn kwaan mle xaa Egipto
nu re kwaan gro kwaan mle xaa naz wen cheen Zoán.
44 Leezha mle xaa ngok nis ren re yuu Egipto
nu nangarlot ngo re xaa nis.
45 Leezha mxaal xaa ngeg zee mkeb ma re xaa
nu noka mxaal xaa ran,
ma mluux re xaa;
46 noka mxaal xaa ngwleyy,
ma ndaw xle cheen xaa
nu mbeso,
ma ndaw xkalgon xaa.
47 Yuuke mluux xkag ub xaa
nu lee yeg mluux xkag ig xaa.
48 Xkoon xaa nu xpakxiil xaa
ngut lo yuuke nu lo balngwzi.
49 Mxaal xaa yalnayii lo re xaa,
leezha nayii xaa,
mzhaal xyan xaa nu nales ngok lextoo xaa
¡nu mxaal xaa tub partid xmandad xaa mluux re xaa!
50 Mxal xaa xnaz yalnayii
nu namloot xaa xaa lo yalgut
nu mlaa xaa mla xaa lo yalzi.
51 Mle xaa ngut rese mad ngol yilo naz Egipto,
rese mad mkano xaa yilo garli Cam.
52 Mle xaa mroo yezh cheen xaa mod mbakxiil
nu mbe xaa xaa mod mbakxiil naz yizhyo bizh.
53 Mbe xaa xaa zee nyent cho gak xaa,
zee nazhebt xaa,
per lee re xaa nayii ne xaa mselaw xaa leen nistoo.
54 Dios mbe yezh cheen xaa yizhyo nambey,
re yi kwaan mle xaa gan kwaan yalnabeyy cheen xaa.
55 Mloo xaa stub naz yezh lo Israel
nu mdiiz xaa xkizhyo xaa lo re xtii xaa
nu mlaa xaa ngu re xtii Israel garli xaa.
56 Per lee re xaa mle preb Dios
nu nambint xaa xtizh Xaa Nzob Naz Yiba
nu namlozhawt xaa xtizh xaa.
57 Mle xaa leeka kwaan mle xuz xaa,
mlaa xaa Dios nu nangokt xaa nali;
nak xaa mod tub wez kwaan nyeet.
58 Mle xaa nayii Dios kwaan re mdo cheen xtios xaa
nu mle xaa nayii xaa ne xaa re maj kwaan chul mdexkwaa xaa.
59 Dios mbina nu nayii xaa
nu tira mlaa xaa Israel.
60 Mlaa xaa li xaa naz yezh Silo,
paro nzho xaa lo re xaa yizhyo.
61 Nu mlaa xaa yezh cheen xaa,
yezh kwaan mlu xaa yalnabeyy cheen xaa lo
nu mzaa kaj cheen trat lozhya re xaa nayii ne xaa.
62 Nayii doo xaa ne xaa yezh cheen xaa
nu mlaa xaa xaa zee gut xaa xaa kwaan spad.
63 Re xaa mad ngut lo bal;
nangut kant cheen yalnchelya lo re ngwnaa mad.
64 Xngwleyy xaa ngut kwaan spad
nu lee re xbyud xaa namlet kas.
65 Per lee Xaa Nabeyy nguxche mod tub xaa ngoot
nu mod tub xaa balyent,
xaa mbazhe lo yalguy,
66 Mle xaa gan lo xaa nayii ne xaa
nu tira mseton xaa xaa.
67 Namkayaat xaa dii cheen Che
nu nixa namleeyt xaa dii cheen Efraín;
68 sinka lee xaa mleey dii cheen Judá,
yi Jerusalén kwaan nkedoola xaa.
69 Mdexkwaa xaa li xaa,
kwaan nzeb ya doo mod yiba,
mod yizhyo mdexkwaa xaa simyent cheena tira.
70 Mleey xaa David,
xaa nak xmos xaa,
xaa mkanap mbakxiil;
71 mlaa xaa mbakxiil,
zee kanap xaa yezh cheen Kob,
zee gak xaa xaa nkanap Israel,
xaa nak xaa xaa.
72 David mkanap yezh cheen Dios kwaan dub lextoo xaa
nu kwaan yalnzhak mbe xaa xaa.