Nle xaa xgab lo yalnabeyy cheen Dios.
Salm kwaan mkee Asaf, nu mzaa xaaya lo Jedutún, xaa nabeyy lo re xaa nzholl.
77
Kwaan roo na nii na lo Dios,
Lo Dios nii na,
nel lee xaa gon xtizh na.
2 Kwaan na Xaa Nabeyy mbizh kwaan nales gak na;
lee yaal gorna nii na lo xaa,
zee tubka nlep na yaa na lo xaa
nu nyent yalnix lo na.
3 Nselazh na Dios nu nzhonn na,
nle na xgab xaa nu ngulo nguzha na.
{Mbaz}
4 Nanlaat lu gaa na;
nanet na cho kwaan le na nagarlotra nii na.
5 Mle na xgab re mbizh yilo
nu re liin kwaan mdedla.
6 Nselazh na re yaal kwaan mbill na
nu leen lextoo na nle na xgab nu nabdizh na:
7 ¿Che tira yenlazh Xaa Nabeyy na?
¿Che nakanotra xaa yalnles lo na?
8 ¿Che tira ngulo mlux yalnkela cheen xaa lo na?
¿Che tira ngulo mlux re kwaan myaan xaa lo na?
9 ¿Che nel myenlazh Dios re yalnles cheen xaa lo na?
¿Che nayii Dios,
zee nankanotra xaa yalnles lo na?
{Mbaz}
10 Zee nzhé na:
“Ne doo nzhak lextoo na,
leezha nle na xgab mzhee mod nak Xaa Nzob Naz Yiba,
nu nanlut xaa yalnabeyy cheen xaa lo na”.
11 Per selazh na rese kwaan mle Xaa Tubka Nak
nu selazh na re kwaan gro,
kwaan mle xaa re mbizh yilo.
12 Le na xgab rese kwaan mle lu,
nu yé na rese kwaan gro kwaan mle lu.
13 Dios,
nambey nak xnaz lu;
¿Cho dios narora lo Xtios be?
14 Lu,
nak Dios,
xaa nle kwaan gro doo;
nlu lu yalnabeyy cheen lu lo re yezh.
15 Kwaan yaa lu mloo lu yezh cheen lu,
re xtii Kob nu re xtii Che.
{Mbaz}
16 Dios,
gorna ngune nistoo lo lu;
nu mzheb doo nis ne lu.
Noka mgun nis kwaan nzhi mas nech.
17 Lee xkaw msela yey
nu lee yiba ngoch ngwzi
nu lee bal ngwzi mla dubse yizhyo.
18 Lee bi cheen ngwzi cheen lu nroo lo yey bi
nu lee bal ngwzi cheen lu mzaa xni lo yizhyo,
zee axta mgun yizhyo.
19 Mxal lu naz leen nistoo,
mded lu leen nistoo,
nixa namlut mded lu.
20 Ches nu Aarón,
mbe yezh cheen lu,
mod nkanap xaa mbakxiil.