Dios xaa nle gan lo dil
Salm kwaan mkee Asaf nu mzaa xaaya lo xaa nabeyy lo re xaa nzholl. Nu nzhaal gool xaaya kwaan bagwel.
76
Re xaa Judá nlabeyy Dios;
non xaa lo re be,
xaa Israel.
2 Naz Jerusalén nzob li xaa
nu pa nzho xaa nak Jerusalén.
3 Baa mluux xaa kwaan nkee wez
nu noka mluux xaa kwaan nak mod yiib kwaan nsaaw soldad,
spad,
nu re yiib cheen dil.
{Mbaz}
4 Xaa Nabeyy,
lu nak xni,
narora nak lu lo yi kwaan tira nak.
5 Mkiib xaa xcheen re soldad
nu mlaa xaa xaa mod tub xaa ngut;
nik tub re xaa nzhak ndil,
nyent mod lep yaa keeya.
6 Dios cheen Kob,
gorna mgalno lu xaa,
re karet nu re kabay ma nzob xaa tich mla lo yo,
7 ¡Zheb xaa ne xaa lu!
¿Cho nzho mod zoli delant lo lu,
leezha nxaal lu yalnayii cheen lu?
8 Axta yiba ngunaab lu kwent;
lee yizhyo mzheb nu zheta ngok,
9 Dios,
leezha nguxso lu zee ngunaab lu kwent
nu mle lu yud re xaa nales nzhak lo yizhyo ne.
{Mbaz}
10 Lee yalnayii cheen myet le zee wii xaa lo lu;
lee yalnayii cheen xaa bare lo lu mod korona.
11 Yaan gu kwaan Xtios gu,
Xaa Tubka Nak,
nu ble guya;
rese yezh kwaan nzhi gax nzhaal zheb ne Dios nu yiidno xaa gon zaa xaa lo xaa.
12 Lee xaa kiib balor lextoo re xaa nabeyy
nu zheb re rey yizhyo ne xaa.