Bi cheen yalnales
Salm kwaan mkee David nu mzaa xaaya lo xaa nabeyy lo re xaa nzholl. Nzhaal gool xaa kant ne kwaan ton cheen “yeey rus kwaan chul doo nlu”.
69
Dios,
le yud na,
nel mer yep na nis.
2 Kala na xan gozh pa mas nech
nu nyent pa zo nii na.
Mzhin na axta pa mas nech doo,
nu lee nis mbe na.
3 Ya ngulo nguzha na nkee na bi
nu tira mbezh yag yenn na.
Ngulola nguzha na,
kambaz na Xtios na.
4 Nzeyak zyen doo re xaa nayii ne na,
zyenra xaa ke yich yek na;
nayii xaa ne xaa na,
nixa nik tub kwaan namlet na
nu nzeyak zyen doo re xaa nayii ne na,
xaa nzhekla luux na,
nixa namlet na nik tub kwaan.
¿Chenel kix na kwaan namlewannt na?
5 Dios lu ne xomod ngok ned na;
nagarlot kaxlaan na re xjwalt na lo lu.
6 Xaa Nabeyy,
Xaa Tubka Nak,
Xaa Nkano Dubse Yalnabeyy,
nalaat lu ton re xaa ngwii lo lu lo re kwaan nle na.
Dios cheen re xaa Israel,
ke nagakt chop yek re xaa nkwaan lu lo re kwaan nle na.
7 Nel ngwii na lo lu,
zee nii nawent xaa na
nu nlu na kwenta xaa ngoo yalnto.
8 Nak na tub xaa zit lo re wech na
nu nanlabeyyt re xinn xnaa na na.
9 Nzhak selos na ne na xomod nle re xaa li lu;
lee re wdizh nawent kwaan ngunii xaa lo lu,
noka ngunii xaaya lo na.
10 Lee gorna nzhon na nu nkwan na,
zee nii re xaa nawent lo na.
11 Mla na xab na nu ngok na ler nadox,
lee nal nak na xaa xizhno re xaa.
12 Rese xaa nzob paro nkasa re xaa nii nawent na
¡nu axta nzholl re nguy na!
13 Xaa Tubka Nak,
lee na tubka ni lo lu.
Xtios na,
le yud na mbizh kwaan wen le lu xgab.
Nu kwaan gro yalnkela cheen lu,
¡keb lo na!
nu le lu yud na lo yalwli cheen lu.
14 Bloo na leen ban,
nu nalaat lu la na leen gozh.
Bloo na lo re xaa nayii ne na
nu leen nis pa nech doo.
15 Nalaat lu wee nis na;
nalaat lu la na leen baa
nu nixa tira saawa yek na.
16 Xaa Tubka Nak,
keb lo na,
nel wen doo nak yalnkela cheen lu;
wii lo na nel nlesla lu ne lu na.
17 Nakaxlaant lu lo na,
xaa nak xmos lu,
le prad bin kwaan nii na,
nel nales doo nzhak na.
18 Te gax lo na
nu bloo na lo re xaa nayii ne na.
19 Lu ne xomod nii nawent xaa na,
ngoo xaa xkalnto na nu nales doo ndeed na;
lu ne xana re xaa nayii ne na.
20 Re kwaan ngunii xaa lo na,
zee mle nales xaa lextoo na;
nyentra gan lextoo na nu nyentra jwers na,
nkambaz na xaa zaa yalnix lo na,
per nanguzhalt xaa.
21 Lee kwaan ndaw na,
mlo xaa kwaan leen
nu gorna ngok nzhek lextoo na,
zee mzaa xaa xis ub kwaan ni nguu na.
22 Nzhekla na leezha kayaw xaa lo yalni,
zee la xaa lo tub tramp nu ralnii xaa.
23 Gak nachool garlo xaa nu nik stub kwaan nayuntra lo xaa
nu noka tira gak nalen tich xaa dubse mbizh mban xaa.
24 Xaal yalnayii cheen lu lo re xaa;
lee yalnayii cheen lu zhin lo re xaa.
25 Garli xaa gak tub pa wen
nu nik tub xaa nayot baa.
26 Nel mrenal xaa xaa mseweey lu
nu nxizhno xaa yalne kwaan mseweey lu xaa.
27 Le kwaan nawent lo xaa kale kwaan nawent
nu nayot xaa lo kwaan nali.
28 Che le xaa lo yech cheen yalnaban,
nakeet lu le xaa paro nke le re xaa nali nak.
29 Per lee na nales nzhak nu ne doo na,
Xtios na,
wii lo na nu le yud na.
30 Gol na kant lo Dios kwaan yalnix,
nu za na dixkix lo xaa nel gro nak xaa.
31 Snee lee Xaa Tubka Nak gak nix lextoo,
masra gak nix lextoo xaa ke gorna teed xaa ngoon yeen lo xaa,
ma nkano kach nu nzhog.
32 Gorna ne re xaa nales kwaane,
zee gak nix lextoo xaa;
kwaan gu Dios zee wen yo gu.
33 Nel Xaa Tubka Nak nzhon xtizh re xaa nales nzhak
nu nkayaa xaa re xaa xaa,
xaa nzho lozhyib.
34 Yiba nu yizhyo gool lo Dios,
nistoo nu rese kwaan ngun loya.
35 Nel lee Dios le yud yezh Jerusalén
nu dexkwaa xaa re yezh Judá stuba.
Baa kwek xaa yezh
nu gak yizhyo xcheen re xaa.
36 Rese xtii xmos xaa kayaaya
nu rese xaa nkela xaa yo baa.