Dios cheen yi Sinaí nzho leen li xaa pa nzhul
Salm kwaan mkee David nu mzaa xaaya lo xaa nabeyy lo re xaa nzholl.
68
Dios,
ble yud nu lo dil,
zee reech re xaa nayii ne lu
nu xoon re xaa nzhaal xyan ne lu.
2 Dios,
ble yetlo re xaa modxa nyetlo zhen lo mbi
nu yaal xaa modxa nyall ser lo ki,
sbaa luux Dios re xaa nawent nak.
3 Per lee re xaa nali gak nix lextoo
nu gak nix lextoo xaa lo Dios
nu kee xaa briink kwaan yalnix.
4 ¡Gool be kant lo Dios lo lee xaa gool be salm!
Le non be Xaa Nzob Naz Yiba xaa kwaan nze tich xkaw.
¡Gak nix lextoo be zo be lo xaa;
le xaa nak Xaa Tubka Nak!
5 Xuz re ngwzeb nu xaa nkanap re byud,
nak Dios xaa nzho leen li xaa pa nzhul.
6 Dios nzaa tub pa yo re xaa nales nzhak,
nu koo xaa re xaa nzho lozhyib nu nzaa xaa kwaan wen lo xaa,
per lee lo re xaa ned zaa xaa yizhyo bizh yo xaa.
7 Dios,
leezha nguner lu lo yezh cheen lu,
leezha mze lu yizhyo bizh,
{Mbaz}
8 lee lo yizhyo mgun xog
nu naz yiba mroo yey
nu lee Yi Sinaí mgun delant lo lu,
Dios cheen re nu xaa Israel.
9 Dios,
mxaal lu nal doo yey;
zee mle lu wen ngok yizhyo bizh kwaan mzaa lu lo nu.
10 Lee re xaa yezh cheen lu,
xaa nak mod mbakxiil,
ngu yizhyo ne
nu lu,
Xtios na,
kwaan yalnkela cheen lu,
mzaa lu re kwaan nkin re xaa nales nzhak.
11 Lee Xaa Nabeyy mzaa wdizh
nu zyen doo ngwnaa mzaa kwent cheen re wdizh chul:
12 Mxonn re rey nu re xsoldad xaa
nu lee re ngwnaa mdiiz re kwaan mkiib xaa Israel lo re xaa nayii ne xaa.
13 Nixa mlake me pa nzho re ma,
noka re me yizo xiil palom kwaan ndeeb plat cho
nu xtoob ma nayech na kwaan ndeeb or cho.
14 Lee Dios,
Xaa Nkano Dubse Yalnabeyy,
mcheech re rey,
xaa ngok modxa nzhak yeg kwaan nla yek yi Salmón.
15 Yi Basán nak tub yi ndok;
re yi cheen Basán ya doo nzeb.
16 Re Yi Basán,
¿chozhiin ngwii gu kwaan yalnzoblazh,
lo yi pa mleey Dios yo xaa,
lo yi pa tira yo Xaa Tubka Nak?
17 Dios nkano zyen doo karet kwaan nya lo dil,
lee Xaa Nabeyy mroo nze naz Yi Sinaí,
zee zeeb xaa pa nak li xaa.
18 Lu,
Dios,
Xaa Tubka Nak,
leezha nguxoob lu naz leen yiba,
mbe lu re xaa mle lu gan lo re xaa nayii ne lu;
mkayaa lu re kwaan mzaa re xaa lo lu
nu axta cheen re xaa ned,
zee yo lu kwaan re xaa.
19 ¡Wen doo nak Xaa Nabeyy!
¡Rese mbizh nle xaa yud be,
Dios,
nak yalnaban cheen re be!
{Mbaz}
20 Xtios be nak tub Dios xaa nle yud be;
lee Xaa Tubka Nak,
Xaa Nabeyy,
koo be lo yalgut.
21 Dios wlipa seweey yek re xaa nayii ne xaa,
xaa seetaka nle re jwalt.
22 Lee Xaa Nabeyy né:
“Na ko lu Basán nu ko na lu lo nistoo pa nech,
23 Zee keeb lu nii lu kwaan ren cheen re xaa nayii ne lu
nu axta xpak lu go ren cheen xaa nayii ne lu.”
24 Xtios na,
nlu re xaa nzhake tich lu pa naz nze lu.
Lee re xaa nzhake tich lu pa naz nzha lu,
Xtios na xaa nak Xrey na,
nzha lu xnaz lu axta zeeb lu leen li lu.
25 Re xaa nzholl nzha delant,
lee xsaw nzha re ngwnaa mad,
me nzholl tambor chuut,
lee tras nzha re xaa nzholl bagwel.
26 ¡Gu,
dii cheen Israel,
nii wen gu lo Xtios be
nu lo Xaa Tubka Nak,
xaa nzo xsaw lo re be!
27 Baa nzha Benjamín naz delant lo re xaa,
xaa nak xaa mad lo re xaa,
re xaa non cheen Judá nzha xsaw lo re xaa
nu noka re xaa non cheen Zabulón,
nu re xaa non cheen Neftalí.
28 Xtios nu,
lu yalnabeyy cheen lu lo nu;
Dios laa wii nu lo re kwaan mle lu lo nu.
29 Kan leen yidoo cheen lu kwaan nzob naz Jerusalén mle,
zee lee re rey nzeno kwaan zelazh xaa lo lu.
30 Ble zee kwaz ma nakap,
lo yix kwaan nzeb roo yuu,
re yezh kwaan nak mod ngoon ma nayii nu re ngoon yeen.
Ble zee ton yezh zee zaa xaa re plat
nu reech re xaa lo dil.
31 Laa yiid re xaa non xaa Egipto lo lu
nu lee xaa Etiopía le prad kich yek lo Dios.
32 Re rey yizhyo,
¡bill gu lo Dios!
¡bill gu kant lo Xaa Nabeyy!
{Mbaz}
33 Bill lo xaa nzaa welt kwaan kabay naz leen yiba,
leen yiba kwaan tira nak,
lo xaa kwaan nii nye doo.
34 Blabeyy gu yalnabeyy cheen Dios,
xaa nlu yalnabeyy cheen xaa lo re xaa Israel
nu nlu yalnabeyy cheen xaa nzho naz leen yiba.
35 Leen li Dios nzob xaa kwaan gro yalnabeyy;
Dios cheen xaa Israel nzaa yalnabeyy nu yalngezh,
lo re xaa yezh cheen xaa.
¡Wen doo nak Dios!