Dios, blesla ne na
Salm kwaan mkee David, nu mzaa xaaya lo xaa nabeyy lo re xaa nzholl.
Gorna mchaal xaa Betsabé nu ngwa Natán, xaa nzaa kwent cheen Dios lo xaa.
51
Xtios na,
kwaan gro yalnkela cheen lu,
blesla lu ne lu na;
kwaan gro yalnkela cheen lu,
che jwalt cheen na.
2 ¡Ble nzhul na lo re kwaan nawent kwaan mle na
nu bche re jwalt cheen na!
3 Nel nzeen na mle na jwalt gro doo lo lu
nu lee jwalt cheen na tubka nzho lo na.
4 Lo lu,
nu nebse lo lu,
mle na jwalt,
mle na kwaan nawent lo lu.
Kwaanzee nali naab lu kwent
nu nagarlot nii na lee na wen nak.
5 Wlipa na,
lo kwaan nawent ngol na,
nzeebla na jwalt gorna nzhooka na lextoo xnaa na.
6 Wlipa lu nkela xaa nali nak
nu naab na lo lu zaa lu yalnzhak nu laya axta leen lextoo na.
7 Ble nzhul na kwaan yix cheen hisopoa zee gak nzhul na;
le nzhul na,
zee na na rusra ke yeg.
8 Ble zee gak nix lextoo na,
ble nix na stuba,
nixa mle byog lu na.
9 Nawiit lu lo jwalt cheen na
nu bche rese jwalt cheen na.
10 Dios,
ble nzhul lextoo na
nu ble kub mbi naban cheen na,
zee gak nali na,
11 Nabachit lu lo na
nu nakiibt lu Mbi Naban cheen lu lo na.
12 Ble zee yo yalnix cheen yalnaban cheen lu lo na
nu zo tub mbi wen kanap na.
13 Snee lu na xnaz lu lo re xaa ned,
zee lee re xaa nzeb jwalt bare lo lu.
14 Dios,
bloo na zee nayeta na,
Dios,
xaa nak yalnaban cheen na
nu lee roo na nii kwaan nali.
15 Xaa Nabeyy xal roo na,
zee kwaan roo na gol na lo lu.
16 Nel nanzheklat lu gon kwaan za na,
nixa nanzheklat lu gon kwaan zek na mdo.
17 Lee gon kwaan nzhekla lu nak lextoo xaa ne doo nzhak;
Dios,
lu nanlaat xaa nales nzhak lextoo nu xaa ne doo nzhak lextoo.
18 Ble wen lo yezh Jerusalén,
nel wen nak lu
nu bdexkwaa re bla cheen Jerusalén.
19 Zee gak nix lextoo lu lo re gon kwaan yizo lu,
gon kwaan zeek xaa lo mdo nu re gon kwaan nguk
nu lo mdo cheen lu zeek xaa ngoon yeen.