Dios naab kwent lo yizhyo
Salm kwaan mkee Asaf.
50
Xaa Tubka Nak,
nak Dios lo rese dios,
lee xaa ngunii
nu mbezh xaa re myet yizhyo
axta paro nlen mbizh nu axta paro nyaaz mbizh.
2 Dios nzaa xni axta Jerusalén,
yezh chul.
3 Xtios be nze kwaan bi;
tubka nzeno xaa bal delant lo xaa kwaan luux re kwaan,
dub welt lo xaa nroo mbi dox.
4 Axta naz ya,
Dios mrezh yiba nu yizhyo,
zee naab xaa kwent lo yezh cheen xaa:
5 “Toop gu re xaa na,
xaa nali nak
xaa myaan kwaan na,
leezha mted xaa ma lo na”.
6 ¡Lee re kwaan nzho yiba nzaa kwent nali nak Dios,
nel lee Dios nak xaa naab kwent!
{Mbaz}
7 Kenzha Israel,
yezh cheen na;
lee na nii tub kwaan klar nak lo lu.
Na nak Dios.
Na nak Xtios lu.
8 Nagalnot na lu,
lo re ma nted lu lo na
nu nixa re gon kwaan nzek xaa lo mdo.
9 Nakayaat na ngoon yeen xinn xkoon lu,
nixa chib mach ma nzho leen xkorel lu,
10 nel xma na nak rese ma nzho pa nzeb re yag ndok
nu rese ma nzho yi chuut.
11 Nlabeyy na rese myin,
ma nzho yi
nu rese ma ngun,
ma nzho wen nak xma na.
12 Chelee na gak nlaan na nanit naya lo lu,
nel xcheen na nak dubse yizhyo nu re kwaan nzho leena.
13 Nanzhawt na baal ngoon
nu nixa nanzhot na ren cheen chib mach
14 Mas wen zaa lu dixkix lo Dios mod tub gon
nu le lu re kwaan né lu le lu lo na,
Xaa Nzob Naz Yiba.
15 Brezh na gorna nales nzhak lu;
na ko lu lo yalnales cheen lu zee le non lu na.
16 Per lo xaa nakap nii Dios:
“Nyent mod wdizh lu ley cheen na
nu zeet lu kwaan myaan na.
17 Nanzheklat lu seli na lu
nu nanzheklat lu gon lu xtizh na.
18 Chelee lu wii lu lo tub wann nu ya lu kwaan lee xaa,
zee nak lu xmig xaa nchaal stub ngwnaa.
19 Gorna nzhedizh xaa re kwaan nawent kwaan nzhedizh lu
nu kwaan roo xaa tubka nkade xaa.
20 Nzob lu nzhedizh lu nawent nak wech lu
nu kwaan roo lu nii lu nawent nak wech lu.
21 Mle lu kwaane nu nanguniit na;
mle lu xgab lal nak na mod lu,
per lee nal galno na lu
nu sneepa ni naya lo lu.”
22 Bin gu kwaan nii na,
xaa myenlazh na,
napa le byog na gu nu nyent cho nzho mod le yud gu.
23 Loka xaa gool lo na,
nak xaa le non na;
na le yud xaa nze xnaz na
xaa zee lu na yalnaban cheen Dios lo.