Nawent wii xaa lo kwaan yizhyo
Salm kwaan mkee re xtii Coré nu mzaa xaaya lo xaa nabeyy lo re xaa nzholl.
49
Kenzha gu kwaane,
re gu xaa rese yezh;
bin gu kwaane,
re gu xaa nzho dubse lo yizhyo,
2 rese xaa nanont nu rese xaa non,
sbaaka rese xaa prob nu rese xaa rik.
3 Lee na nii kwaan yalnzhak
nu yé na re yalnzhak kwaan nle na xgab.
4 Gon na re kwaan nii yalnzhak
nu kwaan bagwel kwaan nkano chii yib gol na re kwaane,
kwaan nabix nak.
5 ¿Chozhiin zheb na gorna zhin kwaan nakap
nu gorna zo na saw lo re xaa nayii ne na?
6 Per lee re xaa ne ngwii lo kwaan nzhap xaa
nu nto xaa yalxwa lo re kwaan nkano xaa.
7 Nyent cho nzho mod zii stub xaa lo yalgut,
nixa zii xaa yalnaban cheen xaa lo Dios.
8 Non doo yalnaban cheen myet,
nyent cho nzho mod ziiya.
9 Nyent xaa ban tira,
rese xaa yet.
10 Nlu lal nzhet rese xaa;
lal nzhet xaa nzhak nu xaa nagakt nu xaa ned
nu lee re xcheen xaa nlake lo stub naz xaa.
11 Nixa mzob le xaa lo xkizhyo xaa,
per lee garli xaa gak leen baa
nu baa tira yo xaa.
12 Tira nandiit myet,
nixa non xaa
nu yet xaa kwenta re ma.
13 Snee nlux xnaz xaa nachan,
xaa nkwaan leeka xnaz,
per nixa sneeya lee re xtii xaa nyula re yalnzhak cheen xaa.
{Mbaz}
14 Mod mbakxiil ma nakla diizh la leen baa;
lee yalgut wee xaa ba mod tub xaa nkanap mbakxiil leen baa.
Per lee xaa nali nabeyy lo xaa gorna kaxni yizhyo.
Nu lee xkwerp xaa lux leen xpaa xaa,
pa zit doo lo yoo chul cheen xaa.
15 Nu lee Dios koo na lo yalnabeyy cheen yalgut,
nel lee xaa wee na lo xaa.
{Mbaz}
16 Nazhebt lu ne lu re xaa nzeyak rik,
gorna nzeyak chulra garli xaa,
17 nel gorna yet xaa naweet xaa nik tub kwaan,
nel rese xcheen xaa kwaan chul naweet xaa leen baa.
18 Nixa nix doo nzhak lextoo xaa gorna mban xaa
nu lee re xaa mbezh wen xaa,
nel nzen xaa demi,
19 per zhin mbizh lee xaa yet nu nya xaa lo re xey xaa
nu tira nanetra xaa lo xni mbizh.
20 Per lee myet nandiit xche,
nixa rik xaa,
kwenta re ma nzhet xaa.