Kwaan chul cheen Jerusalén yezh cheen Dios
Salm nu kant kwaan mbill re xtii Coré.
48
Xaa Tubka Nak,
gro doo nak lu
nu lu nzhaal yalzo kwaan gool xaa,
yezh cheen Xtios be nu yi nambey cheen xaa.
2 Chul nak yek yi cheen Jerusalén,
yezh cheen rey,
kwaan nzhi naz ta ya,
nel leeya nak yalnix cheen dubse yizhyo.
3 Dios nzo leen yoo ndok kwaan nzob Jerusalén;
Dios mlu lo be mod tub yoo ndok kwaan nsaaw be.
4 Lee re rey,
xaa nzho lo yizhyo,
mzhaal
nu tubka mzhaal xaa ngwa xaa lo yezh zee dil xaa.
5 Nu gorna mwii xaa loya mdedyall xaa,
mzheb xaa nu liger doo mxonn xaa.
6 Mkano xaa yalnacheb;
modxa nkano ngwnaa yalne gorna nzhal xinn me,
7 kwaan mbi dox kwaan nze naz ta nlen mbizh mluux lu bark cheen Tarsis.
8 Modxa mbin beya,
sbaa ngune beya,
yezh cheen Xaa Tubka Nak,
Xaa Nkano Dubse Yalnabeyy,
yezh cheen Xtios be,
¡lee xaa le zee tira yo yezh!
9 Dios,
leen yidoo cheen lu mselazh nu kwaan yalnkela cheen lu.
10 Dios,
xaa nzo re pa mas zit lo yizhyo,
nzholl xaa lo lu,
modxa nzhaal yalzo luya.
Kwaan yalnabeyy nle lu kwaan nali.
11 Gak nix yi Jerusalén;
gak nix re xchaap Judá,
nel nali naab lu kwent.
12 Bze gu dubse yi Jerusalén nu bzaa gu welt dubse pa nabeyya
nu lab gu re yoo ndok cheen na;
13 blaach wen gu lo bla cheen yezh nu re yoo ndok pa nsaaw xaa,
zee nzho mod zaa gu kwenta lo re xaa nze gwluzh.
14 Nel Dios ne nak Xtios be,
nal nu tira,
nel Xtios be luu naz lo be tira.