Dios, nak Rey lo dubse yizhyo
Salm kwaan mkee re xtii Coré.
47
¡Rese yezh,
chaal gu yaa gu!
¡Bill gu lo Dios kwaan yalnix!
2 Nel lee Xaa Tubka Nak,
Xaa Nzob Naz Yiba,
zheb re myet ne xaa,
Na xaa nak rey naro lo dubse yizhyo.
3 Lee xaa mle zee mle be gan lo re yezh
nu mzaa xaa re yezh lo be.
4 Lee xaa mleey yizhyo kwaan nyizo be,
re kwaan chul cheen Kob,
xaa mkela xaa.
{Mbaz}
5 ¡Dios,
Xaa Tubka Nak,
nguxoob xaa paro nabeyy xaa,
kwaan yalnix nu kwaan bi cheen trompet!
6 ¡Gool be,
gool be kant lo Xtios be!
¡Gool be,
gool be kant lo Rey cheen be!
7 Nel Dios,
nak Rey lo dubse yizhyo.
Gool be kwaan yalnzhak lo xaa.
8 Dios nabeyy lo rese yezh;
Dios nzob pa nambey,
pa nabeyy xaa.
9 Rese xaa non lo rese yezh mkasa,
mod yezh cheen Xtios Abraham.
10 Cheen Dios nak rese yalnabeyy kwaan nzho lo yizhyo.
¡Non doo xaa!