Xaa Tubka Nak nkanap be
(Salm kwaan mkee re dii cheen Coré nu mzaa xaaya lo xaa nabeyy lo re xaa nzholl. Alamota.)
46
Dios nak xaa nkanap be
nu nak xaa yalngezh cheen be,
listla nzo xaa le xaa yud be lo reta yalzi.
2 Kwaanzee nazhebt be ne be nik tub kwaan,
nixa gun yizhyo,
nixa la re yi axta naz xan nistoo,
3 nixa kwezh nistoo nu kita
nu nixa xiz re yi nel nakap nzhak nistoo.
{Mbaz}
4 Nzho tub yuu kwaan nded leen yezh cheen Dios zee chul nluya,
leen li lu,
pa nzhul pa nzho Xaa Nzob Naz Yiba.
5 Dios nzho leen yezh
nu kwaanzee tira nangunta.
Dios nle yud gorna nzelo stub mbizh.
6 Nayii re yezh nu nxiz re rey,
nel Dios nii lee yizhyo lux.
7 Lee Xaa Tubka Nak,
Xaa Nkano Dubse Yalnabeyy,
nzo kwaan re be;
lee Dios cheen Kob nak mod tub yoo ndok kwaan saaw be.
{Mbaz}
8 Te gu,
gwii gu lo re kwaan mle Xaa Tubka Nak
rese kwaan mle xaa lo yizhyo,
kwaan mdedyall re myet.
9 Msaaw xaa lo re dil kwaan nzho lo dubse yizhyo,
mdiich xaa re wez
nu mdiich xaa re stak cheen re soldad
nu mzek xaa re xkaret re soldad.
10 ¡Zheta gok gu nu bzeen gu lee na nak Dios!
¡Na gak xaa non lo rese yezh!
¡Na gak xaa non lo rese xaa yizhyo!
11 Lee Xaa Tubka Nak,
Xaa Nkano Dubse Yalnabeyy,
nzo kwaan re be;
lee Dios cheen Kob nak mod tub yoo ndok kwaan saaw be.
{Mbaz}