Gool xaa lo yalnchelya cheen rey
Salm kwaan mkee re xtii Coré nu mzaa xaaya lo xaa nabeyy lo re xaa nzholl, zee seed xaa re myet nu nzhaal gool xaaya xomod nzholl xaa kant cheen “yeey kartuch”, gorna nchelya xaa. Maskila.
45
Nzhal wdizh chul lextoo na;
lee roo na nak kwenta lap kwaan nkee xaa nzhak
nu gol na xkant na lo rey.
2 Nak lu xaa mas chul nlu lo xinn re myet,
Nzhak doo lu nzhedizh lu,
kwaanzee Dios tubka nii wen lo lu.
3 Kwaan yalngezh nu kwaan yalnabeyy cheen lu,
nye kee spad roo len lu,
xaa nanzhebt.
4 Wen yo xaa lo yalnix cheen lu
nu wee xaa xtizh lu kwaan wli
nu nali le xaa kwaan lo re xaa nadoo nak.
Lee yalnabeyy cheen lu nle kwaan ndedyall re myet ngwii lo.
5 Lee re xaa nla lo yo gorna nzhal xaa xkwez lu,
gorna nzhala lextoo re xaa nayii ne rey.
6 Dios,
lee pa nabeyy lu tira nak nu tubka nak,
leeya nak tub yalnabeyy kwaan nali.
7 Mkela lu re kwaan nali nu nayii lu ne lu re kwaan nawent;
kwaanzee lee Dios,
xaa nak Xtios lu,
mchub xaa nseyt yek lu,
zee nabeyy lu
nu mle xaa mas chul gak lextoo lu ke lextoo re wechxinn lu.
8 Lee dub cho xab lu nze bech perfum cheen yag mirra,
aloe nu kanel
nu axta pa nabeyy lu,
pa ndexkwaa kwaan marfil,
nzhon xaa re xaa nzholl bagwel,
kwaan nix nle lextoo xaa.
9 Xchaap re rey nzho pa nzo lu
nu lad li pa nzo lu,
nzo me nabeyy,
me nak ler or kwaan chul doo nlu.
10 ¡Xchaap,
wen kenzha kwaan nii na lo lu!
Byenlazh lazh lu nu garli xuz lu,
11 nel nyula rey mod nzhak lu,
nel lee xaa nak xaa nabeyy lo lu,
nzhaal gon lu xtizh xaa.
12 Lee re xchaap Tiro yiidno kwaan zelazh me lo lu,
nu lee re xaa mas rik kwaan lu,
zee kwi wen xaa kwaan lu.
13 Chul doo nlu xchaap rey,
gorna nzo me garli me
nu lee dub cho xab me nke or kwaan chul doo nlu.
14 Kwaan bestid chul doo wee xaa me lo rey
nu ya re me zer ka xaabyi kwaan lee me
nu rese me nyen me yiidno me lo lu.
15 Reep me pa nabeyy rey
nu kwaan yalnix zhin me.
16 Lee pa ngunabeyy re xey lu,
gak pa nabeyy re xinn lu,
xaa le non lu lo dubse lo yizhyo,
17 Na le zee selazh re xaa le lu lo rese dii
nu tira gool re yezh lo lu.