Ngunaab xaa yud lo Dios
Salm kwaan mkee re xtii Coré nu mzaa xaaya lo xaa nabeyy lo re xaa nzholl zee seed xaa re myet. Maskila.
44
Dios,
kwaan nzha nu mbin nu,
re kwaan mzaa re xey nu kwent,
re kwaan gro kwaan mle lu yilo
nu re kwaan mle lu re mbizh yilo.
2 Kwaan yaa lu mloo lu re yezh
nu mted lu re yezh ne bid
nu nee mzaa lu ngu re xey nu
nu mzelazh lu re kwaan wen lo xaa.
3 Naleet kwaan yaa xaa,
nixa naleet kwaan spad mle xaa gan yizhyo ne;
sinka yalnabeyy cheen lu nu xni cheen lu,
nel lu nkela xaa.
4 Nebse lu nak Xtios na nu rey cheen na,
ble yud yezh cheen Kob,
zee le xaa gan lo dil.
5 Kwaan lu zee mle nu gan lo re xaa nayii ne nu;
kwaan le lu,
zee mtaazh nu tich re xaa nchaldil nu.
6 Nangwiit na lo xkwez na,
nixa naleet spad na le yud na,
7 nel lu mle yud nu lo re xaa nayii ne nu,
le lu zee ton re xaa nayii ne nu.
8 Tubka gak nix lextoo be lo Dios
nu tubka gool be lo xaa.
9 Per mlaa lu nu,
nu mlaa lu mton nu,
nel nanyatra lu kwaan re xsoldad nu.
10 Mle lu zee mxonn nu lo xaa nayii ne nu,
mle xaa gan mlewann xaa nu,
nu mbe xaa re kwaan nzhekla xaa.
11 Mle lu nu mod mbakxiil,
ma nzhut xaa
nu mle lu zee mreech re nu lo re yezh yizhyo.
12 Nanont mto lu yezh cheen lu,
¡nik tub gaay namlet lu gan lo kwaan mto lu!
13 Mle lu zee nii nawent re yezh kwaan nzho gax lo nu;
mle lu zee nxizhno xaa nu,
nu nii nawent re xaa nu.
14 Mle lu zee nxizhno re xaa yezh nu
gorna ne xaa lo nu,
rese xaa nto yalxwa lo nu.
15 Tubka nton na,
ya ngulo ngok nachan na lo yalnto,
16 lo re kwaan nge re xaa lo na,
lo re kwaan nle re xaa nayii ne na.
17 Nixa ngok re kwaane lo nu,
per zer yenlazh nu lu,
nixa namlaat nu kwaan myaan be;
18 zer le nu xgab laa nu lu,
nixa zer laa nu xnaz lu;
19 per lu,
mlebi nu leen yeer pa nzho mbew
nu msaaw lu nu kwaan xkal cheen yalgut.
20 Chol yenlazh nu le lu,
xaa nak Xtios nu,
nu gool nu lo stub naz re maj,
21 ¿Che nanet Dios re kwaane?
Kwaan lu nlabeyy rese kwaan nzholaan leen lextoo nu.
22 Per lu nle zee yizata mbizh nzhut xaa nu;
nle lu nu mod tub mbakxiil,
ma nzhut xaa.
23 Xaa Nabeyy,
wii,
¿chozhiin naxna lu?
Nabachit lu lo na tira.
24 ¿Chozhiin nkaxlaan lu lo nu?
Nu ¿chozhiin nyenlazh lu nu,
nel tubka nded nu bid?
25 Tira ngulo mle xaa gan lo nu,
tira ngulo nguyo nu.
26 Wii nu te le yud nu,
bloo nu lo re xaa nayii ne nu,
kwaan gro yalnkela cheen lu.