Naab xaa zee le Dios yud xaa
43
¡Xtios na,
ble kwaan nali lo na
nu le yud na!
¡Bloo na lo re xaa yizhyo,
lo re xaa nkade nu lo re xaa nakap!
2 Lu nak Xtios na nu nak lu yalngezh cheen na,
¿Chozhiin mlaa lu na?
¿Chozhiin gak nales na lo re xaa ntezi na?
3 Xaal xni cheen lu nu kwaan wli lo na
nu leeya luu naz lo na,
axta garli lu paro nzho lu,
kwaan wee na lo yi cheen lu kwaan nambey.
4 Bii gax na lo mdo cheen Xtios na,
Dios,
xaa nak yalnix cheen na.
Dios,
Xtios na,
gol na lo lu kwaan bagwel kwaan nkano chii yib.
5 ¿Chozhiin nzhak nales na?
¿Chozhiin nle doo na xgab?
Nebse Dios nkambaz na,
nel seesa nzhaal gol na lo xaa.
¡Lee xaa nak Xtios na!
¡Lee xaa nak yalnaban cheen na!