Yech chop
Yizhnzhek cheen Dios
Kwaan mkee re xtii Coré nu mzaa xaaya lo xaa nabeyy lo re xaa nzholl. Maskila.
42
Mod mzhin ma nayetra lo yizhnzhek,
nkwaan ma yuu pa go ma nis,
sbaa nkwaan na lu,
Xtios na.
2 Nkano na yizhnzhek cheen Dios,
xaa nak Dios,
xaa tubka mban.
¿Cho gor bare na zo na lo Dios?
3 Nis nzhon na nak yat kwaan nzhaw na zhe nu yaal,
gorna nabdizh re xaa lo na re mbizh:
“¿Ma Xtios lu?”
4 Gorna nle na xgab re kwaane,
zee nales doo nzhak lextoo na;
nselazh na gorna ngwa na kwaan re xaa,
gorna ngwano na re xaa axta garli Dios,
kwaan bi cheen yalnix nu cheen kwaan mbill nu
nu ngu nu tub yalni gro doo.
5 ¿Chozhiin nzhak nales na?
¿Chozhiin nle doo na xgab?
Nebse Dios nkambaz na,
nel seesa nzhaal gol na lo xaa.
¡Lee xaa nak Xtios na!
¡Nu lee xaa nak yalnaban cheen na!
6 Xtios na,
nyentra gan lextoo na,
kwaanzee nselazh na lu;
axta yizhyo cheen Jordán,
nu yizhyo cheen Hermón,
nu yi cheen Mizar.
7 Nlu nyubi nistoo
nu tira nya bi cheena
nu lee nistoo cheen lu kwaan ngit doo mded tich na.
8 Per lu,
Xaa Tubka Nak,
dubse zhe xaal lu yalnkela cheen lu lo na
nu lee yaal nxaal lu kant cheen lu gol na
nu mdizhno na Xtios na.
9 Yé na lo Dios,
xaa nak ke kwaan nsaaw na:
“¿Chozhiin myenlazh lu na?
¿Chozhiin nzhaal gak nales na nu deed na bid lo re xaa nayii ne na?”
10 Nzen tub yalne lo zhit cheen na,
gorna lee re xaa nayii ne na nu nxizhno xaa na,
nu nabdizh re xaa lo na:
“¿Ma Xtios lu?”
11 ¿Chozhiin nzhak nales na?
¿Chozhiin nle doo na xgab?
Nebse Dios nkambaz na,
nel seesa nzhaal gol na lo xaa.
¡Lee xaa nak Xtios na!
¡Nu lee xaa nak yalnaban cheen na!