Naab xaa zee gakwen xaa
Salm kwaan mkee David, nu mzaa xaaya lo xaa nabeyy lo re xaa nzholl.
41
Wen xaa nle xgab re xaa prob;
lee mbizh nakap zee le Xaa Tubka Nak yud xaa.
2 Lee Xaa Tubka Nak kanap xaa
nu zaa xaa yalnaban lo xaa
nu wen yo xaa lo yizhyo
nu nalaat xaa xaa lo xaa nayii ne xaa.
3 Lee Xaa Tubka Nak,
zaa yalngezh lo xaa gorna gak ne xaa
nu sekwen xaa xaa lo yalne cheen xaa.
4 Na nzhé:
“Xaa Tubka Nak,
blesla lu ne lu na;
sekwen na,
nixa mle na jwalt lo lu”.
5 Lee re xaa nayii ne na,
nzhedizh nawent na nu nabdizh xaa:
“¿Cho gor yet xaa nu cho gor yenlazh be xaa”?
6 Lee gorna nyiidsewii xaa lo na,
zee nebse nkade xaa
nu nebse ntoop xaa diizh,
lee gorna nya xaa,
zee nzhedizh xaaya.
7 Nkasa re xaa nayii ne na nu nii nawent xaa na
nu nle xaa xgab kadeed na bid kwaan leeka xjwalt na
nu mbezh xaa:
8 “Lee xkyalyizh xaa nak kwaan nakap;
tira nzho xaa loon nu nabaretra xaa yixche xaa.”
9 Nixa re xaa ngok xmig na,
xaa wen nak,
xaa myenn na,
xaa ndaw kwaan na ngok xkontrad na.
10 Per lu,
Xaa Tubka Nak,
blesla lu ne lu na,
ble zee yixche na,
zee za na kwaan nkin xaa.
11 Snee,
zee ne na ke nix gak lextoo lu ne lu na,
nu naletra re xaa nayii ne na gan lo na zee naxizhnotra xaa na.
12 Bzen na kwaan yaa lu
nu ble zee tubka zo na delant lo lu,
nel nali nak na lo lu.
13 ¡Wen doo nak,
Xaa Tubka Nak,
Xtios re be,
xaa Israel,
naaze,
nalzhe nu rese mbizh!
Sbaa naka nu sbaa gaka.