Naab xaa zee kanap Dios xaa
Salm kwaan mkee David, nu mzaa xaaya lo xaa nabeyy lo re xaa nzholl.
40
Nkambaz na Xaa Tubka Nak
nu lee xaa mkichyek lo na nu mbin xaa re kwaan ngunii na
2 nu mloo xaa na leen baa cheen yalgut
nu mloo xaa na leen ban nu leen gozh;
zee mzo xaa nii na lo ke
nu mzo xaa na tub pa nyent cho gak na.
3 Mseed xaa na tub kant kub,
kant kwaan gool xaa lo Dios,
zyen doo xaa mwii kwaane nu mzheb xaa
nu mwii xaa lo Xaa Tubka Nak.
4 Wen xaa ngwii lo Xaa Tubka Nak
nu nangwiit xaa lo xaa nto yalxwa nu nkade
nu nixa nagwiit xaa lo maj.
5 Lu,
Xtios na,
Xaa Tubka Nak,
mle lu xgab nu;
zyen doo kwaan gro mle lu
nu nagan doo zeet xaa reya
nzhekla na yé naya,
¡per zyen dooya!
6 Nankint lu ma teed xaa lo lu nu nixa gon;
per lu mle nzhon na diizh;
nixa nanaabt lu zeek xaa ma lo lu
nu nixa nanaabt lu gon kwaan zeek xaa lo mdo,
ma teed xaa zee zhe jwalt.
7 Kwaanzee nii na:
“Lee na neeka”;
modxa nzaa yech kwent cheen na.
8 Xtios na,
nzhekla na le na kwaan nzhekla lu,
Lee ley cheen lu nzho leen lextoo na.
9 Mza na kwent kwaan nali lo zyen doo xaa;
Xaa Tubka Nak,
lu ne wen namkaxlaant naya.
10 Namlolaant na kwaan nali cheen lu leen lextoo na;
ngunii na wli nak lu nu xomod mle lu yud na.
Namkaxlaant na yalnkela cheen lu nu kwaan wli cheen lu lo re xaa yezh.
11 Xaa Tubka Nak,
nalaat lu na nu blesla lu ne lu na;
yalnkela cheen lu nu kwaan wli cheen lu tubka nkanap na.
12 Zyen doo kwaan nawent nzha deed na,
ngulo mzhaal re jwalt lo na
nu axta mchool garlo na,
nixa nagarlotra ko na kwenta,
zyenraya ke lo yichyek na
nu nyentra gan lextoo na.
13 Xaa Tubka Nak,
naab na lo lu:
“¡Te,
zee sela lu na!”
Xaa Tubka Nak,
¡zoza te le yud na!
14 Ton re xaa nu gan re xaa nzhekla gut na;
bzare re xaa nu btexonn re xaa nzhekla keeya yek na;
15 xoon re xaa nu ton re xaa,
re xaa nxizhno na.
16 Rese xaa nkwaan lu kano yalnix nu gak nix xaa,
xaa nkela lu,
nel nle lu yud xaa tubka yé re xaa,
“¡Aka gro nak Xaa Tubka Nak!”
17 Prob na nu nales doo nzhak na nu nyent kwaan lo na,
Xaa Tubka Nak,
ble xgab na,
lu nak yud cheen na nu nlesla lu ne lu na.
¡Xtios na nagakt lu tras!