Cheepse mban myet
Salm kwaan mkee David, nu mzaa xaaya lo Jedutún, xaa nabeyy lo re xaa nzholl.
39
Nzhé na:
Kanap na na,
zee naletra na jwalt kwaan roo na;
saaw na roo na nu naniitra na kwaan nawent,
gorna zo xaa nawent lo na.
2 Nu mle na kwenta xaa muud nu zheta ngok na.
¡Nixa nanguniit na kwaan wen!
Per lee yalne cheen na ngok narora.
3 Nu lee na mrixyan,
Nel mle na xgaba nu mzhiib tub xchoog lextoo na,
zee ngunii na dublegan:
4 Xaa Tubka Nak,
ble zee ne na,
nen xomod yilo deed na
nu zlak mbizh ban na,
zee ne na cheepse ban na.
5 Lu mzaa lakse liin ban na
nu tira nangokt non re liin cheen na lo lu.
¡Nebse kwenta ngob xaa tub mbi nak re myet!
{Mbaz}
6 Wlipa kwenta xkal nze re myet lo yizhyo,
wlipa nanont kano xaa kwaan;
nel nanet xaa cho lo lakeya.
7 Xaa Nabeyy na,
¿cho kwaz na nal?
¡Kwaan nebse lu kambaz na!
8 Loo na lo re xjwalt na;
nalaat lu xizhno re xaa ned na.
9 Mle na kwenta muud nu namxalt na roo na,
nel lu nak xaa mleya.
10 Kiib yalzi cheen lu lo na,
kalux na lo re golp cheen lu.
11 Lu nseli na gorna nted lu na bid lo re xjwalt na
nu nke mbaz re kwaan nkela na,
¡Nebse kwenta ngob xaa tub mbi,
nak re myet.
{Mbaz}
12 Xaa Tubka Nak,
kenzha kwaan nii na
nu binn kwaan nii na.
Ble tub kwaan lo yalnales cheen na.
Nel xaa zit nak na lo lu,
nebse nzha deed na nee,
mod re xey na xaa yilo.
13 Laa nayiit lu ne lu na,
zee bare na gak nix lextoo na,
gorna zeraka yet na nu la na yizhyo ne.