Ngunii xaa lo Dios kwent cheen re xjwalt xaa
Salm kwaan mkee David zee selazh xaa.
38
Xaa Tubka Nak,
naselit lu na kwaan yalnayii cheen lu
nu nixa nateedt lu na bid kwaan yalnayii cheen lu.
2 Ngwaaz kwaan nkee xkwez lu cho na
nu kwaan yaa lu mkee luya yek na.
3 Dubse na ne lo yalnayii cheen lu,
rese xchit na nawent kwent cheen re jwalt cheen na.
4 Ngulo nguzhe re jwalt cheen na yek na,
nak tub kwaan nga doo kwaan nayetra yek na lo.
5 Lee yeezh cheen na nzhech nu ndexlaa,
nel tira ngok ned na.
6 Ya ngulo nguzha na kadeed na bid,
rese mbizh nales doo nzhak na,
7 nebse xchoog mbil tich na lo xlee,
dubse na ne nzak,
8 dubse na ngulo nguguuzh nu ne doo na
nu mbezhyizh doo na.
9 Xaa Nabeyy,
lu nlabeyy rese kwaan nzoblazh na
nu ne lu xomod nzi lextoo na.
10 Nebse nxiz lextoo na lo re kwaan nawent
nu nyentra jwers na,
nu nixa nanyanitra garlo na.
11 Xmig na nu re xaa nyen na mbachi zit lo yeezh cheen na
nu re sawlizh na mbachi zit lo na.
12 Xaa kwaan nzhekla gut na nzob xaa tramp zee yiga na
nu nkwaan xaa zee luux xaa na,
nu rese mbizh nkwaan xaa kwaan nawent gaazh xaa tich na.
13 Per lee na nle mod tub xaa nkwee,
xaa nanzhonta
nu nle na mod tub xaa muud zee nankebt na lo xaa.
14 Nle na mod tub xaa nanzhonta
nu nixa nagarlot keb na.
15 Na,
nkambaz lu,
Xaa Tubka Nak;
lu,
Xtios na,
Xaa Nabeyy,
keb lo na.
16 Nebse naab na naxizhnot xaa na,
chelee nii na ral,
naxizhnot xaa na.
17 Per naxla na yet na
nu tubka nkano na yalne,
18 kwaanzee nii na re kwaan nawent kwaan mle na lo lu
nu nales nzhak na lo xjwalt na.
19 Re xaa nayii ne na mbanaka nu ngezh doo xaa
nu nzeyak zyen doo re xaa ngaazh kwaan nawent tich na.
20 Re xaa nzere kwaan nawent lo kwaan wen,
nkwaan na le na kwaan wen lo xaa,
per lee xaa xa nleya.
21 Xaa Tubka nak,
nalaat lu na,
Xtios na,
nazot lu zit lo na.
22 ¡Zoza le yud na!
¡Xaa Nabeyy,
nak yalnaban cheen na!