Naz cheen xaa nakap nu xaa nali
Salm kwaan mkee David.
37
Narixyant lu ne lu re xaa nakap,
nixa nagakt lu mbidyos re xaa naxinn,
2 nel nak xaa kwenta yix wen,
kwaan lijer doo ngool;
kwenta yix naye kwaan lijer doo mbizh.
3 Gwii lo Xaa Tubka Nak,
nu le kwaan wen;
gu xkizhyo lu nu nali bzo.
4 Gok nix lextoo lu lo Xaa Tubka Nak,
nel lee xaa zaa kwaan naab lu kwaan dub lextoo lu.
5 Blo xnaz lu lozhya Xaa Tubka Nak,
wii lo Xaa Tubka Nak,
nu lee xaa yiid le yud lu.
6 Zee kwenta xni luu kwaan nali kwaan nle lu,
modxa nzaa mbizh xni rolta mbizh.
7 Zheta gok lo Xaa Tubka Nak,
blaz zee le xaa yud lu
nu nayiit lu ne lu re xaa nkano doo kwaan,
xaa nle xgab kwaan nawent.
8 Laa re yalnayii nu laa re xyan,
narixyant lu nel komba nluux xaa,
9 nel lux re xaa nakap lo yizhyo,
per lee re xaa nkambaz Xaa Tubka Nak,
yizo yizhyo.
10 Nu xeepse nayotra xaa nakap,
nixa kwaan lu xaa,
per nayizhalt xaa.
11 Per lee re xaa nadoo yizo yizhyo,
nu yo doo kwaan wen lo xaa.
12 Re xaa nakap nzhedizh xlaan re xaa nali nak,
zee le xaa kwaan nawent lo xaa,
nu kwaan yalnayii ngwii xaa lo xaa.
13 Per lee Xaa Nabeyy xizhno xaa,
nel merla zhin mbizh kwaan lux xaa.
14 Lee re xaa nakap ngoo spad leen xpayin
nu ngoo xaa xkwez xaa nu kwaan nkeeya,
zee kee xaaya yek xaa prob nu xaa nales nzhak
nu gut xaa re xaa nali nak.
15 Per lee spad xaa yaaz leeka lextoo xaa
nu le xkwez xaa yech.
16 Mas wen xaa nali nak,
xaa nkano cheep kwaan,
ke zyen doo kwaan nzhap xaa nakap.
17 Nel lee Xaa Tubka Nak,
kiich yaa xaa nakap,
per kanap xaa re xaa nali nak.
18 Lee Xaa Tubka Nak,
nkanap re xaa nali nak
nu lee kwaan yizo xaa nak kwaan tira dii.
19 Nu natont xaa re mbizh kwaan nagan,
mbizh kwaan yo yalnlaan,
nel yo kwaan gaw xaa.
20 Nu lee re xaa nakap lux
nu re xaa nayii ne Xaa Tubka Nak yek,
kwenta ze cheen mbakxiil nu kwenta zhen kwaan nyetlo.
21 Lee xaa nakap ngiin kwaan nu nangixt xaaya,
per lee xaa nali nak nkano yalnles
nu nzaa xaaya lo stub naz xaa.
22 Per lee xaa nii wen Xaa Tubka Nak lo,
nak xaa yizo yizhyo,
per lee re xaa nxobde Dios lo,
lux.
23 Lee Xaa Tubka Nak nzeno xaa
nu nzo xaa xaa leen naz kwaan nyula xaa;
24 nixa gorna ralnii xaa,
per nalat xaa lo yo,
nel lee Xaa Tubka Nak,
nzen yaa xaa.
25 Na ngok xaa mad,
lee nal ngox na
nu zer ne na lee tub xaa nali nales nzhak,
nixa zer ne na lee xinn xaa naab karda.
26 Rese mbizh nkano xaa yalnles nu nselazh xaa kwaan,
kwaanzee xtii xaa le zee wen ded stub naz xaa.
27 Laa gu kwaan nawent nu ble gu kwaan wen,
zee tira ban gu,
28 nel Xaa Tubka Nak,
nkela re kwaan nali nak
nu nanlaat xaa re xaa nzhul nak
nu tira kanap xaa xaa,
per lee xaa nakap tira lux re xtii.
29 Per lee re xaa nali nak tira yizo yizhyo
nu tira yo xaa baa.
30 Lee xaa wen nzhedizh kwaan yalnzhak,
nu nii xaa kwaan nali.
31 Nel tubka nle xaa xgab ley cheen Dios,
kwaanzee tira nanruzht nii xaa.
32 Lee xaa nakap nzob xlaan,
zee ne xaa cho kwaan le xaa nali nak,
zee gut xaa xaa.
33 Per lee Xaa Tubka Nak,
nalaat xaa xaa,
nixa nalaat xaa xaa gorna naab xaa kwent lo xaa.
34 Blaz Xaa Tubka Nak nu bin xtizh xaa,
zee lee xaa le non lu lo yizhyo kwaan zaa xaa.
¡Gorna snee sneepa ne lu lux re xaa nakap!
35 Na ngune lo tub xaa nakap,
xaa nto yalxwa,
xaa mxen kwenta yag laurel kwaan naye na.
36 Mded lak mbizh lee xaa nyentla,
ngukwaan na xaa per nanguzhalt xaa lo na.
37 Gwii lo xaa wen nak nu gwii lo xaa nzhul,
nel nzho tub pa wen,
lo re xaa nkano yalnix.
38 Per lee re xaa nle jwalt tira lux xaa
nu lee pa zhin re xaa nakap,
gak pa lux xaa tira.
39 Lee yalnaban cheen xaa nali nak nze lo Xaa Tubka Nak
nu lee xaa nak yalngezh gorna nales nzhak re xaa.
40 Lee Xaa Tubka Nak,
nak xaa kanap xaa nu xaa koo xaa;
koo xaa xaa lo re xaa nakap nu le xaa yud xaa,
nel ngwii xaa lo xaa.