Yalnles cheen Dios
Salm kwaan mkee David, xaa nak xmos Xaa Tubka Nak, nu mzaa xaaya lo xaa nabeyy lo re xaa nzholl.
36
Xaa nle kwaan nakap nebse nle xaa xgab le xaa kwaan nawent,
nik tub mod nanzhebt xaa ne xaa Dios.
2 Nzak xaa nkin gool re xaa lo xaa
nu nzak xaa lee re xaa nanzeent re jwalt kwaan nle xaa.
3 Nebse wdizh nawent nzhedizh xaa nu nkade xaa,
mlaa xaa nanaktra xaa,
xaa nzho yek
nu mlaa xaa nanletra xaa re kwaan wen.
4 Nax xaa lo xloon xaa nu nle xaa xgab le xaa re kwaan nawent
nu nzo xaa lo naz nawent
nu nanzheklat xaa laa xaa re kwaan nawent.
5 Xaa Tubka Nak axta yiba nzhin yalnkela cheen lu
nu yalwli cheen lu nzhin axta leen xkaw.
6 Cheen lu kwaan nali nak,
nak mod re yi cheen Dios,
xtizh lu nak mod nistoo pa nech doo.
Lu,
Xaa Tubka Nak,
nkanap re myet nu re ma.
7 ¡Aka chul nak yalnkela cheen lu Dios!
¡Kwaanzee rese myet nkwaan xan xiil lu zee yolaan xaa!
8 Yizhe lextoo re xaa nel zyen doo kwaan nzho garli lu
nu lu nzaa nis kwaan chul doo ndee go xaa leen tub yuu kwaan nal doo nis nzho.
9 Nel lo lu,
nzho xlen cheen yalnaban,
lo xni cheen lu,
nzho mod wii nu lo xni.
10 Ble naro yalnkela cheen lu lo xaa nlabeyy lu
nu re kwaan nali cheen lu lo re xaa nali nak lextoo.
11 Nalaat lu zee taazh xaa nto yalxwa tich na,
nixa nalet xaa nakap kwaan lo na.
12 ¡Wii xomod mla xaa nakap lo yo!
¡Mla xaa lo yo nu nagarlotra yixche xaa!