Naab xaa zee kanap Xaa Tubka Nak xaa
Salm kwaan mkee David.
35
Xaa Tubka Nak,
le yud na lo re xaa nayii ne na,
bdil kwaan re xaa ndil kwaan na.
2 Bzen kwaan nak mod tub lee yiib kwaan saaw xaa nu le yud na;
3 bzen xtak lu zee saaw lu na lo re xaa nrenal na
nu né lo na:
“¡Na nak xaa nle yud lu!”
4 Gak nachan xaa nu ton xaa,
re xaa nkwaan na,
xoon xaa kwaan yalnto,
re xaa nzhekla gut na.
5 Xaa nawent nak kwenta de cheen yag,
kwaan nzhe mbi tub ta nu stub ta,
kwaan ngubi Mandad cheen Xaa Tubka Nak.
6 ¡Gak xnaz xaa pa blan na nu naruzh nak
nu renal Mandad cheen Xaa Tubka Nak xaa!
7 Nik tub kwaan namlet na nu mkee xaa yex zee zen xaa na,
nixa namlet na nik tub kwaan nu mdeen xaa tub yeer zee la na leena.
8 ¡Nu zhin yalzi lo xaa!
¡Nu la xaa leeka leen xkyex xaa kwaan mkee xaa!
¡Zee yalzo xaa leeka xte xaa!
9 Zee nix gak lextoo na lo Xaa Tubka Nak,
nel lee xaa mle yud na.
10 Nu yé na kwaan dub lextoo na:
“Xaa Tubka Nak,
¿cho nak kwenta lu?
Ngoo lu re xaa prob lo re xaa ngezh lo xaa
nu ngoo lu xaa nales nzhak lo re xaa nto xaa.”
11 Mzhin re testig xaa nakap
nu ngunabdizh xaa kwaan nanet na.
12 Lee gorna nle na kwaan wen lo xaa,
zee nle xaa kwaan nawent lo na,
zee mas nales nzhak lextoo na;
13 nu lee gorna ngok ne re xaa,
zee ngok nales lextoo na ngune na re xaa
nu axta ngok na ler ndox nu mkwan na
nu nanyizhat na nii na lo lu kwent cheen xaa.
14 Nu nales doo ngok na mod xaa ngut wech,
nu mod xaa ngut xmig,
nales ngok na;
nales ngok na,
mod xaa ngut xnaa.
15 Lee gorna mdenke na,
zee rese xaa mkasa nu mxizhno xaa na;
mle xaa na kwenta xaa zit,
xaa nalabeyyt na
nu tubka nawent mle xaa lo na.
16 Mcheb xaa na nu mxizhno xaa na
nu kwaan yalnayii mwii xaa lo na.
17 Xaa Nabeyy,
¿axta cho gor wii lu kwaane?
¡Bloo na lo re xaa nzhekla luux na,
loo na lo re mbezh yeen,
ma nzhekla gaw na!
18 Za na dixkix lo lu pa nkasa re xaa
nu gol na lo lu delant lo re xaa yezh.
19 Nagakt nix lextoo re xaa nayii ne na
nu ntiib xaa garlo xaa lo wechxinn xaa,
re xaa nayii ne na,
nixa nik tub kwaan namlet na.
20 Nel nankwaant xaa kwaan wen
lo re xaa wen nak lo yizhyo ne,
per nle xaa xgab nebse yalnkade.
21 Nangunet xaaya nu mbezh xaa:
“¡Kwaan garlo nu ngune nuya!”
22 ¡Xaa Tubka Nak,
lu nguneya!
¡Nazot lu sbaasa!
¡Xaa Nabeyy,
nalaat lu na!
23 ¡Wii,
Xaa Nabeyy nu le kwaan wli lo na!
¡Wii Xtios na nu le yud na!
24 Xaa Tubka Nak,
lu nak Xtios na,
roo xjabor na mod nak yalnali cheen lu,
nalaat lu xizhno re xaa na.
25 Nayét xaa:
“Kwaane nak kwaan nzhekla be”.
Nu nayét xaa:
“¡Ngulola mluux be xaa!”
26 Laa roo xkalnto re xaa nu nanet xaa cho kwaan le xaa,
rese xaa kwaan nyakla ne xkalzi na;
laa luu xkalnto re xaa,
rese xaa nzak nonra lo na.
27 Per gak nix lextoo re xaa ne wen na,
nu yé xaa:
“¡Non doo Xaa Tubka Nak,
xaa nkela kwaan wen cheen xmos xaa!”
28 Luzh na nii kwaan nali,
kwaan nak xcheen lu
nu gol na lo lu dubse mbizh.