Dios nkanap xaa
(Salm kwaan mkee David, leezha ngok xaa mod tub xaa nachan lo rey Abimeleca, nu lee xaa mtexonn xaa nu mya xaa.)
34
Nii wen na Xaa Tubka Nak rese mbizh;
lee na tubka gol lo xaa.
2 Lo Xaa Tubka Nak,
gak nix lextoo na
nu gon re xaa nded bid nu gak nix lextoo xaa.
3 Tubka gool be lo Xaa Tubka Nak
nu gool be lo yalnabeyy cheen xaa tubka.
4 Mkwaan na Xaa Tubka Nak,
nu mkeb xaa lo na;
mkiib xaa re yalnacheb cheen na.
5 Nix doo nzhak re xaa ngwii lo xaa;
nik tub welt nantont xaa.
6 Lee xaa prob ne ngunii nu lee Xaa Tubka Nak mbina
nu lee xaa mle yud xaa lo yalnales cheen xaa.
7 Lee Mandad cheen Xaa Tubka Nak,
tubka nzo kwaan re xaa nzheb ne xaa
nu msela xaa re xaa.
8 Ble preb nu wii,
¡wen doo nak Xaa Tubka Nak!;
wen re xaa kwaan ngwii lo xaa.
9 Zheb gu ne gu Xaa Tubka Nak,
nel gu nak xaa nambey lo xaa,
nel rese xaa nzheb ne xaa,
nik tub kwaan nanyujwalt lo xaa.
10 Nzho mod gak nlaan nu gak nales re mbezh yeen,
per lee rese xaa nkwaan Xaa Tubka Nak,
nik tub kwaan wen nanyujwalt lo xaa.
11 Te re gu xiin na nu kenzha gu;
zee seed na gu xomod zheb gu ne gu Xaa Tubka Nak.
12 Chelee gu nzhekla gu ban gu xche doo,
nu chelee gu nzhekla gu ded wen gu,
13 zee nzhaal kanap gu roo gu nu nakadet gu,
nu nanzhaalt nii gu kwaan nawlit.
14 Blaa gu kwaan nawent nu ble gu kwaan wen;
kwaan gu zee kwi wen gu kwaan re xaa nu breke gu ticha.
15 Lee Xaa Tubka Nak ngwii lo re xaa nali nak,
nu nkenzha xaa re kwaan nii xaa;
16 per lee yalnayii cheen Xaa Tubka Nak la tich re xaa kwaan nle kwaan nawent,
zee lux le xaa,
nu naselazhtra re myet xaa.
17 Lee re xaa nali naab lo Xaa Tubka Nak,
nu lee xaa gon xtizh xaa
nu koo xaa xaa lo re yalnales kwaan kaded xaa.
18 Lee Xaa Tubka Nak,
nzo gax lo xaa nales nzhak lextoo
nu nle xaa yud re xaa nanetra cho kwaan le.
19 Bid doo ded xaa nali nak,
per lee Xaa Tubka Nak,
le yud xaa lo re kwaan;
20 nkanap xaa re xchit xaa,
zee nik tub zhit cheen xaa nayecht.
21 Lee jwalt cheen xaa nawent le zee yet re xaa
nu teed Dios bid re xaa nayii ne xaa nali nak.
22 Lee Xaa Tubka Nak,
koo re xmos xaa zee gak xaa,
xaa xaa.
Nu lee xaa ngwii lo Dios nateedt Dios xaa bid.