Gool be lo xaa mdexkwaa re kwaan
33
Bill gu kwaan yalnix lo Xaa Tubka Nak,
rese gu xaa nali nak,
nel kwaan nzholl re xaa lo Xaa Tubka Nak,
nak kwaan chul.
2 Bill gu lo Xaa Tubka Nak kwaan bagwel kwaan nkano chii yib
nu bill gu lo Xaa Tubka Nak kwaan bagwel kwaan nkano chiibchop yib.
3 Bill lo Xaa Tubka Nak,
kwaan tub kant kub,
wen bill gu bagwel kwaan dublegan.
4 Lee xtizh Xaa Tubka Nak nak kwaan nali
nu nali nak rese kwaan mdexkwaa xaa.
5 Lee Xaa Tubka Nak nkela re kwaan wli nu re kwaan nali
¡Nu lee yalnkela cheen xaa nzho dubse lo yizhyo!
6 Lee xtizh Xaa Tubka Nak mle zee mdexkwaa yiba
nu nebse kwaan mbi roo xaa,
mdexkwaa xaa rese mbal,
ma nzob naz leen yiba.
7 Lee xaa ntoop re nistoo nu nkasa xaa nistoo,
re nistoo kwaan nall doo.
8 Zheb rese xaa yizhyo ne Xaa Tubka Nak
nu xiz rese xaa yizhyo lo xaa.
9 Lee xaa ngunabeyy zee lee rese kwaan mdexkwaa
nu kwaan xtizh xaa rese wen mlake.
10 Lee Xaa Tubka Nak,
tira nluux re xgab cheen re xaa yizhyo,
nu nanlenont xaa kwaan nzhekla re xaa rese yezh.
11 Per lee xgab cheen Xaa Tubka Nak tira nak
nu kwaan nzhekla xaa le xaa tubka gaka.
12 Wen nak yezh kwaan ngwii lo Xaa Tubka Nak,
xaa nak Xtios xaa,
xaa kwaan mleey xaa gak xaa xaa.
13 Lee Xaa Tubka Nak,
axta naz yiba paro nzob xaa ngwii xaa
nu ngwii xaa lo rese myet;
14 paro nzob xaa ngwii xaa,
lo rese xaa nzho lo yizhyo.
15 Lee xaa nak xaa mdexkwaa lextoo re myet
nu ngwii xaa lo rese kwaan nle myet.
16 Nik tub rey nalet gan lo dil,
nixa zyen doo xsoldad xaa,
nixa nalet xaa nanzhebt gan lo dil,
kwaan yalngezh cheen xaa.
17 Nik tub xaa nanlet xkabay yud,
nixa ngezh doo ma,
per nalet ma gan.
18 Per lee Xaa Tubka Nak,
tubka nkanap re xaa nzheb ne xaa,
re xaa ngwii lo yalnkela kwaan gro doo cheen xaa,
19 zee koo xaa xaa lo yalgut
nu nalaat xaa yet xaa lo yalnlaan gorna yo win.
20 Per lee be ngwii lo Xaa Tubka Nak,
nel lee xaa nak mod tub lee yiib kwaan nsaaw be;
21 nel lo lee xaa,
zee nix nzhak lextoo be
nu ngwii be lo xaa,
nel nambey doo nak le xaa.
22 Xaa Tubka Nak,
lee yalnkela cheen lu zo kwaan nu,
modxa kambaz nu lu.