Kant kwaan mbill xaa gorna mle xaa gan ngwa xaa lo dil
Salm kwaan mkee David nu mzaa xaaya lo xaa nabeyy lo re xaa nzholl.
21
Xaa Tubka Nak,
nix doo nzhak lextoo rey nel lu mzaa yalngezh lo xaa,
nix doo nzhak lextoo xaa nel lu mle yud xaa,
zee mle xaa gan lo dil.
2 Nel mle lu rese kwaan nzhekla xaa
nu mzaa lu re kwaan ngunaab xaa.
{Mbaz}
3 Nu mzaa lu zyen doo kwaan wen lo xaa
nu mzob lu tub koron or kwaan wen yek xaa.
4 Ngunaab xaa gro yalnaban lo lu nu mzaa luya lo xaa,
yalnaban kwaan tira dii,
kwaan naluxt.
5 Gro doo nak yalnabeyy cheen lu,
mle lu yud xaa zee mle xaa gan lo dil,
mle non lu xaa nu mle naro lu xaa.
6 Nu tubka ngunii wen lu lo xaa,
axta paro nzob lu,
mzaa lu yalnix lo xaa.
7 Rey,
xaa ngwii lo Xaa Tubka Nak,
Xaa Nzob Naz Yiba lo yalnkela cheen lu,
zee nyent cho gak xaa.
8 Kwaan yaa lu zen lu re xaa nayii ne lu
nu kwaan yalnabeyy cheen lu zen lu re xaa nayii ne lu.
9 Xaa Tubka Nak,
lee gorna rixyan lu,
zee naab lu kwent lo xaa
nu cheep lu xaa leen gor kwaan ngeey doo,
zee tira yek xaa.
10 Nu luux lu re xaa yizhyo ne,
re xinn xaa nu re xtii xaa.
11 Nixa per nzhekla xaa kee xaaya yek lu
nu nle xaa xgab cho kwaan le xaa kwaan lu,
per nalet xaa gan.
12 Nel texonn lu xaa,
gorna kee lu wez yenn xaa.
13 Xaa Tubka Nak,
gok naro lo yalnabeyy cheen lu,
zee gool nu lo lu,
lo re kwaan mle lu.