Bi cheen yalnales nu bi cheen yalnix
Salm kwaan mkee David nu mzaa xaaya lo xaa ngunabeyy lo re xaa nzholl. Gool xaa kant ne lo re xaa nzholl kwaan le “Mzhin, ma nroo garziil.”
22
Xtios na,
Xtios na,
¿chozhiin mlaa lu na?
¿Chozhiin zit nzo lu lo na nu nanlet lu yud na?
¿Chozhiin nanzhont lu xtizh na gorna nzhonn na nii na lo lu?
2 Xtios na,
tubka mbezh na lu dub zhe per nankebt lu lo na;
tubka mbezh na lu dub yaal per nankebt lu lo na
nixa seeya nyent deskans lo na.
3 Per lu nambey nak lu nu nzob lu pa nabeyy lu;
lu nak xaa nzholl re xaa Israel lo.
4 Lo lu mwii re xey nu;
mwii re xaa lo lu nu mkanap lu re xaa,
5 Mrezh xaa lu nu mloo lu xaa lo yalgut;
mwii xaa lo lu nu namtont xaa.
6 Per nanzakt na nak na mod tub myet,
nzak na nak na mod tub ngwley,
ma nax lo yo.
Nxizhno re xaa na nu nzak re myet nanont na.
7 Rese xaa ngwii lo na nu nxizhno xaa na;
nge xaa lo na nu nkun xaa yek xaa lo na
nu mbezh xaa:
8 “¡Ngwii xaa lo Xaa Tubka Nak,
zee koo Dios xaa lo yalgut,
nel chelee Dios nyula xaa,
zee le Dios yud xaa!”
9 Lu mle zee ngol na lo xnaa na;
lu mle zee wen ngok na,
nguu na xizh xnaa na.
10 Axta leezha zer gal na zee mkanap lu na,
axta leezha zer zan xnaa na na,
lu nak Xtios na.
11 Kwaanzee nazot lu zit lo na,
nel gax nzo yalzi lo na,
nu nyent cho xaa nzho mod le yud na.
12 Re xaa nayii ne na mlo welt lo na kwenta ngoon,
ma nayii,
ma nak yizhyo Basán.
13 Nak xaa kwenta mbezh ma nlaan doo,
mxal ma roo ma zee keb ma na.
14 Nak na kwenta nis kwaan mxo xaa lo yo,
rese xchit na mroo pa nzhoya,
lee lextoo na ngok kwenta tub ser,
kwaan nyall lo xchoog.
15 Mlux yalngezh cheen na mod tub lee bsinn,
nu lee luzh na mkened leen chenn yenn na;
nu mzo lu na leen yide cheen yalgut.
16 Re mbak nakap nzo dub welt lo na;
re xaa naras nsaaw xaa na,
mseweey xaa yaa na nu nii na.
17 Nzho mod lab na re xchit na
nu tubka nlaach re myet lo na.
18 Mdiiz xaa re xab na
nu mkee xaa swert zee ne cho yizo xab na.
19 Per lu,
Xaa Tubka Nak,
nak yalngezh cheen na,
nabachit lu lo na,
zoza te le yud na,
20 bloo na zee nayeta na kwaan spad,
nalaat lu gut re mbak ba na.
21 Le yud na lo re mbezh ba,
nu kanap na lo xkach re ngoon wen.
22 Za na kwent cheen lu lo re wech na
nu gol na lo lu pa nkasa re xaa.
23 Gu,
xaa nzheb ne Xaa Tubka Nak,
bill gu lo xaa,
dii cheen Kob,
ble non gu Dios lo gu,
dii cheen Israel,
bzheb gu ne gu Dios.
24 Dios nanzheklat ded re xaa prob yalzi,
nixa nakaxlaant xaa lo re xaa,
sinka nkenzha xaa xtizh xaa gorna mbezh xaa xaa.
25 Lu nzhaal yalzo re kwaan gol na,
nu re kwaan gool re xaa,
le na re kwaan nguni na nel nzo na lo re xaa nzheb ne lu.
26 Gaw re xaa nales nzhak axta paro yizhe lextoo xaa,
xaa nkwaan Xaa Tubka Nak,
nzhaal gool lo xaa,
nu xche doo ban xaa.
27 Bselazh gu Xaa Tubka Nak,
nu bii gu lo xaa,
rese xaa nzho lo yizhyo,
nu rese yezh kichxub lo xaa,
28 nel Xaa Tubka Nak nak rey
nu lee xaa nak xaa nabeyy re yezh yizhyo.
29 Re xaa nzhap kwaan,
kichxub xaa nu gool xaa nebse lo lee xaa,
nel lee re xaa bare gak yo,
leezha yet xaa.
30 Re xtii na le zhiin lo Xaa Tubka Nak
nu zaa xaa kwent cheen xaa lo re xaa nzexen nara,
31 re xaa gal nara zaa kwent re kwaan nali,
nu kwent cheen re kwaan mdexkwaa Dios.