Re kwaan mdexkwaa Dios
Salm kwaan mkee David nu mzaa xaaya lo xaa nabeyy lo re xaa nzholl.
19
Lee re kwaan nzho leen yiba nlu gro doo nak Dios;
nel re kwaan nzho leen yiba nlu re kwaan mdexkwaa Dios.
2 Tub mbizh nu stub mbizh nzaa kwent re kwaan ba;
tub yaal nu stub yaal nlu yalnzhak lo re myet.
3 Nixa naniita nu nixa nanzhedizhta
nu nixa nanzhont xaa niiya.
4 Lee kwaan nzaaya kwent nxonn dubse yizhyo
nu lee re myet nzhon xtizha dubse yizhyo.
Naz yiba mdexkwaa Dios pa nak li mbizh.
5 Nu lee mbizh nak kwenta tub xaabyi,
xaa roo pa nchelya xaa;
nu leeya nak kwenta tub xaa ndok,
xaa nyakla rexonn lo naz.
6 Nlena tub ta yiba nu nyaaza stub ta yiba;
nu nrooya tub ta yiba nu nzhina stub ta yiba,
nik tub xaa nyent mod xoon lo xchoog cheena.
7 Nali nak ley cheen Xaa Tubka Nak,
nu ncheeya lextoo xaa;
Lee xtizh Xaa Tubka Nak,
nali nak,
nu nzaaya yalnzhak lo re xaa nanzhot yek.
8 Nali nak ley cheen Xaa Tubka Nak;
nle nixa lextoo xaa.
Nzhul nak ley cheen Xaa Tubka Nak;
nluya kwaan lo xaa.
9 Lee xtizh Xaa Tubka Nak,
nzhul nak nu tubka nzhoya.
Wli nak xley Xaa Tubka Nak
nu wen naka lo rese kwaan.
10 Leeya nak kwaan nyulara xaa lo or,
leeya naxra mas ke mzhin cheen mbaz ser.
11 Lee xtizh lu nlu kwaan nali lo xmos lu,
xaa ngozhawa nle gan kwaan non.
12 ¿Cho nzho mod zeen kwaan nle?
Che re jwalt kwaan nanzeent na mle na.
13 Kanap na,
xaa nak xmos lu,
lo yalxwa;
zee nanabeyytra re jwalt lo na.
Zeesi nzhul gak na lo re jwalt;
mod tub xaa nyent cho kwaan mle.
14 Oj wen kayaa lu re kwaan nroo roo na
nu wen kayaa lu xtizh na nu xgab cheen na;
Xaa Tubka Nak,
lu nak ke kwaan nsaaw na,
mloo lu na lo re jwalt cheen na.