Kwaan mbill David gorna mle xaa gan lo dil
(2 Samuel 22:1-51)
Salm kwaan mkee David, xmos Xaa Tubka Nak,
nu mzaa xaaya lo xaa nabeyy lo re xaa nzholl,
gorna mloo xaa xaa lozhya rey Saúl nu lo re xaa nayii ne xaa.
Zee nzhé xaa:
18
Nkela na lu Xaa Tubka Nak;
lu nak yalngezh cheen na.
2 Xaa Tubka Nak
nak ke kwaan nsaaw na,
nak xaa kwenta tub yoo ndok kwaan nsaaw na,
nak xaa nle yud na lo dil.
Xtios na nak mod bla kwaan nsaaw na,
nak xaa kwenta tub lee yiib kwaan nsaaw na,
nak xaa nle yud na kwaan yalngezh
nu nak xaa xaa nkanap na.
3 Kwezh na Xaa Tubka Nak,
nzhaal yalzo xaa re kwaan gool xaa
nu le xaa yud na lo re xaa nayii ne na.
4 Nu dub welt lo na mzhaal yalgut
nu mzheb doo na ne na nisyo kwaan nluux myet
nu nzheb doo na yet na.
5 Nu dub welt lo na mzhaal yalgut
nu mzob xaa tramp zee gut xaa na.
6 Nu lo yalnales cheen na zee mrezh na Xaa Tubka Nak
nu ngunaab na yud lo Xtios na
nu lee xaa mbina axta leen xkidoo xaa
nu mbin xaa kwaan ngunii na.
7 Nu mgun tub xog kwaan mkun dubse yizhyo
nu axta xan re yi mgun;
mguna kwaan yalnayii cheen Dios.
8 Nu lee xii xaa mroo zhen
nu lee roo xaa mroo bal kwaan mluux re kwaan
nu mloo xaa blan ki.
9 Mxal Dios yiba nu mla xaa naz lo yo
nu lee nii xaa nzo lo yalnakaw.
10 Nguxoob xaa tich tub mandad kwaan le kerubin
nu mzobi xaa tich xiil mbi.
11 Mkaxlaan xaa leen xkaw
nu kwaan xkaw mdexkwaa xaa tub yoo ler
nu msaaw xkaw dubse xaa.
12 Lee xni cheen xaa ta mlu,
leezha ngulo mreech xkaw
nu mla yuuke nu blan ki.
13 Naz leen yiba mroo tub bi cheen ngwzi,
bi ne mroo lo Xaa Tubka Nak,
Xaa Nzob Naz Yiba.
Mrezh tub bi mod yuuke nu blan ki.
14 Mxaal xaa bal ngwzi mod nkee xaa wez,
mkee xaaya yenn re xaa nayii ne xaa nu mluux xaa re xaa.
15 Zee mlu axta xan nistoo
nu noka axta xan yizhyo,
nik tub kwaan namlaket
nu sbaa ngoka nebse kwaan mbi kwaan nroo xii Xaa Tubka Nak,
nel nayii xaa.
16 Dios mzen yaa na axta leen yiba
nu kwaan yaa xaa mloo xaa na leen nistoo,
pa mas nech.
17 Mloo xaa na lo re xaa nayii ne na,
xaa nayii ne na nu xaa ngezhra lo na.
18 Mkee xaaya yek na mbizh kwaan nales doo mdeed na,
per lee Xaa Tubka Nak,
mle yud na:
19 mloo xaa na lo re kwaan nawent,
mle xaa yud na nel mkela xaa na.
20 Lee Xaa Tubka Nak,
mzaa kwaan yalzo na,
lo re kwaan nali kwaan mle na;
mzaa xaaya lo na nel nzhul nak na.
21 Nel mzee na xnaz Xaa Tubka Nak,
nixa nambachit na nu nixa namlet na kwaan nakap lo Xtios na.
22 Tubka nkano na xtizh xaa,
nixa namlat na ley cheen xaa.
23 Nali ngok na lo xaa,
nu namlet na jwalt lo xaa;
24 Lee Xaa Tubka Nak,
mzaa kwaan ngolzo na,
lo re kwaan nali mle na,
tub mod nzhul ngok na lo xaa.
25 Nali nak lu lo xaa nali nak lo lu
nu wen nle lu lo xaa kwaan wen nle lo lu.
26 Nzhul nlu lu lo xaa nzhul nak lo lu,
per ned gak lu lo xaa ned nak lo lu.
27 Lu nle yud re xaa nales nzhak,
per lee re xaa nto yalxwa,
luux lu yalxwa cheen xaa.
28 Lu,
Xaa Tubka Nak,
nak xaa nkee xni yek xpruj na;
Xtios na,
lu nak xaa nzaa xni lo yalnakaw cheen na.
29 Kwaan lu zee le na gan lo re xaa nayii ne na
nu Xtios na le zee nzho mod deed na lo bla cheen yezh.
30 Lee naz cheen Dios nali nak,
lee xtizh Xaa Tubka Nak wli nak,
Dios nsaaw re xaa mod tub lee yiib rese xaa kwaan ngwii lo xaa.
31 ¿Cho nak Dios,
sinka nebse Xaa Tubka Nak?
¿Cho ke nyera nak lo Xtios be?
32 Dios nak xaa nzaa yalngezh lo na
nu nle nali xaa xnaz na.
33 Dios nak xaa nle nii na mod nii mzhin,
zee naralt nii na gorna zo na naz yi,
34 xaa nseed na xomod dil na,
xaa nzaa jwers lo na gorna kee na wez cheen brons.
35 Lu saaw na mod tub lee yiib nu koo lu na lo yalgut;
kwaan yalnabeyy cheen lu
nu kwaan yalwen cheen lu mle non lu na.
36 Nu mle lu zee nix zee na
nu nixa naruzht nii na.
37 Mrekee na tich re xaa nayii ne na nu nguga xaa lo na
nu nambaret na sbaasa axta ke mluux na re xaa.
38 Mseweey na xaa zee nayixchetra xaa
nu mla re xaa lo yo paro nzo na.
39 Nu mzaa lu yalngezh lo na zee mle na gan lo dil
nu mle lu zee mla re xaa nayii ne na lo yo.
40 Mle lu zee lee re xaa nayii ne na mxonn lo na,
zee mluux na re xaa nayii ne na.
41 Ngunaab xaa nu nyent cho mle yud xaa,
ngunii xaa lo Xaa Tubka Nak,
per namkebt xaa lo xaa.
42 Mzoog na xaa mod yide kwaan nzeno mbi
nu mlebi na xaa lo ban kwaan nzhi leen naz.
43 Mkanap lu na lo re xaa nakap
nu mzo lu na nabeey na lo re yezh
nu lee re xaa kwaan nanlabeyyt na mle zhiin lo na.
44 Gorna mbin xaa xtizh na nu mzob xaaya;
lee xinn re xaa zit mkich yek lo na.
45 Mzheb re xaa zit,
kwaanzee mroo xaa paro mkaxlaan xaa nu mxiz xaa lo yalnacheb.
46 ¡Mban Xaa Tubka Nak!
¡Wen nak xaa nkanap na,
xaa nak ke kwaan nsaaw na!
¡Gro nak Dios xaa mloo na lo yalgut!
47 Dios xaa ngunaab kwent lo re xaa nayii ngune na,
nu mzaa xaa re yezh lo na,
48 xaa mloo na lo re xaa kwaan nayii ne na,
mle lu zee nabeey na lo re xaa nakap ngok lo na
nu mloo lu na lo re xaa naras.
49 Kwaanzee na yé lo re yezh zee za na dixkix lo lu,
Xaa Tubka Nak,
nu gol na nel wen doo nak le lu.
50 Xaa Tubka Nak,
mle zee mle rey gan lo dil
nu tubka nkano xaa yalnkela lo xaa mleey xaa,
lo David nu lo re xtii xaa tira.