Naab xaa zee kanap Dios xaa lo xaa nayii ne xaa
Kwaan ngunii David lo Dios.
17
Xaa Tubka Nak,
bin xtizh na kwaan nali nak;
le kwaan nii na,
kenzha kwaan nii na
nu nanroot yalnkade roo na.
2 Nel lu nroo xjabor na lo re kwaan nakap
nu lu ne xana kwaan wen nak.
3 Lu ne cho kwaan nle na xgab
nu yaal nyiid sewii lu lo na;
mle lu preb na
nu nik tub kwaan nawent nanguzhalt lu lo na.
Nel mkanap na roo na zee nanguniit na kwaan nawent,
4 nanlet na mod nle stub naz re xaa.
Nu namlat na xnaz lu nel nkanap xtizh lu na zee nazhaalt na kwaan re xaa nakap.
5 Nu tubka nali zo na lo xnaz lu,
zee naralt nii na.
6 Dios,
lo lu nii na,
nel lu nkeb lo na,
kenzha xtizh na nu bin kwaan nii na.
7 Lu yalnkela cheen lu lo na,
nel nle lu yud re xaa kwaan yalnabeyy cheen lu,
lo re xaa nayii ne xaa.
8 Kanap na kwentaxa nkanap lu nin kwaan nzho leen zaalo lu
nu blozhaw na xan xiil lu.
9 Kanap na lo re xaa nakap,
xaa nzhekla gut na
nu lo re xaa nayii ne na,
xaa nrenal na.
10 Ngulo ngok ned lextoo xaa
nu nebse nzhech xaa kwaan roo xaa
11 nu nsaaw xaa na
nu tubka ngwii xaa nen cho kwaan le na,
zee ne xaa nen che zralnii na.
12 Nak xaa kwenta mbezh ma nzhekla gaw ma
nu kwenta mbezh yeen,
ma zheta nzholaan.
13 Wii,
Xaa Tubka Nak,
nu bdil kwaan re xaa ble gan lo re xaa
nu kwaan spad cheen lu bloo na lo re xaa nakap.
14 Xaa Tubka Nak,
kwaan yalnabeyy cheen lu,
kanap na lo re xaa yizhyo ne.
Xwa doo nzhak xaa lo yizhyo ne,
nzhap xaa zyen doo kwaan
nu nzho zyen kwaan gaw xinn xaa
nu axta lake kwaan gaw re xtii xaa.
15 Wlipa na,
nix doo gak lextoo na,
gorna snee sneepa ne na lo lu
nu nix doo gak lextoo na gorna yixche na wii na lo lu.