Kwaan mlaa Dios lo na
Salm kwaan mkee David.
16
Dios,
kanap na,
nel nebse lo lu ngwii na nel lu nak xaa nkanap na.
2 Ni naya lo lu:
“Lu,
Xaa Tubka Nak,
nak Xaa Nabeyy na;
nyentra stub xaa wen mod lu.”
3 Nix doo nzhak lextoo na ne na re xaa nambey nak
nu re xaa nali nak lo yizhyo ne.
4 Gak gro yalne cheen re xaa,
re xaa kwaan ngwii lo stub dios.
Per natedt na xis ub lo maj cheen xaa
nu nixa nacheroot na lo maj cheen xaa.
5 Xaa Tubka Nak,
lu nak kwaan yalzo na,
lu nak rese kwaan nkin na.
Nu yalnaban cheen na nzho lozhya lu.
6 Chul nak yizhyo ngolzo na,
nel wen nak kwaan mlaa lu lo na.
7 Nii wen na lo Xaa Tubka Nak,
nel nlu xaa kwaan wen lo na
nu noka yaal nlu xaa kwaan lo na.
8 Nu tubka nzo Xaa Tubka Nak kwaan na
nu lee xaa nzo lad li lo na,
zee tubka nye nzo na.
9 Kwaanzee nyak doo lextoo na
nu nzholl na kwaan roo na
nu wen yoo na,
nu nalet na xgab,
10 nel nalaat lu na leen Hades,
pa nzho re xaa ngut
nu nixa nalaat lu lux kwerp cheen mer xaa nambey nak.
11 Mlu lu naz cheen yalnaban lo na
nu nyakdoola na nzo lu lo na,
nel chul doo nzo na gax lo lu tira.