Naab xaa zee lux xaa nakap
10
¿Chozhiin tant zit nzo lu lo na,
Xaa Tubka Nak,
nu chozhiin nkaxlaan lu lo na gorna nzhin yalzi lo na?
2 Xaa nto yalxwa nrenal xaa nales nzhak;
per leeka lo xtramp xaa kwaan mzob xaa la xaa.
3 Lee xaa nakap nto yalxwa lo yalnzoblazh kwaan nzho leen lextoo xaa,
lee xaa nzoblazh nxobde nu nlaa xaa Xaa Tubka Nak.
4 Lee xaa nakap nto yalxwa nu nankwaant xaa Dios:
“Nyent Dios,
nyent cho naab kwent”,
nak rese kwaan nle xaa xgab.
5 Rese kwaan nle xaa wen nreke lo xaa.
Zit doo nzo xaa lo lu nu nanlet xaa xgab lee lu naab kwent lo xaa
nu xizhno xaa re xaa nayii ne xaa.
6 Nu nle xaa xgab:
“Tira nayiyot na;
nixa nazhintra yalzi lo na”.
7 Nu kwaan roo xaa nge xaa nu nkade xaa re myet
nu kwaan yalkade nrenal xaa re xaa
nu xan luzh xaa nzholaan re wdizh kwaan nawent kwaan nle zee ndil re xaa.
8 Nu xlaan nzob xaa roo yezh zee nsaaw xaa xaa
nu saaw xaa xaa zee gut xaa xaa nales nzhak,
xaa nakalet nik tub kwaan.
9 Tubka nzholaan xaa mod mbezh,
ma nzho leen yeer
nu nzob xaa tramp zen xaa xaa nales nzhak
nu gorna yilo yiga xaa lo xaa zee nzhe xaa xaa leen xkyeez xaa.
10 Zhe zhe nzha xaa zen xaa xaa nales nzhak.
11 Lee xaa nakap nzak lee Dios nyenlazh kwaan;
nu nsaaw xaa lo xaa zee nik tub kwaan naluut lo xaa.
12 ¡Wii Dios,
Xaa Tubka Nak!
¡Nayenlazht lu re xaa nales nzhak!
13 ¿Chozhiin nanlet re xaa nakap kas Dios?
nu nle xaa xgab:
“Nanaabt Dios kwent lo na.”
14 Lu nlabeyy nu ngwii lu lo re kwaan nawent kwaan nle xaa
nu kwaan yaa lu zaa lu kwaan yalzo xaa.
Lo lu ngwii xaa nales nzhak
nu lu nkanap re ngwzeb.
15 ¡Bdiich yaa re xaa nakap
nu bted xaa bid lo re kwaan nawent kwaan nle xaa,
axta paro nayizhalt kwaan nawent lo xaa.
16 Xaa Tubka Nak,
nak rey xaa tira nak
nu luux xaa re yezh xaa nangwiit lo xaa.
17 Lu,
Xaa Tubka Nak,
nkenzha kwaan nii xaa nadoo nak
nu nii chul lu lo xaa nu nzhon lu kwaan nii xaa.
18 Lu,
nroo xjabor re ngwzeb nu re xaa nales nzhak,
zee nabaretra xaa yizhyo nu cheb xaa xaa.