Gool xaa kwaan wli cheen Dios
Salm kwaan mkee David, nu mzaa xaaya lo xaa nabeyy lo re xaa nzholl.
Kant kwaan nzholl xaa kwaan le “Ngutla xgann xaa”.
9
Kwaan dub lextoo na gol na lo lu,
Xaa Tubka Nak,
nu za na kwent rese kwaan gro kwaan mle lu.
2 Nzhekla na gak nix lextoo na lo lu
nu gol na lo lu,
Xaa Nzob Naz Yiba.
3 Mxonn re xaa nayii ne na,
mdenke xaa nu ngut xaa gorna ngune xaa lo lu.
4 Lu nak xaa naab kwent tub mod nali nu mroo lu xjabor na
nu nzob lu pa nabeyy lu nu naab lu kwent lo re myet.
5 Mgalno lu re yezh nu mluux lu re xaa nakap
¡nu tira mbit lu re xaa!
6 Ngutla re xaa nayii ne na,
mluux lu re yezh cheen xaa
nu nyent cho xaa nselazh xaa.
7 Per lee Xaa Tubka Nak tubka nzo
nu nzob xaa pa nabeyy xaa,
gorna naab xaa kwent.
8 Lee xaa naab kwent lo re myet tub mod nali,
nu le xaaya tub mod nali lo re yezh.
9 Lee Xaa Tubka Nak,
kanap xaa nales nzhak,
nu kanap xaa xaa gorna nzhin yalzi lo xaa.
10 Lo lu wii re xaa nlabeyy lu,
nel lu,
Xaa Tubka Nak,
nanlaat lu re xaa nkwaan lu.
11 Bill gu lo Xaa Tubka Nak,
xaa nabeyy Jerusalén,
guzh gu lo re yezh re kwaan mle xaa.
12 Lee xaa naab kwent lo re xaa nzhut myet,
namyenlazht xaa xaa snee mle;
nixa namyenlazht xaa re xaa nales nzhak.
13 Blesla lu ne lu na,
Xaa Tubka Nak,
wii xomod nales nzhak na lo re xaa nayii ne na,
xaa nzhekla gut na,
per nkanap lu na.
14 Lee roo yezh Jerusalén,
yé na lo re myet dub yizhyo wen nak lu
nu nix doo nzhak lextoo na,
nel mzaa lu yalnaban lo na.
15 Re xaa rese yezh mla leeka leen xtramp xaa,
kwaan mdexkwaa xaa,
nu mralnii xaa leen yex,
kwaan leeka re xaa mkaxlaan.
16 Lee Xaa Tubka Nak mlu,
nel nle xaa kwaan wli
nu lee xaa nakap mlake leeka leen xtramp,
kwaan mkee leeka lee xaa.
{Mbaz}
17 Rese xaa nakap nya leen baa pa nzho re xaa ngut,
rese yezh kwaan nyenlazh Dios.
18 Xaa nales nzhak,
nayenlazht Dios xaa tira,
nixa naluxt kwaan kambaz xaa nales nzhak.
19 Wii,
Xaa Tubka Nak,
nalaat lu le xaa gan lo nu;
naab kwent lo rese yezh delant lo lu.
20 Xaa Tubka Nak,
ble zee zheb re xaa,
ble zee zeen re yezh,
ke nebse nak xaa myet.
{Mbaz}