Yalnabeyy kwaan mzaa Dios lo re myet
Salm kwaan mkee David nu mzaa xaaya lo xaa nabeyy lo re xaa nzholl. Gool xaaya kwaan Gitit.
8
¡Xaa Tubka Nak,
xaa nabeyy,
gro doo nak le lu lo rese myet yizhyo ne!
¡Nu nzho xni cheen lu naz leen yiba!
2 Mle lu zee re madwin gool chul lo lu
nu noka axta re madoo,
mad nkeka laz xnaa,
gool lo lu
nu yaaw roo re xaa nayii ne lu nu re xaa nakap.
3 Gorna ngwii na naz yiba,
lo re kwaan mdexkwaa lu kwaan yaa lu,
lo mbee nu lo re mbal,
ma mzob lu yiba,
4 zee nzhé na:
nzak na nanont re myet yizhyo,
kwaanzee ndedyall na ne na xomod nselazh lu re nu nu nkanap lu nu.
5 Nanont xeep mle lu nu,
lo re mandad cheen lu
nu mzaa lu yalnabeyy lo nu
nu mle non lu nu.
6 Nu mzaa lu yalnabeyy lo nu,
zee nabeyy nu lo rese kwaan mdexkwaa lu
nu mle lu zee nabeyy nu loya;
7 zee nabeyy nu lo re mbakxiil nu lo re ngoon
nu lo rese ma nzho wen,
8 zee nabeyy nu lo re myin,
ma nzobi naz yiba
nu lo re mbal,
ma nze leen nistoo
¡nu lo rese kwaan nzho leen nistoo!
9 ¡Xaa Tubka Nak,
Xaa Nabeyy nu
gro doo nak le lu lo rese myet yizhyo!