Lee Xaa Tubka Nak naab kwent nali
Yalnales cheen David, kwaan mbill xaa lo Xaa Tubka Nak,
leezha mle xaa xgab kwaan ngunii Cus, xtii Benjamín.
7
Xtios na,
Xaa Tubka Nak,
naab na zee le lu yud na;
bloo na lo re xaa nrenal na.
2 Napa kwenta mbezh kazen xaa na
nu le byog xaa na nu nyent cho la na lo xaa.
3 Xtios na,
Xaa Tubka Nak,
¿Che nzhib tub kwaan tich na?
¿Che kwaan nawent nzho lo na?
4 ¿Che nawent mle na lo xaa ngu wen kwaan na?
¿Nu che sbaasa mkiib na xcheen xaa nayii ne na?
5 Chol sbaaya zee lee xaa nayii ne na renal na
nu yiga na lo xaa nu kobxex xaa na lo yo
nu koo xaa xkalnto na.
6 Wii,
Xaa Tubka Nak,
kwaan yalnayii cheen lu,
¡Bdil kwaan re xaa nayii ne na!
Lu nak xaa naab kwent kwaanzee broo xjabor na.
7 Nu tuka kasa re yezh lo lu
nu zob lu nabeyy lu loya.
8 Lu,
Xaa Tubka Nak,
naab kwent lo re yezh;
naab kwent lo na nel nali nak na,
naab kwent lo na nel wen nle na.
9 Lux re kwaan nawent,
kwaan nle re xaa nakap,
per zo nali re xaa wen nak,
nel lu nak tub Dios wen,
xaa nlabeyy xgab yek xaa nu lextoo xaa.
10 Dios,
nak xaa nsaaw na mod tub lee yiib,
xaa nkanap re xaa wen nak lextoo.
11 Dios nak xaa nali naab kwent,
nu xaa wen nak,
yizata mbizh nayii Dios ne re kwaan nawent.
12 Chelee xaa nabaret xaa lo Dios,
Dios listla nkano spad
nu listla nkano xaa wez.
13 Sbaaka listla nkano xaa yiib kwaan gut xaa
nu listla nzob ki yek wez kwaan kee xaa.
14 Wii lo xaa nawent,
ne lextoo xaa kwenta tub ngwnaa me zan mad,
lee mad gal gak kwaan nawent,
nu mad kwaan gal gak yalkade.
15 Mdeen xaa tub yeer nech doo
nu leeka leen xkyeer xaa la xaa.
16 Lee re kwaan nawent nu kwaan nakap,
bare leeka lo xaa.
17 Za na dixkix lo Xaa Tubka Nak,
nel nali nak xaa,
gol na lo Xaa Tubka Nak,
Xaa Nzob Naz Yiba.