Naab xaa zee kanap Dios xaa
Salm kwaan mkee David.
Kwaan mzaa xaa lo xaa nabeyy lo re xaa nzholl. Nu nzhaal gool xaaya kwaan bzhik.
5
Kenzha xtizh na,
Xaa Tubka Nak,
ble yud na lo re yalne kwaan nzho lextoo na.
2 Bin xtizh na,
xaa nak Rey cheen na nu Xtios na,
nel lo lu nii na.
3 Xaa Tubka Nak,
garziil doo nzhon lu xtizh na
nu garziil doo zhin na lo lua nu kwaz na keb lu lo na.
4 Nel lu nak tub Dios,
xaa nanyulat kwaan nawent
nu nayot xaa nakap kwaan lu.
5 Lee re xaa nachan nayot lo lu
nu nayii lu ne lu re xaa nle kwaan nakap.
6 Lu luux re xaa nkade
nu nanzheklat lu re xaa nzhut
nu nayii lu ne lu re xaa nle tramp.
7 Per lee na reep leen li lu,
nel nlesdoola lu ne lu na
nu kwaan respet gol na lo lu
nu kichxub na lo lu,
paro nzob yidoo cheen lu kwaan nambey.
8 Xaa Tubka Nak,
be na lo re kwaan wli
nu lu naz nali lo na,
lo re xaa nayii ne na.
9 Lee roo re xaa nyent kwaan wli
nu leen lextoo xaa nzho re kwaan nawent,
lee yeer yenn xaa nak mod baa kwaan nzoxal
nu lee roo xaa nroo yalnkade.
10 ¡Dios,
ted xaa bid!
¡Zee la xaa leeka lo xtramp xaa!
Bloo xaa naz jwer nel zyen doo jwalt cheen xaa,
nel mdil xaa kwaan lu.
11 Gak nix lextoo re xaa ngwii lo lu
nu tubka gool xaa kwaan yalnix lo lu,
nel lu nkanap xaa;
nu nyakla re xaa nkela lu.
12 Lu,
Xaa Tubka Nak,
nii wen lu lo re xaa nali
nu saaw lu xaa mod tub lee yiib.