Dios nzaa yalnix
Salm kwaan mkee David.
Kwaan mzaa xaa lo xaa nabeyy lo re xaa nzholl. Nu nzhaal gool xaaya kwaan bagwel.
4
¡Keb lo na gorna nii na lo lu,
Dios xaa nii nali nak na;
gorna nales doo ngok na,
zee mzaa lu yalnix lo na,
blesla lu ne lu na nu bin kwaan nii na!
2 Gu re xaa non,
¿axta cho gor laa gu nii nawent gu na?
¿Axta cho gor laa gu kela gu kwaan nanont nu nkwaan gu yalnkade?
{Mbaz}
3 Ne gu,
lee Xaa Tubka Nak,
mleey xaa nali nak,
Ne gu,
lee Xaa Tubka Nak,
gon xtizh na gorna nii na lo xaa.
4 ¡Chelee gu yii gu,
per nalet gu jwalt!
Gorna gaa gu,
ble gu xgab,
gorna nanket bi.
{Mbaz}
5 Ted gu ma wen lo Dios tub mod nali
nu wii gu lo Xaa Tubka Nak.
6 Zyen doo xaa mbezh:
“¿Cho nzho mod luu kwaan wen lo nu?”
Xaa Tubka Nak,
wii lo nu kwaan yalchul cheen lu.
7 Lu mzaa yalnix lextoo na,
masra ke re xaa nkano zyen doo nzhobxtil nu nall doo xis ub.
8 Wen nzhaa na nu sbaaka nzen mkaal na,
nel nebse lu,
Xaa Tubka Nak,
nle zee wen mban na.