Kob mlabeyy Egipto
47
Che mzaa kwent lo xaa ngok faraón nu nzhé xaa:
—Xuz na nu re wech na mroo Canaán nu lee nal lee xaa nzola Gosén kwaan re xpakxiil xaa,
xkoon xaa nu re kwaan nkano xaa.
2 Nu mbe xaa gaay wech xaa lo xaa ngok faraón,
zee labeyy xaa xaa.
3 Zee lee xaa ngok faraón ngunabdizh lo re wech Che:
—¿Chozhiin nke gu?
Nu lee re xaa mkeb:
—Nu nak xaa nkanap mbakxiil,
mod xey nu.
Nu noka ke nu zhiin lo lu.
4 Nze nu zee yo nu yizhyo ne,
nel nzelara win yizhyo Canaán.
Nu nyentra yix gaw re xma nu.
Nu nak xaa ke zhiin lo lu,
kwaanzee naab nu lo lu laa yo nu yizhyo Gosén.
5 Zee lee xaa ngok faraón nzhé lo Che:
—Xuz lu nu re wech lu nze yo kwaan lu.
6 Yizhyo Egipto nzho lozhya lu.
Zaa yizhyo Gosén kwaan nak kwaan wen lo yizhyo Egipto,
zee kwaz xaa yo xaa baa.
Nu chelee tub xaa nxen doo ma lo,
zee za na re xma na kano xaa.
7 Nu noka mbe Che xuz xaa Kob,
lo xaa ngok faraón.
Zee lee Kob ngunii wen lo xaa ngok faraón.
8 Nu lee xaa ngok faraón ngunabdizh lo xaa:
—¿Lak liin nzho lu?
9 Nu lee Kob mkeb:
—Nzhala tub gayoo galbchii liin nzha nkanzee na lo yizhyo.
Nu ngu zyen mbizh nales doo mdeed na;
nu nagan doo ban na lal liin kwaan mban xuz na nu re xey na.
10 Ngulo ngunii wen Kob lo xaa ngok faraón nu mroo xaa nya xaa.
11 Nu lee Che mzaa yizhyo kwaan wen lo dubse yizhyo Egipto,
zee yo xaa baa,
mer mod ngunabeyy xaa ngok faraón.
Sbaa mod mzhin mkano xuz xaa nu wech xaa yizhyo kwaan le Ramesés kwaan nak yizhyo Gosén.
12 Zee lee Che mzaa kwaan gaw re sawlizh xaa.
Mzaa xaaya lo kad tub wech xaa loka paroya nkin xaa.
13 Nik tub lad lo yizhyo nyent nzhobxtil gaw xaa,
nel lee win tubka nzheyak narora naz Egipto nu naz Canaán.
Nu lee re myet tubka mded bid loya.
14 Nu lee Che ngulo mka re demi Egipto nu noka naz Canaán kwaan ngulo mzi xaa nzhobxtil.
Nu mlozhaw xaaya garli xaa ngok faraón.
15 Ngulo mlux re demi naz Egipto nu naz Canaán.
Nu zee lee re xaa Egipto ngwa nzhé lo Che:
—Zaa kwaan gaw nu.
Nalaat lu yet nu,
nel nakanotra nu demi zii nuya.
16 Nu lee Che mkeb:
—Chelee gu nankanotra gu demi,
zee zaa gu re xma gu,
lee na za nzhobxtil chee beya.
17 Zee lee re xaa Egipto mzhino kabay,
mbakxiil,
ngoon nu ngwes lo Che,
zee zhee ma nzhobxtil dubse liin zee.
18 Ngulo mded liin zee,
lee stub liin ngwa re xaa nu nzhé xaa lo Che:
—Lee re nu nanzentra demi.
Lee rese xma nu nakla xma lu.
Nankanotra nu kwaan zaa nu chee be nzhobxtil,
nebse kwaan nzhap nu nak xkizhyo nu nu re nu.
19 Bzi nu nu xkizhyo nu,
zee zhee nu nzhobxtil,
zee gak nu xmos xaa nak faraón.
Nu ke nu zhiin lo xaa,
zee nebse zaa lu ben,
zee nzho mod ban nu nu nixa naluxt xkizhyo nu.
20 Zee lee Che mzi rese yizhyo Egipto,
kwaan ngok xcheen xaa ngok faraón.
Nel re xaa Egipto mto yizhyo kwent cheen yalnlaan.
21 Kwaanzee lee re xaa Egipto ngok xaa nke zhiin lo xaa ngok faraón.
22 Nebse yizhyo kwaan namzit Che nak cheen re ngwleyy,
nel xaa ngok faraón mzaa tub paroya lo xaa,
kwaanzee namtot xaa xkizhyo xaa,
nel ndaw xaa kwaan mzaa xaa ngok faraón.
23 Zee lee Che nzhé lo re xaa:
—Lee nal re gu nu xkizhyo gu nak xcheen xaa nak faraón,
nel na mzi xcheen xaa.
Ne gu nal lee ben nee zee gaan gu yizhyo.
24 Per zaa gu lo xaa nak faraón tub tant lo gaay tant yalgon.
Lee stub tap tanta gak kwaan gaw gu nu re xinn gu nu re xaa nzho kwaan gu.
Nu lee xeepa gak ben.
25 Nu lee re xaa mkeb:
—Wen doo nak lu lo re nu.
Nu snee nzho mod ban nu,
nalsi ke nu zhiin lo xaa nak faraón.
26 Snee nak kwaan ngunabeyy Che le re xaa dubse yizhyo Egipto,
zaa xaa tub tant lo gaay tant lo xaa ngok faraón.
Nu lee kwaane seetaka nzho mbizh nalzhe.
Nebse xcheen ngwleyy nangokt xcheen xaa ngok faraón.
27 Lee re xtii Israel mlake ngu Gosén,
pa nabeyy Egipto.
Lee yizhyo ba ngok xcheen xaa nu mzhin xaa ngok xaa zyen doo.
28 Kob mbanra stub chiinmchop liin nu mzhin xaa ngu xaa tub gayoo nzho choobgazh liin.
29 Lee stub mbizh lee Kob mzeenla yet,
zee mxaal xaa xaa ngwachezh Che nu nzhé xaa lo Che:
—Chelee lu wlipa nkela lu na,
naab na lo lu le lu tub kwaan nu cheroo lo na,
zee wlipa nakaacht lu na Egipto.
30 Lee gorna yet na,
zee wee lu na nu kaach lu na pa mgaach re xey na.
31 Nu lee Kob nzhé stuba:
—¡Cheroo lo na!
Zee lee Che mcheroo.
Nu lee Kob mkich yek lo kwaan mkoo xaa lo loon.