Kob mzhin Egipto
46
Kob,
xaa noka le Israel,
mroo Canaán kwaan rese kwaan nzhap xaa.
Nu gorna mzhin xaa Beerseba nu mted xaa ma lo Xtios xuz xaa Chak.
2 Nu yaal zee mlu Dios lo Kob nu nzhé xaa:
—Kob.
Nu lee xaa mkeb:
—Lee na neeka.
3 Zee lee Dios nzhé:
—Na nak Dios,
Xtios xuz lu.
Nazhebt lu nya lu Egipto,
nel baa le na re dii cheen lu tub yezh naro.
4 Nu zo na tubka kwaan lu naz Egipto nu noka bareno na re xtii lu nee stuba.
Per lee gorna yet lu,
zee yet lu yaa Che.
5 Nu mroo Kob Beerseba nu lee re xgann xaa mtexoob xaa leen karet,
kwaan mxaal xaa ngok faraón lo xaa;
nu noka mtexoob xaa re mad win nu re ngwnaa.
6 Nu mroo Kob kwaan re li xaa nu re xkoon xaa nu re xpakxiil xaa nu rese kwaan nzhap xaa nu mya xaa naz Egipto.
7 Kwaanzee mya xaa Egipto kwaan rese xgann xaa,
xchaap xaa nu re xos xaa.
8 Snee le re xgann Kob,
xaa mya Egipto:
9 Ben,
xaa yilo lo Kob nu re xgann xaa:
Hanoc,
Falú,
Hezrón nu Carmi.
10 Simeón nu re xgann xaa:
Jemuel,
Jamín,
Ohad,
Jaquín,
Zohar nu Saúl,
xaa nak tub xgann me Canaán.
11 Leví nu re xgann xaa:
Gersón,
Coat nu Merari.
12 Judá nu re xgann xaa:
Er,
Onán,
Sela,
Fares nu Zara.
(Nu lee Er nu Onán ngut naz yizhyo Canaán).
Lee re xgann Fares ngok:
Hezrón nu Hamul.
13 Isacar nu re xgann xaa:
Tola,
Fúa,
Job nu Simrón.
14 Zabulón nu re xgann xaa:
Sered,
Elón nu Jahleel.
15 Xaa ne ngok re xgann Lea kwaan Kob,
xaa ngol naz Padan-aram nu tub xchaap xaa Dina.
Lo re xaa nak xaa tub galbchiibchon,
xaabyi nu ngwnaa.
16 Gad nu re xgann xaa:
Zifión,
Hagui,
Ezbón,
Suni,
Eri,
Arodi nu Areli.
17 Aser nu re xgann xaa:
Imna,
Isúa,
Isúi,
Bería nu Sera,
bzan re xaa.
Nu lee re xgann Bería ngok:
Heber nu Malquiel.
18 Lee re xaa ne ngok xgann Zilpa,
me mzaa Labán nke zhiin lo Lea,
zee mzaa Kob mad ne lo me.
Lee re dii cheen me nak chiinmtub lo rese xaa.
19 Lee rop xgann Raquel kwaan Kob ngok:
Che nu Benjamín.
20 Nu lee rop xgann Che ngol naz Egipto ngok:
Manasés nu Efraín,
xaa ngok xgann Asenat,
xchaap Potifera,
xaa nak ngwleyy yezh On.
21 Benjamín nu re xgann xaa:
Bela,
Bequer,
Asbel,
Gera,
Naamán,
Ehi,
Ros,
Mupim,
Hupim nu Ard.
22 Re xaa ne ngok xos Raquel kwaan Kob.
Lee re dii cheen me ne nak chida.
23 Dan nu xgann xaa:
Husim.
24 Neftalí nu re xgann xaa:
Jahzeel,
Guni,
Jezer nu Silem.
25 Lee re xaa ne ngok xgann Bilha,
me mzaa Labán nke zhiin lo Raquel,
zee mzaa Kob mad ne lo me.
Lee re dii cheen me nak gazh lo rese xaa.
26 Re xaa ne mzhin kwaan Kob naz Egipto,
xaa nak leeka dii cheen xaa.
Lee re xaa nak chon gal nzho xoop nu namlot xaa kwent re xngwnaa xgann xaa.
27 Nu rop xgann Che,
xaa ngol Egipto nu rese xaa dii cheen Kob mzeeb Egipto,
lee re xaa nak chon gal nzho chii.
28 Kob mxaal Judá zee ngunabdizh xaa lo Che,
zee ne xaa xomod zhin xaa Gosén.
Nu mzhin xaa yizhyo Gosén.
29 Nu lee Che ngunabeyy,
zee xaal xaa xkaret xaa,
zee kayaa xaa xuz xaa.
Nu gorna mzhin xaa lo xuz xaa,
zee mdeexonn xaa xuz xaa nu mbinn doo xaa lo xuz xaa xche doo.
30 Zee lee Israel nzhé lo Che:
—Nzho mod yet na nal,
nel ngulola ngune na lo lu.
¡Lee lu mbanaka!
31 Nu lee Che nzhé lo re wech xaa nu lo re dii cheen xuz xaa:
—Ya na yé na lo xaa nak faraón:
“Lee wech na nu re dii cheen xuz na,
xaa Canaán,
mzhinla yo kwaan na.
32 Nu lee re wech na nxeen mbakxiil nu ngoon nu nkanap xaa ma.
Mzhin xaa Egipto kwaan rese kwaan nzhap xaa”.
33 Nu gorna kwezh xaa nak faraón gu nu nabdizh xaa lo gu:
“¿Cho zhiin nke gu?”
34 Zee yé gu lo xaa:
“Lee nu nak xaa tubka mxeen mbakxiil mod xey nu”.
Sbaa zee laa xaa yo gu yizhyo Gosén,
nel re xaa Egipto nanyulat re xaa nkanap ma,
yo gax kwaan paro nzho xaa.