Xkop Che
44
Ngulo ndaw re xaa,
lee Che ngunabeyy lo xaa nzho lozhya cheen xaa:
—Tezhe nzhobxtil leen xsak re xaa ne.
Nu blo xtemi kad tub xaa roo xsak xaa.
2 Nu lee roo xsak xaa gwluzh,
lo xkop na kwaan nak plat kwaan xtemi xaa kwaan mdix xaa.
Lee xaa nzho lozhya cheen Che mle mod ngunabeyy Che xaa.
3 Gorna ngunil yizhyo,
zee lee re wech Che mbe xngwes nu nya.
4 Pense nzha mroo re xaa,
lee Che nzhé lo xaa nzho lozhya cheen xaa:
—Gwa ke tich re xaa ba nu gorna yiga xaa lo lu,
yé lu lo re xaa:
“¿Chozhiin mle gu kwaan nawent kwaan xaa mle kwaan wen lo gu?
¿Chozhiin mlewann gu kop plat cheen xaa nkee na zhiin lo?
5 Nel lee kop ne nle xchinn xaa nzho xaa xis ub nu noka nle xchinn xaaya,
zee ne xaa cho kwaan gak.
Wlipa mle gu tub kwaan tira nawent.”
6 Gorna nguga re xaa lo xaa nzho lozhya cheen Che,
nzhé xaa leeka re kwaan nzhé Che lo xaa.
7 Nu lee re xaa mkeb:
—¿Chozhiin sbaa né lu lo nu?
Nu nik tub komba nanlet nu.
8 Lu ne lee nu mbare axta Canaán,
zee zere nu demi kwaan nguzhal nu leen xsak nu.
¿Xomod lewann nu plat nu or garli xaa nke lu zhiin lo?
9 Loka xaa yizhal kop roo xsak,
xaa zee yet nu lee re nu gak xmos lu.
10 Zee lee xaa nzho lozhya cheen Che mkeb:
—Gaka mod né gu,
per nebse xaa yizhal kop roo xsak gak xmos na.
Lee stub naz gu nik tub kwaan nakwibt tich.
11 Zee mla kad tub xaa xsak xaa cho ngwes nu mxal xaa rooya.
12 Zeera lee xaa nzho lozhya cheen Che mkwaan kop leen re sak;
nu mzelo xaa kwaan xsak xaa yilo axta sak cheen xaa gwluzh.
¡Nu mreke kop leen xsak Benjamín!
13 Gorzee lee re wech xaa mchaz xab,
nel nales doo ngok lextoo re xaa.
Zeera mkee re xaa xsak xaa cho ngwes nu mbare xaa naz leen yezh.
14 Gorna lee Judá mzhin kwaan re wech garli Che nu lee Che nzoka baa.
Zee mkich yek re xaa axta mla lachuzh xaa lo yo.
15 Lee Che nzhé lo re xaa:
—¿Cho kwaan kwaane mle gu?
¿Che nanet gu lee na nzho mod ne re kwaan?
16 Lee Judá mkeb nzhé:
—Nyent mod keb na lo lu.
Nu nyent mod luu nu lee nu nak xaa nali.
Dios ne mle nu kwaan nawent.
Lee re nu nee nzho mod le lu re nu xmos lu,
tubka kwaan xaa mbe kop.
17 Per lee Che nzhé:
—Nalet na komba,
nebse xaa mbe kop gak xmos na.
Lee stub naz gu nzho mod bare gu lo xuz gu.
Judá ngunii kwent cheen Benjamín
18 Zee lee Judá mbii gax lo Che nu nzhé:
—Na naab lo lu,
xaa nabeyy,
laa nii na lak kwaan lo lu.
Naab na ke nayiit lu lo na.
Lu nak mod xaa ngok faraón.
19 Lu ngunabdizh lo nu che nkano nu xuz nu nu stub wech nu.
20 Nu lee re nu mkeb lo lu:
“Nkano nu xuz nu,
xaa ngola nu stub wech nu xaa gwluzh,
xaa ngol gorna lee xuz nu ngoxla”.
Nu noka né nu lo lu:
“Nkedoola xuz nu xaa gwluzh,
nel techose xaa mban lo xinn xnaa xaa;
nu lee stub wech xaa ngut”.
21 Zee né lu:
“Yaadno lu xaa gwluzh lo na,
zee labeyy na xaa”.
22 Né re nu lo lu:
“Nagarlot laa xuz nu xaa.
Chelee xaa laa xaa xuz xaa,
zee yet xuz xaa.”
23 Zee né lu lo nu:
“Chelee xaa nayiidt xaa kwaan re gu,
nakayaat na gu”.
24 ’Gorna mbare nu mzhin nu lo xuz nu,
mzaa nu kwent re kwaan né lu lo nu.
25 Zee ngunabeyy xuz nu nu:
“Gwa gu gwaxii gu xeep nzhobxtil”.
26 Lee re nu nzhé:
“Ya nu chelee wech nu xaa gwluzh ya kwaan nu.
Chelee xaa nayat xaa kwaan nu,
nakayaat xaa nu.”
27 Nu lee xuz nu né:
“Ne gu,
lee xgann rop sa nu nak chopaka.
28 Nu lee tub xaa mluxla nu nanetra na lo xaa.
Nu tubka nle na xgab ma wen ndaw xaa.
29 Nu chelee gu wee gu stub xgaan na nu gak tub kwaan nawent lo xaa,
tich gu nzhiba.
Welt ne telise yet na lo yalnales.”
30 ’Sbaa nle xuz na xgab xgann xaa,
xaa gwluzh.
Nu chelee xaa nabaret xaa kwaan nu,
31 xuz nu yet,
chelee xaa nanetra xaa lo xaa.
Sbaa tich re nu nzhiba nu yet xaa lo yalnales.
32 Na nzhé lo xuz na:
“Na kanap xaa gwluzh”.
Nu noka nzhé na:
“Chelee na nabarenot na xaa,
tich na nzhib rese jwalt dubse mbizh mban na”.
33 Kwaanzee naab na lo lu laa gak na xaa ke zhiin lo lu,
xlugar wech na xaa gwluzh.
Laa nya xaa kwaan re wech nu.
34 ¿Xomod bare na garli xuz na chelee wech na nayat kwaan nu?
Nanzheklat na ne na lee xuz na ded stub yalnales.