Benjamín ngwa Egipto kwaan re wech xaa
43
Lee win nzeyak narora yizhyo Canaán.
2 Nu gorna ngulo mlux re nzhobxtil kwaan nguxii xaa Egipto,
zee lee Kob nzhé:
—Gwa gu stub welt,
zee guzii gu xeep nzhobxtil gaw re be.
3 Nu lee Judá mkeb:
—Lee xaa nabeyy Egipto nguné lo nu:
“Chelee gu nayaadnot gu wech gu xaa gwluzh,
nanzhaalt yiid gu lo na”.
4 Sbaa chelee lu laa lu ya Benjamín kwaan nu,
zee yazii nu nzhobxtil.
5 Nu chelee lu nalaat lu ya xaa,
nayat nu,
nel lee xaa nabeyy Egipto né:
“Chelee gu nayaadnot gu wech gu,
xaa gwluzh,
nanzhaalt yiid gu lo na”.
6 Zee lee Israel nzhé:
—¿Chozhiin tant kale gu kwaan nawent?
¿Chozhiin nzhé gu lo xaabyi zee,
lee gu nkano stub wech gu?
7 Nu lee re xaa mkeb:
—Nel lee xaa tubka kanabdizh lo nu ne cho nak re nu nu cho nak re xaa li be.
Nu né xaa:
“¿Che seetaka mban xuz gu?
¿Che nkano gu stub wech gu?”
Nu lee re nu nanetra cho kwaan keb lo xaa.
Namlet nu xgab né xaa:
“Yiidno gu wech gu lo na”.
8 Nu lee Judá nzhé lo xuz xaa Israel:
—Chelee lu nzhekla lu ban be,
laa ya xaa gwluzh kwaan nu,
zee ya nu stub welt.
Sbaa zee nayeta lu nu re nu nu re xinn nu.
9 Na gak xaa kanap Benjamín.
Lo na nii lu.
Nu chelee na nabarenot na xaa lo lu,
tich na kwib rese kwaan tira.
10 Chol nglaa lu nge nu Benjamín,
mropla welt nzha ya nu.
11 Zee lee xuz xaa mkeb lo xaa:
—¡Cheleeya sbaaya,
ble guya!
Be gu lak kwaan leen sak,
zee zelazh gu lo xaa.
Be gu kwaan non kwaan nzaa xkizhyo be:
cheep perfum cheen yag bálsamo,
cheep mzhin,
cheep kwaan nax nzebech,
yaal mirra,
nues nu almendra.
12 Nu be gu chop tant demi;
nu bzaa gu demi kwaan mzere xaa lo gu,
nen che nanguyot xaa.
13 Be gu wech gu,
xaa gwluzh nu gwa gu lo xaa stub welt.
14 Lee Dios,
Xaa Nkano Dubse Yalnabeyy le zee lesla xaa ne xaa re gu,
zee sela xaa stub wech gu nu Benjamín nu zee bare rese gu.
¡Chelee na mlake na kwaan nik tub xgaan na,
lake na kwaan nik tub mad!
15 Lee re xgann Kob mbe kwaan zelazh xaa;
nu mbe xaa re demi kwaan zii xaa nzhobxtil nu noka mbe xaa re demi kwaan mzere xaa lo xaa yilo.
Nu mbe xaa Benjamín nu nzha xaa Egipto;
nu mzhin xaa lo Che.
16 Nu mlaach Che lee Benjamín nzo kwaan re xaa nu nzhé xaa lo xaa nzho lozhya re xcheen xaa:
—Be xaa ne garli na nu bit tub la ngoon nu dexkwaa ma gaw xwe be,
nel rolta mbizh gaw na kwaan re xaa ne.
17 Lee xaa nzho lozhya cheen Che mle re kwaan nzhé Che nu mbe xaa re xaa garli Che.
18 Per lee re xaa mzheb doo,
nel mbe xaa re xaa garli Che nu nzhé re xaa lo wechxinn xaa:
—Xaa ne nzeno be garli xaa,
nel mzere tub xaa xtemi be gorna mbiid be welt yilo.
Lee nal nzhekla xaa zen xaa be nu le xaa be xmos xaa nu lakeka xaa kwaan re xngwes be.
19 Kwaanzee gorna mzhin re xaa roo yoo nu mbii gax xaa lo xaa nzho lozhya cheen Che,
zee nii re xaa lo xaa.
20 Nu nzhé re xaa:
—Xaa nabeyy,
lee welt yilo wlipa mbiid nu mzi nu nzhobxtil.
21 Per lee gorna mzhin nu pa mlaz nu ngoot nu,
mxal nu roo xsak nu nu lee roo tubga sak nzho tub boolsga xtemi nu nu nik tuba nanzho jwalt.
Lee nal nzeno nuya,
zee zere nuya.
22 Nu noka nzeno nu masra demi zee zii nu nzhobxtil.
Per nanet nu cho mlo demi roo sak welt yilo.
23 Lee xaa nzho lozhya cheen Che mkeb:
—Nalet gu xgab,
nixa nazhebt gu;
telise lee Xtios gu nu Xtios xuz gu mlo demi ba roo sak,
nel na mkayaa demi kwaan mdix gu.
Zeera lee xaa mloo Simeón lozhyib nu mbe xaa xaa paro nzo re wech xaa.
24 Zee mbe xaa re xaa naz leen li Che.
Nu mzaa xaa nis mdeeb nii re xaa nu mzaaka xaa kwaan ndaw re ngwes.
25 Nu lee re xaa mloo re kwaan zelazh xaa lo Che.
Nu mlaz xaa yaad xaa rolta mbizh,
nel nela xaa baa gaw re xaa.
26 Gorna lee Che mzhin,
zee lee re xaa mkichxub nu axta mla lachuzh xaa lo yo.
Nu mzelazh xaa re kwaan lo Che.
27 Nu lee Che ngunabdizh ne che wenaka re xaa.
Nu ngunabdizh Che:
—¿Che wenaka xuz gu,
xaa mzaa gu kwent lo na?
¿Che mbanaka xaa?
28 Lee re xaa mkeb:
—Xuz nu mbanaka nu wen nzho xaa.
Nu mkichxub re xaa axta mla lechuzh xaa lo yo.
29 Zee mwii Che nu mlu Benjamín lo xaa,
xaa nak wech xaa,
tubka xuz xaa nu tubka xnaa rop xaa.
Nu nzhé Che:
—¿Chelee wech gu xaa gwluzh,
xaa mzaa gu kwent lo na nzo nee?
Nu nzhé xaa lo Benjamín:
—Dios kanap lu.
Ngulo ngunii xaa kwaane,
30 zee nales doo ngok lextoo xaa ngune xaa lo wech xaa.
Nu mer ngonn xaa,
zee mrexonn xaa lo re xaa nu mya xaa naz leen stub li xaa.
Nu mzelo xaa mbinn xaa.
31 Lee gorna ngulo mbinn Che,
zee mdeeb xaa garlo xaa nu mroo xaa nu nzhé xaa:
—Zaa gu kwaan gaw nu nal.
32 Nu mlek xaa kwaan gaw Che lo tub mes nu lee lo stuba mlek xaa kwaan gaw re xinn Kob nu lo stuba mlek xaa kwaan gaw re xaa Egipto.
(Nel nagarlot gaw re xaa Egipto tubka kwaan xaa hebreo,
nel naka tub kwaan nawent lo re xaa Egipto).
33 Lee re wech Che mzob modxa nzhé Cheya lo xaa,
xaa gro axta xaa gwluzh.
Nu mdedyall doo re xaa nu nebse ngwii tub xaa lo stub xaa.
34 Nu lee Che mzaa kwaan ndaw re xaa,
per lee lo Benjamín mzaa xaa gaay welt masra ke lo stub naz wech xaa.
Nu rese xaa ndaw nu ngu kwaan Che nu nix doo ngok lextoo re xaa.