Re wech Che ngwa naz Egipto
42
Gorna mbin Kob nzho nzhobxtil naz Egipto,
zee nzhé xaa lo re xinn xaa:
—¡Cho kwaan kale gu baa nu ngwii gu lo tub gu nu lo stub gu!
2 Mbin na naz Egipto nzho nzhobxtil,
kwaanzee gwa gu nu bzi guya gaw be,
zee nayeta be.
3 Zee lee re chii wech Che ngwa zii nzhobxtil Egipto.
4 Per lee Kob namzaat diizh ya Benjamín,
xaa nak wech Che,
nel mle xaa xgab napa kayak tub kwaan nawent lo xaa.
5 Noka lo re xinn Kob ngwa stub naz xaa,
xaa zii nzhobxtil,
nel dubse Canaán mla win.
6 Che nak xaa nabeyy yizhyo Egipto,
xaa mto nzhobxtil lo re xaa nze rese pa.
Lee gorna lee re wech xaa mzhin lo xaa,
zee mkichxub xaa lo xaa axta mla lechuzh xaa lo yo.
7 Zee lee Che mlabeyy re wech xaa gorna mlu xaa lo xaa;
nu mle xaa kwenta xaa namlabeyyt xaa.
Nu ya doo ngunii xaa lo xaa:
—¿Pa naz nze gu?
Nu lee re xaa mkeb:
—Lee nu nze naz Canaán,
zee zii nu nzhobxtil.
8 Nixa mlabeyy Che re wech Che,
per lee re xaa namlabeyyt xaa.
9 Zee lee Che mselazh re mkaal kwaan mchaa lextoo xaa kwaan re wech xaa nu nzhé xaa:
—¡Gu nak xaa nze sewii xlaan!
Nebse nze gu ne gu paro ded re xaa gu dil kwaan re xaa nu.
10 Nu lee re xaa mkeb:
—Aa,
xaa nabeyy nu nebse nze zii nzhobxtil.
11 Rese nu nak xinn tubka xuz nu,
wen nak nu.
Nanakt nu xaa nze sewii xlaan.
12 Zeera lee Che nzhé:
—¡Nawlita!
Gu nze nebse wii nel paro ded re xaa gu.
13 Nu lee re xaa mkeb:
—Lee nu nak chiibchop wech,
xinn tubka xuz nu,
nze nu naz yizhyo Canaán.
Lee wech nu xaa gwluzh,
mlakeka kwaan xuz nu nu lee stub xaa nanzotra kwaan nu.
14 Zee lee Che nzhé lo xaa stuba:
—¡Modxa ni na,
gu nak xaa nze sewii xlaan,
zee nen paro nzho mod ded re xaa gu!
15 Lee nal,
nen che wli guya.
Wlipa na mod nabeyy xaa nak faraón,
naroot gu nee axta gorna yaad stub wech gu,
xaa gwluzh.
16 Ya tub gu zee yaxii gu wech gu,
xaa gwluzh;
nu lee re gu lakeka lozhyib.
Zee nen che wli kwaan né gu;
nu chelee nawlita,
zee si nak gu xaa nze sewii xlaan zee ne paro ded re xaa gu.
—Nzheb na ne na Dios.
Ble gu kwaane,
zee nayeta gu.
19 Chelee gu nak gu xaa wen,
laa gu tub wech gu lozhyib,
lee stub naz gu nya nu wee nzhobxtil,
zee gaw re xaa garli gu.
20 Zeera yiidno gu wech gu,
xaa gwluzh,
zee ne be che nali nak gu,
zee nayeta gu.
21 Nu mbezh tub xaa lo stub xaa:
—Wlipa nawent mle be lo wech be.
Nu mod ne be lo re yalnales kwaan mded xaa.
Leezha ngunaab xaa lo be,
nambint beya.
Kwaanzee mzhin ngok nales be nal.
22 Zee lee Ben mkeb nu nzhé:
—¿Che nanguniit naya lo gu yilo:
“Nalet be kwaan nawent lo xaa mad”?
Nu nambint guya.
Lee nal nales kaded be xkwent xaa.
23 Nu lee re xaa nanet che nzhon Che re kwaan kanii xaa,
nel ngu tub xaa mted xtizh re wech xaa lo xaa.
24 Zee mbachii Che lo re wech xaa nu mzelo xaa mbinn xaa.
Lee gorna mbare xaa paro nzhi re xaa,
zee ngunabeyy xaa,
zee mzen xaa Simeón ngu lozhyib.
25 Zee ngunabeyy Che lo xaa mtezhe nzhobxtil leen sak nu mzere xaa xtemi kad tub xaa,
leeka roo xsak xaa.
Nu noka mzaa xaa kwaan mbe xaa ndaw xaa naz.
Sbaa mle xaa lo re wech xaa.
26 Zee lee re xaa mkee sak nzhobxtil cho ngwes nu mroo nya.
27 Gorna mzhin xaa paro mlaz xaa yaal,
zee ngu tub xaa mxal roo sak,
mzaa nzhobxtil gaw ngwes.
¡Zee mlaach xaa lee demi nzho roo xsak xaa!
28 Zee nzhé xaa lo re wech xaa:
—¡Laach gu!
¡Chogol mzere xaa xtemi na roo xsak na!
Rese xaa mzheb nu mxiz doo lo yalnacheb.
Nu nzhé xaa lo tub xaa nu lo stub xaa:
—¿Cho kwaan kwaane mle Dios?
29 Gorna mzhin xaa Canaán,
mzaa xaa kwenta lo xuz xaa Kob,
rese kwaan mded xaa nu nzhé xaa:
30 —Lee xaa nabeyy lo yizhyo zee ngunii tub mod gaya doo lo nu.
Nu mgaazh xaa kwaan tich re nu nu né xaa:
“Gu nze sewii xlaan ne paro ded re xaa gu”.
31 Nu lee nu nzhé:
“Lee nu nak xaa wen.
Nanakt nu xaa nze sewii xlaan.
32 Chiibchop nak re wech nu.
Tubka xuz re nu.
Lee tub xaa nanzotra lo nu nu lee xaa gwluzh mlakeka lo xuz nu naz Canaán.”
33 Zee lee xaa né:
“Kwaane le na zee ne na che wli nak gu xaa wen.
Laa gu tub wech gu lo na,
lee re gu wee nzhobxtil gaw xaa nzho garli gu.
34 Per yiidno gu wech gu xaa yeen,
lo na.
Sbaa zee ne na,
wli nak gu xaa wen nu nanakt gu xaa nze sewii xlaan.
Zee nzho mod za na wech gu wee gu xkizhyo gu.
Zee nzho mod zii gu kwaan nee.”
35 Lee gorna mloo xaa nzhobxtil leen re sak,
re wech xaa mwii lee bools demi nzho roo sak cheen kad tub xaa.
Nu gorna mwii re xaa lo re bools demi,
mzheb doo xaa nu noka xuz xaa mzheb.
36 Zee lee Kob nzhé:
—¡Gu kalake na kwaan nik stub xgaan na!
Che nazotra kwaan re be nu nixa Simeón.
¡Nu nal noka kiib xaa Benjamín lo na!
Lo na kayak rese kwaane.
37 Zee lee Ben nzhé lo xuz:
—Laa kanap na Benjamín nu na bareno Benjamín lo lu stuba.
Nu chelee na nabarenot na Benjamín,
zee nzho mod gut lu rop xgaan na.
38 Zee lee Kob mkeb:
—¡Xgaan na nayat kwaan gu!
Wech gu Che ngutla nu nebse Benjamín nzo lo na.
Napa cho kwaan kayak xaa naz,
zee tubka deed na yalnales dubse mbizh mban na axta gorna yet na.