Che mzaa kwent cheen xmkaal xaa ngok faraón
41
Mded chop liin,
ngu tub mbizh mchaa lextoo xaa ngok faraón.
Nzak xaa lee xaa nzo roo yuu.
2 Nu roo yuu mroo gazh la bak,
ma chul na nu nachaa doo mlu lo xaa,
ma kayaw yix nzeb roo yuu.
3 Nu tich re bak,
mroo gazh la bak brek,
ma nawent nzhak,
ma nzo leeka roo yuu gaxaka paro nzo re ma wen na.
4 Zeera lee bak ma brek nu nawent nzhak ndaw gazh la bak ma chul na nu ma nachaa.
Nu lee xaa ngok faraón mroo mkaal lo,
5 zeera mbare xaa mchaa lextoo xaa stuba.
Mlu gazh sonn nzhobxtil lo xaa kwaan nyazhe nzhob leen nu chul doo na.
Nu tuka yek goob nzob gazh sonn.
6 Nu gwluzh loya mroo stub gazh sonn kwaan nyent leen nu neb yix nak,
kwaan mzek mbi kwaan nze naz lo yo bizh.
7 Nu lee sonn kwaan nguk ndaw gazh sonn kwaan chul na,
kwaan nyazhe nzhobxtil leen.
Nu lee xaa ngok faraón mroo mkaal lo nu zee mzeen xaa goka tub mkaal.
8 Nu garziil stub mbizh,
mle doo xaa xgab nu ngunabeyy xaa,
zee yiid re wezh nu re xaa nzhak,
xaa nzho Egipto.
Nu lee xaa ngok faraón mzaa kwent kwaan mchaa lextoo xaa,
per nik tub xaa nyent mod zaa kwent cheen kwaan nii xmkaal xaa.
9 Zee lee xaa nabeyy lo xaa ngaxkwaa xis ub nzhé lo xaa ngok faraón:
—Nal mselazh na re kwaan nawent mle na.
10 Leezha nayii lu lo xaa nabeyy lo re xaa ngaxkwaa yat nu mlo lu xaa lozhyib kwaan na,
leezha ngunabeyy lu ngu rop nu lozhyib cheen xaa nabeyy re xsoldad lu.
11 Ngu tub yaal mchaa lextoo xaa nabeyy lo re xaa ngaxkwaa yat nu noka mchaa lextoo na.
Nu kad kwaan mchaa lextoo nu nii tub kwaan.
12 Nu zee nzho tub xaa mad,
xaa hebreo,
lo nu,
xaa nak xaa nke zhiin lo xaa nabeyy lo xsoldad lu.
Zee mzaa nu kwent kwaan mchaa lextoo nu lo xaa nu lee xaa ne né cho kwaan niiya.
13 Nu mod né xaa ngok rese kwaan;
nu na mbare lo xchinn na stub welt nu lee stub xaa mzob yek stak.
14 Zee lee xaa ngok faraón ngunabeyy zee yaad Che.
Nu zoza mloo xaa Che lozhyib.
Nu lee xaa mchub yichyek xaa nu xlox xaa nu mchee xaa xab xaa,
zee mzo xaa lo xaa ngok faraón.
15 Nu lee xaa ngok faraón nzhé lo xaa:
—Mchaa lextoo na nu nyent cho nzho mod né cho kwaan niiya.
Mbin na lee lu gorna gon lu kwaan nchaa lextoo xaa,
nzho mod zaa lu kwent cho kwaan niiya.
16 Zee lee Che mkeb lo xaa ngok faraón nzhé:
—Nalet naya,
per lee Dios né cho kwaan mchaa lextoo lu.
17 Zee lee xaa ngok faraón nzhé lo Che:
—Lee mkaal kwaan mchaa lextoo na nak,
nzak na lee na nzo roo Yuu Nilo.
18 Nu lee roo yuu mroo tub gazh la bak,
ma nachaa doo nu chul doo na nu kayaw ma yix roo yuu.
19 Nu tich re ma,
mroo stub gazh la bak,
ma brek nu ma nawent nzhak,
ma nik tub welt zer ne na lo dub yizhyo Egipto.
20 Nu noka nzak na,
lee bak brek ma nawent nlu,
ndaw gazh la bak ma chul na.
21 Nu nixa ngulo ndaw ma ma,
seetaka brek nlu ma modxa mlu ma yilo.
Ta mroo mkaal lo na.
22 ’Zeera mchaa lextoo na stuba kwaan nak,
gazh sonn nzhobxtil,
kwaan chul nlu nu nyazhe nzhobxtil leen,
kwaan mxen lo tuka goob.
23 Nu gwluzh lo re kwaane mxen stub gazh sonn nzhobxtil kwaan neb yix nak,
kwaan mzek mbi kwaan nze naz yizhyo bizh.
24 Noka nzak na,
lee sonn nzhobxtil kwaan nguk ndaw gazh sonn nzhobxtil kwaan chul nzhak.
Na mza kwent kwaane lo re wezh,
per nik tub wezh nanet cho kwaan naka.
25 Zee lee Che mkeb lo xaa ngok faraón:
—Lee rop mkaal kwaan mchaa lextoo lu nak tubka kwaan.
Dios mlu lo lu cho kwaan nzhaal le xaa.
26 Gazh la bak ma chul na nak gazh liin nu lee gazh nzhobxtil kwaan chul na nak gazh liin,
lal nii ropse kwaane.
27 Lee gazh la bak brek,
ma mroo gwluzh lo re ma chul na nak gazh liin nu noka lee gazh sonn neb yix nak,
mzek mbi kwaanzee naz pa nlen mbizh.
Nii la win gazh liin.
28 Mer mod ngunii naya lo lu,
Dios mlu lo lu cho kwaan le xaa.
29 Nu yizhyo Egipto kano tub gazh liin yo doo yalgon.
30 Per lee gwluzh,
zeera nze stub gazh liin paro nayotra kwaan gaw xaa.
31 Lee gorna lee kwaane gak,
zee nik tub xaa naselazht re yalgon kwaan ngu;
nu la win dubse yizhyo.
32 Per lee kwaan mchaa lextoo lu rop welt lal niiya.
Nu wlipa le Diosa;
nu naxchetra le xaaya.
33 ’Lee nal naab na lo lu,
zee kwaan lu tub xaa nzhak nu zo lu xaa lo dubse yizhyo Egipto.
34 Nu noka kwaan lu xaa zee toop xaa,
tub part lo gaay part lo re yalgon dubse tub gazh liin,
gorna yo zyen yalgon.
35 Dubse tub gazh liin wen doo yaad,
zaa yalnabeyy zee toop xaa yalgon nu kozhaw xaaya rese yezh.
36 Nu yalgon kwaan yizhaw zee,
le xchinn xaaya re gazh liin gorna la win naz Egipto.
Nu snee nanet be win lo yizhyo ne.
Lee Che ngok xaa nabeyy Egipto
37 Lee xaa ngok faraón nu re xaa xaa mwii wen nak kwaan nzhé Che.
38 Nu lee xaa ngok faraón nzhé lo re xaa nke zhiin:
—¿Che nel nzhora stub xaa kwenta xaa ne,
xaa nkano Mbi Naban cheen Dios?
39 Nu noka nzhé xaa ngok faraón lo Che:
—Nyentra stub xaa mas nayeex nu nzhak kwenta lu,
nel Dios mzaa rese kwaane lo lu.
40 Lee nal,
lu nabeyy garli na nu kwaan xtizh lu nabeyy lu rese yezh Egipto,
per lee na gak xaa nabeyy lo lu.
41 Nu noka nzhé xaa ngok faraón lo Che:
—Lee nee,
nal mzo na lu zee nabeyy lu dubse yizhyo Egipto.
42 Zee lee xaa ngok faraón mloo ani yaa kwaan nak sey nu mlo xaaya kwen yaa Che.
Nu noka msegak xaa Che kwaan tub ler wen doo;
nu mlo xaa tub nguzbga yenn Che kwaan nak or.
43 Nu mtexoob xaa xaa leen karet,
cheen xaa nabeyy nu rese xaa mbezh lo xaa:
“Kich yek gu lo xaa”.
Snee ngok zee mzo xaa ngok faraón Che,
zee nabeyy xaa dubse Egipto.
44 Zee nzhé xaa ngok faraón lo Che:
—Na nak faraón nu rese xaa nzhaal le kwaan yé lu.
45 Zee lee xaa ngok faraón mchee le Che nu mloole xaa xaa Zafnat-panea nu mzaa xaa tub sa xaa,
me le Asenat xchaap Potifera,
xaa nak ngwleyy yezh On.
Ngulo mded kwaane lee Che mzelo ngunze dubse Egipto.
46 Nzho Che tub galbchii liin leezha ngwa xaa lo xaa ngok faraón,
rey Egipto;
nu mzelo xaa ngunze xaa dubse Egipto.
47 Lee yizhyo mzaa doo yalgon dubse gazh liin.
48 Nu lee Che mtoop re yalgon dubse yizhyo nu mlochaw xaaya leen rese yezh pa mxena dubse gazh liin.
49 Nu mtoop Che zyen doo yalgon kwenta yux kwaan nzhi roo nistoo nu myenlazh xaa ne paroya nzha toop xaa.
Nu namgarlotra mbe xaa kwent.
50 Re liin gorna zer zelo win la,
Che mkano chop xgann kwaan sa xaa Asenat.
51 Lee xaa yilo mloole xaa Manasés,a
nel nzhé xaa:
“Dios mle zee myenlazh na rese yalnales kwaan mdeed na nu re sawlizh na”.
52 Lee mad rop mloole xaa Efraín,b
nel nzhé xaa:
“Dios mle zee mkano na stub xgaan na,
xaa nak kwenta xle kwaan mzaa yizhyo ne paro nales doo mdeed na”.
53 Ngulo mded gazh liin cheen yalgon kwaan tant ngok yizhyo Egipto
54 nu mzelo gazh liin mla win,
modxa nzhé Che.
Nebse yizhyo Egipto ngu kwaan gaw xaa,
per rese stub yizhyo nyent kwaan gaw xaa.
55 Lee gorna nyentra kwaan gaw xaa Egipto,
zee mzelo xaa ngunaab xaa nzhobxtil lo xaa ngok faraón.
Zee lee xaa ngok faraón nzhé lo re xaa Egipto:
—Gwa gu lo Che nu le gu kwaan né xaa.