Che mzaa kwent cheen chop mkaal
40
Gwluzh lo re kwaan ba,
lee xaa nabeyy lo re xaa ngaxkwaa xiz ub kwaan nzho xaa ngok faraón,
xaa ngok rey Egipto nu noka xaa nabeyy lo re xaa ngaxkwaa yat,
mle tub kwaan nawent lo xaa ngok faraón.
2 Nu lee xaa ngok faraón nayii doo lo rop xaa nabeyy lo xaa ngaxkwaa xiz ub nu xaa ngaxkwaa yat.
3 Nu mlo xaa xaa lozhyib leeka tub pa nabeyy xaa nzo roo lozhyib,
leeka pa nzho Che lozhyib.
4 Lee xaa nabeyy lozhyib mzaa diizh lo Che kanap Che rop xaa.
Nu xche doo ngu rop xaa lozhyib.
5 Ngu tub yaal mchaa lextoo rop xaa nzho lozhyib,
xaa nabeyy lo xaa ngaxkwaa xis ub nu xaa nabeyy lo re xaa ngaxkwaa yat.
Kad kwaan mchaa lextoo xaa,
nii tub kwaan.
6 Garziil,
gorna lee Che mzhin mwii lo rop xaa,
lee rop xaa nales doo nzhak lextoo xaa nu nle doo xaa xgab.
7 Nu sbaa ngunabdizh Che lo rop xaa:
—¿Chozhiin tant nales doo nlu gu nalzhe?
8 Lee xaa mkeb:
—Mchaa lextoo nu nawzhezee nu nyent cho zaa kwent lo nu cho kwaan naka.
Zee mkeb Che:
—Dios nzaa kwent cho kwaan naka.
Zaa gu kwent cho kwaan mchaa lextoo gu lo na.
9 Zee lee xaa nabeyy lo re xaa ngaxkwaa xis ub mzaa kwent kwaan mchaa lextoo xaa lo Che.
—Snee mchaa lextoo na.
Mlu tub xan yag ub lo na,
10 kwaan nkano chon ram.
Nu lee yag ub ta mzhib ben,
nzak na.
Nu noka ta mzhib yeey loya nu ram yeey zee ta ngok ub nguy,
nzak na.
11 Nu nzak na,
lee na nzho bas cheen xaa nak faraón yaa,
kasii na ub leena.
Zeera nzak na,
leeka na mza bas lo xaa nak faraón.
12 Nu lee Che nzhé:
—Lee mkaal kwaan mchaal lextoo lu nii kwaane.
Chon ram nak chon mbizh.
13 Yilo ded yon mbizh ne,
lee xaa ngok faraón kwezh lu,
zee bare lu zaa lu xis ub lo xaa stub welt;
nu nabeyy lu stub welt lo re xaa ngaxkwaa xis ub kwaan nzho xaa ngok faraón,
modxa mle lu yilo.
14 Gorna gak kwaane,
zee selazh lu na nu naab na lo lu zaa lu kwent cheen na lo xaa nak faraón,
zee koo xaa na nee.
15 Lee na mle wann xaa naz yizhyo pa nzho re xaa hebreo.
Nanzhaalt yoo na lozhyib,
nel nik tub kwaan nawent namlet na.
16 Gorna ngune xaa nabeyy lo re xaa ngaxkwaa yat,
wen mzaa Che kwent,
zee nzhé xaa:
—Lee na mchaa lextoo,
mkano na chon chekwid yat nax nzob yek na.
17 Lee chekwid kwaan nzob naz ya nzho re lo yat leen kwaan gaw xaa nak faraón,
nzak na.
Nu nzak na,
lee re mbyin nze nzhaw kwaan nzho leen chekwid kwaan nzob yek na.
18 Zee lee Che mkeb:
—Lee kwaan mchaa lextoo lu nii kwaane:
lee chon chekwid yat nii chon mbizh.
19 Nu lee mbizh yon,
lee xaa nak faraón kwezh xaa lu nu choog xaa yek lu,
zee zob xaa lu yek tub stak nu lee ngolbech yiid gaw baal cheen lu.
20 Lee yon mbizh gwluzh,
nguxoob xaa ngok faraón liin.
Kwaanzee mle xaa tub yalni naro nu mrezh xaa rese xaa nke zhiin lo xaa.
Noka mrezh xaa xaa nabeyy lo re xaa ndexkwaa xiz ub nu xaa nabeyy lo re xaa ndexkwaa yat,
xaa nzho leen lozhyib.
21 Nu lee xaa nabeyy lo re xaa ndexkwaa xis ub,
mzaaka xaa zhiin lo xaa.
22 Per lee xaa nabeyy re xaa ndexkwaa yat,
zee mchoog xaa yek xaa nu mzob xaa xaa yek tub stak,
modxa nzhé Che lo rop xaa.
23 Nu lee xaa nabeyy lo re xaa ndexkwaa xis ub,
tira myenlazh Che.