Che nu xngwnaa Potifar
39
Gorna mbe dii cheen Ismael Che naz Egipto,
tub xaa Egipto le Potifar,
xaa non lo xaa ngok faraón xaa ngok rey Egipto nu xaa nabeyy lo re soldad,
xaa nkanap xaa ngok faraón mzi xaa Che lo xaa.
2 Nu wen ngu Che garli Potifar xaa nabeyy xaa,
nel Xaa Tubka Nak nzo kwaan lee xaa.
3 Zee lee Potifar ne lee Xaa Tubka Nak nzo kwaan Che nu sbaa rese kwaan nle xaa wen nzhak.
4 Kwaanzee wen doo ngune Potifar Che nu mzaa xaa rese kwaan ngu lozhya Che.
5 Nu mbizh kwaan mzaa Potifar rese kwaan ngu lozhya Che,
zee lee xaa Xaa Tubka Nak mle zyenra xcheen Potifar,
lo re kwaan nzho li xaa nu re kwaan nzaa xleyo xaa.
6 Nu mlaa xaa rese kwaan nkano xaa lo Che nu kwaanzee namletra xaa stub xgab nik tub kwaan,
nebse kwaan gaw xaa nu kwaan go xaa.
—Kano na.
8 Per lee Che namzeyalt nu nzhé xaa lo xngwnaa xaa nabeyy lo xaa:
—Ne lu lee Potifar mlaa rese kwaan lo na nu mlaa xaa rese xcheen xaa nu nik tub xgab nanletra xaa.
9 Nu leen yoo ne nyentra stub xaa nonra lo na.
Nu nik tub kwaan namlaat xaa diizh nalet na,
nebse lu mlaa xaa nawiit na lo.
Lee lu nak xngwnaa xaa,
kwaanzee ¿xomod kano na lu?
Nalet na jwalt lo Xtios na.
10 Nu nixa rese mbizh nle me jwers lo xaa,
zee kano xaa me,
per lee xaa namlet kas me.
11 Per lee stub mbizh mzeeb Che leen yoo,
zee le xaa xchinn xaa nu nik stub xaa nyent leen yoo.
12 Nu lee me mzen xab xaa nu nzhé me lo xaa:
—Kano na.
Per lee xaa mrexonn nu mlakeka xaa xab xaa lo me.
13 Gorna ngune me lee xab xaa nzhoka yaa me nu mroo xaa leen yoo,
14 zee mrezh me re xaa nke zhiin leen yoo nu nzhé me:
—Wii gu,
lee sa na myaadno tub me hebreo,
me kale kwaan nawent lo nu nal nu né me lo na:
“Kano na lu”.
Per lee na nye doo mkee bi.
15 Nu gorna mbin me lee na nye doo mkee bi,
zee mrexonn me nya me,
zee mlakeka me xab me lo na.
16 Zee lee me mlozhaw xab Che nu axta gorna lee sa me mbare,
17 zee lee me nzhé leeka kwaan nzhé me yilo.
Nu nzhé me:
—Lee me hebreo me ngwaxii lu,
me nke zhiin mzeeb leen yoo pa nzhoo na nu nzhekla me ngbe me na,
18 per gorna nye mkee na bi,
zee mrexonn me nya me nu mlaa me xab me lo na.
19 ¡Sbaa mle me nke zhiin lo be!
Zee lee Potifar nayii doo lo Che gorna mbin xaa re kwaan nzhé xngwnaa xaa lo xaa,
20 zee mzen xaa Che nu mlo xaa xaa lozhyib cheen xaa ngok faraón,
zee ngu xaa lozhyib.
21 Nu lee Xaa Tubka Nak nzo kwaan Che nu nlu xaa yalnkela cheen xaa lo xaa;
nu mle xaa zee lee xaa nabeyy roo lozhyib le wen lo xaa.
22 Lee xaa nabeyy roo lozhyib mzaa diizh nabeyy Che lo re xaa nzho leen lozhyib nu le xaa rese zhiin kwaan nle xaa nabeyy roo lozhyib.
23 Per lee xaa nabeyy roo lozhyib nanlet xgab wii lo re kwaan nle Che,
nel Xaa Tubka Nak nzo kwaan lee xaa nu lo rese kwaan nle xaa,
wen nzhak.