Judá nu Tamar
38
Lee re mbizh zee,
Judá mroo lo re wech xaa nu nya xaa ngu xaa garli tub xaa le Hira,
xaa nak yezh Adulam.
2 Baa mlabeyy xaa xchaap Súa,
xaa Canaán.
Nu mka xaa me nu gorna mchaal xaa me,
3 zee tira mbeyxinn me nu ngol xgann rop xaa me,
xaa le Er.
4 Nu mbare me mbeyxinn me stuba.
Ngol stub xgann me,
xaa le Onán.
5 Nu mbare me mbeyxinn me stuba.
Ngol stub xgann me,
xaa le Sela,
gorna lee me nzo yezh Quezib.
6 Zee lee Judá ngwake xngwnaa xgann xaa,
xaa yilo lo xaa,
xaa le Er.
Nu lee me le Tamar.
7 Nu lee Er,
xaa yilo lo Judá mle nawent lo Xaa Tubka Nak,
zee mbit Dios xaa.
8 Zee lee Judá nzhé lo Onán:
—Bchaal Tamar,
me nak byud cheen wech lu,
zee lake tub dii cheen wech lu,
mod nak kostumbr cheen re be.
9 Nu ne Onán lee mad kwaan gal nagakt xgann Onán,
zee gorna nchaal xaa me zee nanyilot nchaal xaa me mod nzhaal le xaaya,
sbaa nalaat xaa dii cheen wech xaa.
10 Zee lee Xaa Tubka Nak nanyulat mod nle Onán,
zee noka lee xaa mbit Dios.
11 Nu lee Judá nzhé lo Tamar xix xaa:
—Lake gok byud nu gu garli xuz lu axta gorna lee xgaan na,
Sela,
gap xeep liin.
Nanzheklat xaa noka yet Sela mod ngut rop wech xaa.
Zee lee Tamar nya ngu garli xuz me.
12 Nzha ded zyen liin zee ngut xchaap Súa,
xngwnaa Judá.
Zee lee Judá gorna ngok wen xaa lo re yalnales cheen xaa,
ngwa xaa yezh cheen Timnat.
Nu ngwa xaa lo re xaa kachub yich led xpakxiil xaa.
Nu ngwa xaa kwaan Hira,
xaa nak yezh Adulam,
xaa nyenn xaa.
13 Gorna ne Tamar lee xazhap me Judá nzha Timnat,
14 zee mchee me xab me kwaan nagaas na kwaan nzhak me,
zee ngwa me nu msaaw me tub lee ler yek me,
zee nyent cho nzho mod labeyy me.
Zee nzha me mzo me roo yezh Enaim,
roo naz kwaan nya naz Timnat.
Kwaane mle nel mzeen me ngulola mxen Sela nu zeeraka zaa Judá xaa ka me.
15 Gorna ngune Judá lo me,
mle xaa xgab me nto cho nak me,
nel lee me tira nyaaw garlo.
16 Zee mroo xaa naz nu nzha xaa lo me nu nixa nanet xaa che leeka xix xaaya.
Nu nzhé xaa lo me:
—¿Che zeyal lu kano na lu?
Lee me nzhé:
—¿Cho kwaan zaa lu lo na zee kano lu na?
17 Nu lee xaa mkeb:
—Lee na za tub mit ma kaxeen na.
Zee lee me nzhé:
—Mbay,
per laa lu tub xcheen lu lo na nu gorna zaa lu ma,
zee zere naya.
18 Lee Judá nzhé:
—¿Cho kwaan nzhekla lu za na?
Nu lee me mkeb:
—Zaa sey kwaan nzho yenn lu nu kwaan nkado sey nu noka zaa xkag lu.
Zee lee Judá mzaaya nu mkano xaa me nu ta mbeyxinn me.
19 Zee lee me nguxche nu nya;
nu mkiib me kwaan nsaaw me garlo me nu ngok me xab me kwaan nagaas na.
20 Nu lee Judá mzaa mit lo xaa nyenn xaa,
xaa yezh Adulam,
zee zere me kwaan mlaa xaa lo me.
Per lee xaa nyenn xaa nanguzhaltra me lo.
21 Zee ngunabdizh xaa lo re xaa nzho baa:
—¿Pa nzo me nto cho me Enaim,
me nzob roo naz baa?
Nu lee re xaa nzhé:
—Nik tub me nto cho nyent nee.
22 Zee mbare xaa lo Judá nu nzhé xaa:
—Nanguzhalt na me nu noka re xaa yezh ba né:
“Nik tub me nto cho nyent nee”.
23 Nu lee Judá mkeb:
—Laa ka me re kwaan,
napa kaxizhno re xaa na.
Nzhekla na ngza na miit ne nka me,
per nanguzhalt me lo lu.
24 Nzha chon mbee,
tub xaa nzhé lo Judá:
—¡Wlipa na,
lee xix lu Tamar mkano stub xaa,
lee nal nakxinnla me!
Per lee Judá mbazhe:
—¡Bloo gu me nu bzek gu me!
25 Lee mer gor kwaan kagoo xaa me,
lee me mxaal wdizh lo xuzyee me,
snee:
—Lee xaa nak cheen re kwaane nak xaa mlaa mad lo na.
Wen wii,
¿cho cheen nak sey ne nu kwaan nkadooya nu yag?
26 Gorna lee Judá mlabeyy re kwaan,
zee nzhé xaa:
—Lee me mle nali nu na mle nawent,
nel namzat na Sela,
xgaan na lo me.
Nu namkanotra xaa me.
27 Lee mbizh gorna ngol mad,
zee ngol kwech.
28 Nu gorna kayal madoo,
zee lee tub madoo mloo yaa;
nu lee me nzen mad mkadoo tub yil naxne yenn yaa madoo.
Nu nzhé me:
—Mad ne nze yilo.
29 Nu leeka gorzee mre mad yaa wech mad mad ngol yilo.
Kwaanzee lee me nzen mad mloole mad Fares,a
nu nzhé me:
—¿Xomod mxal lu pa mded lu?
30 Zeera ngol wech mad,
mad mkado yil naxne yenn yaa.
Nu mloole me mad Zara.b