Kwaan mchaa lextoo Che
Gorna lee Che nzhap chiinmchop liin,
zee mkano xaa mbakxiil kwaan re wech xaa,
xinn Bilha nu xinn Zilpa.
Nu lee Che mbezh rese kwaan nawent kwaan nle re wech xaa lo xuz xaa.
3 Nu lee Israel nkelara Che ke stub naz re wech xaa,
nel ngol xaa gorna ngoxla xaa.
Kwaanzee mdexkwaa xaa tub xab xaa kwaan chul doo na.
4 Per gorna lee re wech xaa mzeen lee xuz xtii Israel nkelara Che,
zee mzelo re xaa ngune nawent xaa nu nixa naniitra xaa lo xaa.
5 Lee tub mbizh mchaa lextoo Che nu nzhé xaaya lo re wech xaa nu mas nayii re xaa ne xaa,
6 nel nzhé xaa:
—Kenzha gu,
lee na ni cho kwaan mchaa lextoo na.
7 Mchaa lextoo na lee rese be nzo wen nu kakado be manoj nzhobxtil nu lee xmanoj na ta mzoli wen,
per lee xcheen gu mri dub welt loya nu mkich yeka lo xmanoj na.
8 Kwaanzee lee re wech xaa mkeb nzhé:
—¿Che kas nzhekla lu né lu,
lee lu gak rey lo re nu nu nabeyy lu nu?
Zee mas nayii re xaa ne xaa,
mod mchaa lextoo xaa nu mod nzhé xaaya.
9 Gwluzh zee mchaa stub mkaal lextoo Che nu noka nzhé xaaya lo re wech xaa snee:
—Lee lextoo na mchaa lee mbizh,
mbee nu chiibtub mbal yiba mkich yek lo na.
10 Gorna ngulo nzhé xaa kwaane lo xuz xaa nu lo re wech xaa,
zee lee xuz xaa namzaat yek mbina.
—¿Cho kwaan nzhekla lu né lu kwaan xmkaal lu?
¿Kas nzhekla lu lee xnaa lu nu re wech lu nu leeka na kich yek lo lu?
11 Nu lee re wech xaa nayii ne xaa,
per lee xuz xaa mzob mle xgab kwaane.
12 Lee tub mbizh,
lee re wech xaa ngwano re xpakxiil xuz xaa naz yizhyo Siquem.
13 Zee lee Israel nzhé lo Che:
—Lee nal lee re wech lu nkano re ma naz yizhyo Siquem.
Nzhakla na ya lu zee yasewii lu lo re xaa.
Zee lee Che mkeb:
—Ena.
14 Nu lee Israel nzhé:
—Gwasewii nel ma re xaa nu re mbakxiil,
zeeta bare lu zee né lu nen xomod nzhi re xaa.
Nu mxaal xaa xaa naz yizhyo Hebrón nu mzhin xaa naz Siquem.
15 Zee mzhaal Che tub xaa naz wen,
zee ngunabdizh xaa lo Che:
—¿Cho nkwaan lu?
16 Zee lee Che mkeb:
—Lee na nkwaan re wech na.
Nabdizh na lo lu,
¿che nanet lu pa naz nzhano xaa mbakxiil?
17 Nu lee xaa zee mkeb:
—Nyala xaa nee.
Nebse mbin na lee xaa nzhé:
“Ya nu yezh Dotán”.
Zee lee Che ngwa kwaan re wech nu nguzhal xaa xaa naz Dotán.
18 Nu zitra mwii xaa lee Che nze,
zee mdizh xaa zee nen xomod ngut xaa xaa.
19 Nzhé xaa lo tub xaa nu stuba xaa:
—¡Wii gu,
lee kwaan mchaa lextoo nze nee!
20 Te re gu,
zee gut be xaa;
zee cheep be xaa leen bzo,
zee yé be nzho cho ma wen ndaw xaa.
Zee ne be nen cha zak kwaan mchaa lextoo xaa.
21 Gorna mbin Ben kwaan ba,
nzhekla xaa le xaa yud wech xaa nu nzhé xaa lo re wech xaa:
—Naguta be xaa.
22 Nu lee Ben nzhé:
—Naguta be xaa nu nebse ko be xaa leen bzo cheen nis yey,
kwaan nzob wen nee.
Nagalt be xaa —nzhé xaa nel nzhekla xaa le xaa yud xaa,
nel nzhekla xaa zare xaa xaa lo xuz xaa.
23 Gorna ngulo mzhin Che paro nzo re wech xaa,
zee mlache re xaa xab xaa kwaan chul doo na,
kwaan nak xaa.
24 Nu mzen re xaa xaa nu mcheep xaa xaa leen bzo,
kwaan nyent nis leen.
25 Zeera lee re wech xaa mri mzob ndaw.
Zee mwii xaa lee lak xaa nze nto nu nzi,
xaa nak dii cheen Ismael,
xaa mroo naz Galaad.
Lee re xkamey xaa nzeno perfum cheen yag bálsamo nu yaal mirra kwaan nzhano xaa naz Egipto.
26 Zee lee Judá nzhé lo re wech xaa:
—¿Cho gan le be gut be leeka wech be?
Zeera yé be:
“Nanet be xomod ngut xaa”.
27 Mas wen to be xaa lo dii cheen Ismael.
Zee naguta be xaa,
nel lee xaa nak wech be,
leeka baal cheen be.
Nu lal myaan re xaa.
28 Nu gorna lee xaa nto nze nu nzi nzha ded,
xaa nak yezh Midian nu lee re wech Che mloo Che leen bzo,
zee mto xaa xaa lo re xaa dii cheen Ismael.
Nu mto xaa xaa kwaan tub gal demi plat.
Zee nyano xaa xaa naz Egipto.
29 Zeera mbare Ben roo bzo nu lee Che nyentla leen bzo,
zee mchaz xaa xab xaa.
30 Zeera mbare xaa paro nzo re wech xaa nu nzhé xaa:
—¡Lee xaa mad nyentla!
Lee nal,
¿cho kwaan le na?
31 Zee lee re wech xaa mzen xab Che nu mteeb xaa xren tub chib,
ma mbit xaa choya.
32 Nu mbe xaa xab Che,
kwaan chul doo nlu lo xuz xaa nu nzhé xaa:
—Nguzhal nu kwaane,
wii,
¿che nzak lu leeya oncha naleet xab xgann luya?
33 Nu lee Kob mlabeyya nu nzhé xaa:
—¡Xab xgaan naya!
Nzho cho ma nakap mchaz xaa nu ndaw ma xaa!
34 Zee lee Kob mchaz xab nu mbinn nel nales doo nzhak lextoo xaa.
Zee ngok xaa tub ler nagaas nu zyen doo mbizh mbinn xaa nel mle doo xaa xgab ngut xgann xaa.
35 Re xgann xaa nu re xchaap xaa nzhekla seleyy xaa,
per lee xaa nanzheklat leyy nu mas nzhonn xaa kwent cheen xgann xaa nu mbezh xaa:
—¡Tubka nzho yalnales cheen xgaan na lextoo na,
axtaka yoo na kwaan lee xaa lo re xaa ngut!
36 Nu naz Egipto mto xaa Midian Che lo Potifar,
xaa nak xaa nabeyy lo re soldad,
xaa nkanap xaa ngok faraón.