Siquem mre Dina
34
Dina xchaap Kob kwaan Lea nzha lo re ngwnaa yezh.
2 Lee Siquem nak xgann Hamor,
xaa Heveo,
tub xaa nak mod rey cheen yezh.
Nu gorna ngune xaa lo Dina mre xaa me.
3 Nu yula doo xaa me nu chul doo ngunii xaa lo me.
4 Zee ngunii xaa lo xuz xaa:
—Pa,
ya lu yanaab lu Dina.
Nzhekla na ka na me.
5 Nu lee Kob nela mre xaa Dina.
Nu lee re xgann Kob nzoka naz wen,
namlet xaa nik tub kwaan,
mlaz xaa gorna nyaad re xgann xaa xaa ngwa wen.
6 Zee lee Hamor,
xuz Siquem,
ngunaab Dina lo Kob.
7 Gorna lee re xgann Kob nyaad ngwa wen nu nayii doo xaa noka nzhaal xyan doo xaa nel ngune xaa re kwaan kayak.
Nu noka nales ngok lextoo xaa nel naka tub kwaan gro doo lo re xtii Israel,
nel Siquem mre xchaap Kob kwaan nanzhaalt gak.
8 Nu Hamor mdizh kwaan lee xaa nu nzhé xaa:
—Kwaan dub lextoo xgaan na ne xaa lextoo xchaap lu.
Laa gu zhaal rop mad.
9 Gak sawlizh be nu sbaa nzho mod ka xinn re nu xinn re gu nu noka nzho mod ka xinn re gu xinn re nu.
10 Blakeka gu yo gu nee nel nzho gro yizhyo.
Nee ble gu negos nu bzi gu yizhyo.
11 Nu noka Siquem nzhé lo re bzan Dina nu lo xuz me:
—Nzho mod za na kwaan nzhekla gu.
12 ¿Lak nzhekla re gu kix na ka na Dina?
Na kix paro naab gu.
¡Laa gu ka na me!
13 Nu mkeb re xgann Kob lo Siquem nu Hamor,
xuz xaa,
kwaan yalkade,
nel mre xaa Dina kwaan lajwers.
14 Nu nzhé re xaa:
—Nagarlot le nu kwaane,
nazaat nu bzan nu ka xaabyi,
xaa nanzhot beey cheen re nu,
nel komba nak tub yalnto lo re nu.
15 Nebse nzho moda chelee gu gak gu mod nak re nu nu yo rese xaabyi gu beey.
16 Snee nzho mod ka gu re xme nu nu re nu ka re xme gu,
zee yo be tubka nu gak be tubka yezh.
17 Per chelee gu nanzheklat guya,
zee wee nu Dina nya nu.
18 Lee Hamor nu Siquem mzeyal le kwaan nzhé xaa.
19 Per lee Siquem namlaztra nu zoza ngwa xaa lo re xaa nak zhiin,
nel ngula doo xaa Dina.
Nak xaa tub xaa nonra garli xuz xaa.
20 Nu rop xgann Hamor ngwa lo re xaa nak zhiin roo wri yezh,
zee nzhé xaa:
21 —Xaa ne nak re xaa nyen na nu laa be yo xaa nee,
zee le xaa negos,
nel gro doo nak yizhyo.
Zee nzho mod ka be re xchaap xaa nu noka lee xaa nzho mod ka re xchaap be.
22 Nu zeyal xaa yo be tubka nu gak be tubka yezh,
nebse chelee re xaabyi be yo beey mod nak re xaa.
23 Laa be yo xaa nee,
zee rese xma xaa nu kwaan nzhap xaa gak xcheen be.
24 Rese xaa nak zhiin nu re xaabyi mzeyal gu beey kwaan Hamor nu Siquem.
25 Per lee mbizh yon ngwa Simeón nu Leví,
bzan Dina leen yezh,
gorna lee re xaa naxto lo yalne cheen beey.
Nu kwaan spad mbit xaa rese xaabyi.
Nu nik tub kwaan nagarlot le re xaa ba.
26 Zeera mbit xaa Hamor nu Siquem nu mbe xaa Dina leen li Siquem.
27 Zeera mzhin stub naz xinn Kob nu mded xaa lo re xaa ngut,
nel nawent mle xaa bzan xaa.
28 Nu mbe xaa mbakxiil,
ngoon,
ngwes nu rese kwaan nzho leen yezh nu rese kwaan nzho wen.
29 Mlewann xaa rese kwaan nzho leen re yoo nu mbe xaa madwin nu ngwnaa.
30 Zee lee Kob nzhé lo Simeón nu lo Leví:
—¡Kwaan mle gu nak tub kwaan nyaadno yalnayii!
Lee nal yii re xaa Canaán nu re xaa Ferezeo ne na.
Nu zhaal re xaa,
zee kee xaaya yek be nu nel cheepse xaa nkano be.
31 Nu rop xgann xaa nzhé:
— ¿Nanzhaalt ngle xaa bzan nu mod tub me nto cho?