Mzhaal Kob nu Esaú
33
Gorna lee Kob ne lee Esaú nze kwaan tub tap gayoo xaa,
kwaanzee mzaa xaa mad lo Lea,
lo Raquel nu lo re me nke zhiin lo xaa.
2 Yilotlaka mzo xaa me nke zhiin kwaan xinn me,
zeera mzo xaa Lea kwaan xinn me nu Raquel kwaan Che.
3 Nu mzo xaa delant lo re me nu mkichxub xaa axta ngulo mla lachuzh xaa lo yo tub gazh welt,
axta gorna mzhin xaa lo wech xaa.
4 Per gorna ngune Esaú lo Kob,
zee mdexonn xaa xaa nu mzaa xaa tub bit lo xaa nu mbinn rop wech xaa.
5 Zeera lee Esaú ngune lo re ngwnaa nu lo re mad win nu nzhé xaa:
—¿Cho nak re me ne?
Zee lee Kob mkeb nzhé:
—Nak re xiin na,
mad mzaa Dios lo na.
6 Zeera mbii re me nke zhiin lo Kob nu re madwin nu mkichxub me kwaan re xinn me lo Esaú.
7 Zee mbii Lea kwaan xinn me nu mkichxub me,
lee gwluzh zeera mbii Che kwaan Raquel nu noka mkichxub rop xaa.
8 Nu lee Esaú nzhé:
—¿Chozhiin mxaal lu re ma mzhaal na lo naz baa?
Lee Kob mkeb nzhé:
—Re ma ba nak zee yenlazh lu kwaan mle na lo lu nu kayaa wen lu na.
9 Per lee Esaú nzhé:
—A wech,
blake kwaan re xma lu;
nkano doo na ma.
10 Nu lee Kob mle doo jwers:
—Naab na lo lu,
zee kayaa lu re ma zelazh na,
nel wen doo mkayaa lu nu nu sneepa ne na lo lu kwentaxa ne na lo Dios.
11 Naab na lo lu,
bkayaa kwaan nzeno na kwaan zelazh na lo lu,
nel Dios mle rik na nu nik tub kwaan nanzho jwalt lo na.
—Wena.
Chaa nya rop wech be,
lee na nya delant lo lu.
13 Nu lee Kob mkeb:
—Xaa nabeyy na,
lee re madwin nayet ze nu noka nkano na mbakxiil nu bak,
ma nkano xinn nkin kee na ma nizh nu chelee na nye nyano na ma tub mbizh napa kayet re ma.
14 Zyaa gu delant,
xaa nabeyy na.
Lee nu yaad chawlazh,
yaadke nu tich re ma,
ma ya delant lo na nu mod nze re madwin,
zee nzhaal be Seir.
15 —Wena —nzhé Esaú—.
Lake na lak xaa nke zhiin lo na yaad kwaan lu.
Nu lee Kob mkeb:
—Xaa nabeyy na,
nalet lu kas na.
16 Leeka mbizh zee mbare xaa nya xaa Seir.
17 Nu lee Kob mchee naz nya naz Sucot.
Nu baa mlek xaa tub yoo ler cheen xaa nu noka mdexkwaa xaa tub ramad cheen re xma xaa.
Kwaanzee mloole xaa baa Sucot.a
18 Gorna mbare Kob naz Padan-aram nu wen mbare xaa.
Ngwa xaa naz yezh Siquem kwaan nzhikwaa yizhyo Canaán.
Naz ba mlek xaa yoo ler xcheen xaa.
19 Nu mzi xaa tub lee yizhyo kwaan ngwa tub gayoo demi plat lo xtii Hamor,
xuz Siquem,
paro mlek xaa yoo ler.
20 Zeera mbare xaa mdexkwaa xaa lo tub mdo nu mloole xaaya El-Elohe-Israel.b