Kob nu Esaú mzhaal
—¡Nee mbaz re xsoldad Dios!
Kwaanzee mroole ne Mahanaim.a
3 Kob mxaal lak xaa nke zhiin lo Kob lo wech xaa Esaú,
xaa nzho naz yizhyo Seir kwaan nak xkizhyo Edom.
4 Nu ngunabeyy xaa xaa nzhé xaa:
—Yé lu lo wech na Esaú:
“Snee né Kob lo lu:
Na nak xaa nke zhiin lo lu,
zee nabeyy lu na.
Ngu na lo Labán zyen doo mbizh axta nal.
5 Nu nalsi nkano na:
ngoon,
ngwes,
mbakxiil,
xaa nke zhiin nu me nke zhiin lo na,
nu noka naab na wen kayaa lu na.”
6 Gorna mbare re xaa ngwa lo Esaú,
zee nzhé xaa lo Kob:
—Naz tras nzela wech lu Esaú nu nze xaa zhaal xaa lu nu nze xaa kwaan tap gayoo xaa kwaan lee xaa.
7 Gorna mbin xaa sbaa,
mzheb doo Kob nu mle doo xaa xgab.
Nu mloxcho xaa re sawlizh xaa ngok chop tant re xaa nu noka mloxcho xaa re mbakxiil,
ngoon nu kamey.
8 Nu mle xaa xgab:
“Chelee Esaú nze kwaan re xaa zee saaw lo tub naz xaa,
zee lee stub naz xaa nzho mod xonn”.
9 Nu ngunii xaa lo Dios:
—Dios cheen Abraham,
Dios cheen xuz na Chak Xaa Tubka Nak,
nguné lu lo na bare na xkizhyo sawlizh na nu zee le lu wen nya na.
10 Nanzhaalt yalzo na yalnkela cheen lu mod nali ngok lu lo na.
Nu gorna mdeed na Yuu Jordán nu nik tub kwaan nanyanot na,
nebse nyano na xkarot na;
nu lee nal mzhin na mkano na chop tant myet kwaan ma.
11 ¡Naab na lo lu Dios,
kanap lu nu lo wech na Esaú!
Nzheb doo na napa lee xaa kayut nu kwaan re xnaa mad nu re mad.
12 Lu né:
“Wen deed na nu zee lee re dii cheen na gak zyen doo mod yux kwaan nzhi roo nistoo,
kwaan nagarlot lab xaa”.
13 Nu baa mzo xaa dub yaal.
Nu mloo xaa lak re ma zelazh xaa lo wech xaa Esaú.
14 Mloo xaa:
chop gayoo chib gol nu tub gal chib mach,
chop gayoo mbakxiil gol nu tub gal mbakxiil mach,
15 galbchii kamey nu dub xinn ma,
choo bak nu chii ngon nu tub gal ngwes gol nu tub chii ngwes mach.
16 Zee mzaa xaa ma lo re xaa nke zhiin lo xaa nu mle xaa chon tant ma.
Nu nzhé xaa lo xaa nke zhiin lo xaa:
—Tub naz ma nzha delant nu stub naz ma nze xsaw,
nu stub naz ma nze naz tras.
17 Zee ngunabeyy xaa xaa yilo nu nzhé xaa:
—Gorna zhaal lu wech na Esaú nu né xaa:
“¿Pa ya lu?
¿Cho nak lu?
¿Cho xma nak re ma nzeno lu?”
18 Zee keb lu:
“Lee ma nak kwaan nzelazh Kob lo lu.
Nu noka nze xaa naz tras tich nu.”
19 Noka sbaa mxaal xaa,
xaa rop nu xaa yon nu re xaa mbe re ma.
Nu nzhé xaa:
—Gorna zhaal gu Esaú,
zee yé gu leeka kwaan ba.
20 Nu yéka gu:
“Lee Kob,
xaa nke zhiin lo lu,
nze naz tras lo re nu”.
Nel lee Kob mle xgab:
“Seleyy na xaa kwaan re ma mxaal na lo xaa,
zeera ne na lo xaa.
Nu snee,
zee nen che zkayaa wen xaa na.”
21 Snee mxaal xaa re kwaan mzelazh xaa nzhaga nu lee yaal zee mlake xaa baa.
Kob ngune lo Dios
22 Nu lee yaal zee nguxche Kob mbe xaa rop sa xaa,
rop me nke zhiin nu re chiibtub xinn xaa,
zee mted xaa xaa Yuu Jaboc.
23 Mded xaa yuu ba nu kwaan rese xcheen xaa.
24 Gorna mlake techo Kob,
tub xaa mzelo mzaa paras Kob axta gorna ngulo mkaxnila yizhyo.
25 Per lee xaabyi mzeen nalet gan lo Kob,
zee mla xaaya mer cho bchaay kor Kob nu tira mchuuya.
26 Zee lee xaabyi zee nzhé:
—¡Sela na!
Nel mkaxnila yizhyo.
Per lee Kob nzhé:
—Naselat na lu chelee lu naniiwent lu lo na.
27 Per lee xaabyi zee nzhé:
—¿Cho le lu?
—Na le Kob —mkeb xaa.
28 Per lee xaabyi zee nzhé:
—Naletra lu Kob nal,
lee nal lu roole Israel,b
nel mdil lu kwaan Dios nu kwaan myet nu mle lu gan.
29 Zee lee Kob mkeb:
—Lee nal né lo na,
¿cho le lu?
Nu lee xaabyi nzhé:
—Nzhaal nela lu cho le na.
Zee lee xaabyi ngunii wen lo Kob.
30 Zee lee Kob mloole baa Penielc nel nzhé xaa:
“Snee sneepa ngune na lo Dios nu seesa mbanra na”.
31 Nu mroo Kob Peniel gorna ngulo mlen mbizh;
nu nel ne cho bchaay kor xaa,
zee nebse gareenk nze xaa.
32 Kwaanzee lee mbizh nalzhe lee re dii cheen Israel nanzhawt yib cho kor re ma,
nel baa Kob ngwa golp.