Kob mxonn lo Labán
31
Nu mbin Kob re wdizh kwaan ngunii re xgann Labán:
“Kob mzen re kwaan nak xcheen xuz be,
kwaanzee ngok rik xaa”.
2 Noka mzeen Kob lee Labán ngwii nawentra lo xaa modxa mwii xaa lo xaa yilo.
3 Zee lee Xaa Tubka Nak nzhé lo Kob:
—Bare lo xkizhyo xuz lu paro nzho re sawlizh lu nu na zo kwaan lu.
4 Kob mxaal xaa yichezh Raquel rop Lea zee ya me wen paro nzo xaa nkanap xaa mbakxiil.
5 Nu nzhé xaa:
—Ne na lee xuz lu nanlewentra lo na modxa mle xaa lo na yilo.
Per lee Dios cheen xuz na tubka nzo kwaan na.
6 Gu ne wen,
lee na nkee zhiin kwaan xuz gu modxa nzho moda lo na.
7 Nu lee xaa tubka kakade na nu nzhala chii welt nzhachee xaa mod ngix xaa nka na.
Per lee Dios namlaat ngle xaa kwaan nawent lo na.
8 Lee xaa né:
“Snee le be.
Kix na ka lu kwaan re ma pint,
zee nzhal duzna ma pint.”
Nu mbare xaa mbezh xaa:
“Mas wen snee le be.
Kix na ka lu kwaan re ma mxeey,
zee nzhal duzna ma mxeey.”
9 Sbaa mod mkiib Dios re ma lo xuz gu,
zee mzaa xaa ma lo na.
10 Ngu tub mbizh mchaa lextoo na,
lee re ma gol nzho pwest nu lee re mach pint nu ma mxeey kayixoob tich ma gol.
11 Nu lo mkaal lee tub mandad cheen Dios né lo na:
“Kob”.
Nu lee na nzhé:
“Lee na neeka”.
12 Zee lee mandad cheen Dios né:
“Wen wii lo re mach pint nu ma mxeey nu ma nagaas,
ma kayixoob tich re ma gol.
Nel na ne cho kwaan kale Labán lo lu.
13 Nel na nak Dios,
xaa mlu lo lu naz Betel,
paro mchub lu nsyet yek tub ke nu myaan lu tub kwaan lo na.
Lee nal,
roo lo Labán nu bare naz Canaán paro ngol lu.”
14 Zee lee Raquel nu Lea mkeb:
—Nu,
nankanotra nik tub kwaan lo xuz nu
15 nu nkano me nu kwenta me zit nu mto me nu,
mluux me rese kwaan nzhap nu.
16 Nu rese kwaan non,
kwaan mkiib Dios lo xuz nu,
naka cheen nu nu cheen re xinn be.
Kwaanzee le lu rese kwaan né Dios lo lu.
17 Zee lee Kob mtexoob re mad nu re sa xaa tich kamey
18 nu mbe xaa rese kwaan nkano xaa.
Nu mzo xaa naz kwaan re xma xaa,
ma mle xaa gan naz Padan-aram nu mbare xaa naz yizhyo Canaán.
19 Lee mbizh zee lee Labán ngwa nguchub mbakxiil nu lee Raquel ngwa nguloo lak xmaj xuz.
20 Nu snee mkade Kob Labán,
xaa Aram,
nel nanzhét xaa lee xaa nya.
21 Nu mroo xaa baa kwaan rese kwaan nzhap xaa nu mded xaa Yuu Éufrates nu mzhin xaa naz yi Galaad.
Labán mreke tich Kob
22 Lee mbizh yon,
zeera lee Labán ne lee Kob mroo nya,
23 kwaanzee lee Labán mbe sawlizh xaa nu mreke xaa tich Kob.
Lee mbizh gazh zee nguga Kob lo xaa naz yek yi Galaad.
24 Nu lee yaal zee lee Xaa Tubka Nak ngunii lo Labán,
xaa Aram,
lo mkaal nu nzhé xaa:
—Kenzha.
Nik tub kwaan nayét lu lo Kob.
25 Zee nguga Kob lo Labán naz leen Yi Galaad,
paro mlek Kob yoo ler.
Nu baaka mlaz Labán kwaan re sawlizh xaa.
26 Zee lee Labán nzhé lo Kob:
—¿Cho kwaan kale lu?
Nu ¿cho zhiin mkade lu na nu nzeno lu xiin na kwaan lajwers axta re?
27 ¿Cho noon nanét luya gorna mroo lu?
Nu chol ngané luya lo na zee ngle na tub yalni nu nglakee na kwaan yalnix
28 Per nanglaat lu ngza na tub bit lo xiin na nu lo re xos na.
¡Tira nawent mle lu!
29 Nix doo kee naya yek lu,
per lee nawzhezee ngunii Xtios xuz lu lo na nu né xaa:
“Kenzha.
Nik tub kwaan nayét lu lo Kob.”
30 Per chelee lu tant nzhekla lu bare lu garli xuz lu,
¿cho noon mle wann lu xtios na?
31 Zee lee Kob mkeb lo Labán:
—Nel mzheb na nu mle na xgab napa kiib lu re xinn lu lajwers lo na.
32 Nu chelee tub xaa nzo nee nkano xtios lu,
¡zee yet xaa!
Nu re sawlizh be nak xaa neya.
Chelee na nkano na tub xcheen lu,
beya.
Per lee Kob nanet lee Raquel mlewann xmaj xuz.
33 Zee lee Labán mreep leen yoo ler cheen Kob,
zeera ngwa xaa leen cheen Lea nu noka leen cheen rop me nke zhiin,
per nanguzhalt xaa maj.
Gorna mroo xaa leen yo ler cheen Lea,
zeera ngwa xaa leen yoo ler cheen Raquel.
34 Per lee Raquel mzen re maj nu mlo meya xan xil kamey nu mzob me ticha.
Nu lee Labán nzo nkwaan maj dubse leen yoo ler cheen Raquel,
per nanguzhalt xaaya.
35 Zee lee Raquel nzhé:
—Xuz na,
naxent lu chelee na nayizot na,
nel mer kaded ren lextoo na.
Per lee Labán ngukwaan xmaj leen rese yoo,
per nanguzhalta.
36 Per lee Kob nayii nu nzhé lo Labán:
—¿Cho kwaan mle na?
¿Xana jwalt mle na zee tant nzeke lu tich na?
37 Nu mkwaan lu xtios lu lo re xcheen na,
¿nu cho kwaan nguzhal lu kwaan nak xcheen lu?
¡Bleka nee lo re xaa lu nu lo re xaa na,
zee ne re xaa cho kaleya!
38 Dubse tub gal liin mkee na zhiin lo lu nu nik tub xma lu nandawt na nu nixa nik tub xpakxiil lu nu xchib lu namluxt xinn.
39 Nik tub welt namzhinot na tub ma ngut lo lu,
sinka mdix na ma lo lu.
Nu nixa ma mlewann xaa,
zhe o yaal nu ngunaab lu ma lo na nu mdix na ma.
40 Lee zhe mer nget na lo neey nu lee yaal mer nget na lo nal nu noka bid doo mdeed na lo mkaal.
41 Nu sbaa mzo na tub gal liin garli lu,
chida liin mkee na zhiin zee mka na rop xchaap lu nu xoop liin mkanap na re xma lu.
Nu chii welt mchee lu mod mdix lu mka na.
42 Chol nangzot Dios cheen Abraham kwaan na nu Dios xaa mzheb xuz na Chak ngune,
telise ngxaal lu na kwaan nebse kwaan yaa na.
Nu lee Dios mwii nales doo ngok na lo re zhiin kwaan mle na,
zee mgalno Dios lu.
43 Zee lee Labán mkeb lo Kob:
—Rop ngwnaa ne nak xchaap na nu re mad ne nak xos na nu re ma ne nak xma na;
nu rese kwaan nlu lo lu nak xcheen na.
Nyent mod le na tub kwaan nawent lo xchaap na nixa lo xos na.
44 Lee nal te;
zee yaan rop be,
lu nu na,
tub trat kwaan le zhiin lo rop be.
—Rese be toop ke zee kwek bdook beya.
Nu mri re xaa ndaw lo bdook ke.
47 Labán mloole zee xtizh xaa “Jegar Sahaduta” nu lee Kob mloole zee xtizh xaa “Galaad”.a
48 Zee lee Labán nzhé:
—Lee nal re ke bdook ne gak testig cheen rop be.
Kwaanzee Galaad mloole kwaane.
49 Nu noka mrooleya Mizpa,b
nel Labán nzhé:
“Lee Xaa Tubka Nak kanap rop be gorna lee be nanetra lo tub be nu lo stub be”.
50 Nu nzhé Labán:
—Chelee lu nawent kano lu rop xchaap na nu chelee lu ka lu stub ngwnaa,
nyentra cho gak testig lo rop be,
zee Dios gak testig.
51 Mbare Labán nzhé lo Kob:
—Wii,
lee bdook ke ne nak nseyn kwaan myaan rop be.
52 Bdook ke ne nak testig nu leeya nak nseyn kwaan nadeedtra na yal na lo lu nu nixa lu nadedtra yiid lo na.
53 Lee Dios cheen Abraham nu Dios cheen Nacor naab kwent lo rop be.
Zee lee Kob mcheroo lo Dios,
xaa mzheb xuz xaa Chak ne.
54 Zee lee Kob mted ma lo Dios yek yi nu mrezh xaa re sawlizh xaa nu rese xaa ndaw nu mlakeka xaa baa dubse yaal.
55 Lee stub mbizh garziil doo,
nguxche Labán nu mzaa xaa tub bit lo re xos xaa nu lo rop xchaap xaa nu ngunii wen xaa.
Zee mbare xaa nya xaa xkizhyo xaa stuba.